[技術討論] Netflix要係香港禁止分享賬戶係不可能的任務

阿定

我估大家呢幾個月都成日見到唔同的內容農場講緊Netflix開始禁止 share 比非家庭成員共用戶口的新聞，但事實上Netflix只係講緊部份地區會禁，無講過香港會禁。

先唔討論Netflix禁share戶口有咩問題，會唔會影響股價，會少了訂閱人數，定多了訂閱人數，我地不如先睇番佢有咩技術可以用來禁到大家，認到係唔係家庭成員。

首先，唔駛講都知， Check IP, 但香港細到根本唔會分到呢粒ip係沙田，個粒ip係灣仔，除非網絡供應商肯配合Netflix, 就算真係比你跟到地區，一個正常香港人，屋企一粒ip, 搭車手機睇一粒ip, 返到公司用公司WiFi睇又一粒ip, 仲未計公司一粒ip有幾十個同事都會睇Netflix, 手機網絡成村人用同一粒ip得來仲要不停轉機站根本無得追。

如果多人討論，再講埋Mac Address 同 Device ID的情況。

jacky622

只准登記限量既device 已經得啦
使乜用ip

paul.play.forwa

但係真係需要跨區先至界定到唔同IP?

雖然我唔識IT嘢，都期待有高手俾啲意見

Camille124

其實計準d都好，有機會一條友俾番平d，而家計番咁多個月俾足93都幾甘下

阿定

jacky622 發表於 2022-4-20 19:35
只准登記限量既device 已經得啦
使乜用ip

好似Now睇波咁，唔計機頂盒，鎖死你只能用一部機睇，登記了的機短期內無得轉機。

不過我覺得呢個方法，好難面對一般平民，只會出現唔知點解睇唔到，然後求助無門後就放棄唔用。

阿定

paul.play.forwa 發表於 2022-4-20 23:44
但係真係需要跨區先至界定到唔同IP?

雖然我唔識IT嘢，都期待有高手俾啲意見 ...

理論上每條獨立寬頻上網線都會有自己的IP ，簡單來講，每個家庭都有自己的IP，要Check實際位置唔係好難。

事實上，只要有 True IP 位址 及 連線時間，要追查實際地址其實一定追得到，要追查到邊條街幾多樓邊個單位都可以，當然前提要寬頻公司配合，又或有法庭批准之類，否則就會變成私隱問題。

如果無寬頻公司配合，一般只能追查到 油尖旺區，中西區 咁，唔會追得到邊條街咁詳細。

不過講番重點，如果一個真用戶，一時係屯門，一時係中環，咁都計落誇區犯規的話，咁應該99%香港人都會犯規用唔到了。

阿定

Camille124 發表於 2022-4-21 07:36
其實計準d都好，有機會一條友俾番平d，而家計番咁多個月俾足93都幾甘下

係，一機一戶，收番平d係最可行同最簡單的方法，如果一個人一個月93蚊，我唔會話比唔起，但係咪值呢個價，我好有保留，雖然片單係超多，但真正自己想睇的，其實都係有限數。

以前未有人同我夾，我都係隔幾個月或半年儲埋一堆片先Join一個月一次過睇晒去，宜家四個人長期夾，睇的片無特別多了，但累計全年的支出其實仲比多左錢，我就唔覺Netflix會係我身上搵少左錢啦！

sam2004

香港的價錢已經不便宜，他之前隻眼開隻眼閉係想衝個量，如果硬要一刀切佢會自食其果

hot_kwn

我會即cut, 佢連$90都冇埋.