升空登月陰謀論《阿波羅10號半：男兒當升空》

龍無忌@FB

#阿波羅10號半 #男兒當升空

162/2022

《我們都是這樣長大的》(Boyhood, 2014) 導演李察連利加 （Richard Linklater , 1960-）導演肯定好喜歡懷舊，所以自編自導拍咗部十分懷舊嘅卡通片叫做《阿波羅10號半：男兒當升空》（Apollo 10 1/2: A Space Age Adventure, 2022)，Netflix 剛剛上架。借用60年代美國和蘇聯登月競賽中爭先上太空登陸月球的歷史，編出了這個大陰謀論的故事。

話說60年代嘅時候，升上太空登陸月球，係好多戰後嬰兒潮嘅小朋友童年夢想，點知太空總署整咗架火箭之後，發現登陸月球嘅船艙做細咗，只能夠容納一個十歲左右的小朋友，於是乎就搵咗男主角去參加呢個秘密行動，做太空人坐阿波羅10號半火箭上去登陸咗月球先，然後就詐諦話阿波羅11號太空人岩士唐登陸了月球，為人類踏出一大步！

其實到而家都有個陰謀論話1969/7/20當時阿波羅11號根本冇登陸過月球，嗰條片根本就係《2001太空漫遊》（2001: A Space Odyssey, 1968) 導演史丹利寇比力克幫美國政府係片廠拍嚟呃人話登咗月嘅。（有人在2012年拍了部紀錄片叫《Room 237》剖析史丹利寇比力克係自己部作品《閃靈》裏面，隱蔽地披露了這個秘密，見圖：Danny 着住件阿波羅11號火箭圖案嘅毛衫，係好似火箭基地圖案嘅地氈上面企起身隱喻火箭升空）

而呢部《阿波羅10號半：男兒當升空》其實簡直係濃縮嘅懷舊歷史卡通紀錄片，配樂好正，水彩懷舊畫風簡約得來卻甚為生動。

講述60年代戰後嬰兒潮、越戰、暴動、核彈冷戰、嬉皮士、喇叭褲、保齡球館、波子機、避孕藥、塑膠袋、體罰、遊戲、零食、雜誌、整蠱電話、電台節目、音樂、甚至電視劇和電影，包括《仙樂飄飄處處聞》、《2001太空漫游》、《綠野仙蹤》及很多Cult 片邪典電影等文化作品都有提及。

我呢代稍為了解美國文化嘅戰後嬰兒潮嘅人睇落去就會津津有味，但若唔係呢代人，如果你真係想了解一下先好睇囉。