《940920》是神作還是糞作？ 阿月黑化是劇情崩塌的開始？

paul.play.forwa

ViuTV 劇集《940920》承着前作《二月廿九》 嘅口碑在開播之前已經備受關注，但劇情發展至中段坊間評價非常兩極，尤其是針對新角色阿月黑化嘅討論更加係當中嘅焦點，我試圖從呢個爭議性咁高嘅角色去切入了解，到底《940920》是神作還是糞作



點解阿月返過去要殺楚凝父母唔去搵凶手？佢同兩個主角真係有咁深仇大恨？ 原來細心翻睇劇組一早已經有作出深入嘅描寫

性格上一早營造阿月係一個好mean、原則性好強而且好執著嘅人，你見佢迫佢嘅店員(麗英)溝錯顯影液沖菲林後要道歉以及老婆有病唔敢同佢講就知。而且佢長期要照顧有抑鬱症嘅老婆，雖然性格負面但往往強顏歡笑希望令到老婆好過，長期嘅抑壓有機會阿月本身精神都已經開始有問題




從第六集太太車禍喪生開始，一路有描寫阿月角色嘅心理變化，當初得知女主角楚凝有穿越時空能力時，第一件事諗到嘅就係去阻止車禍發生以及搵出兇手是誰， 當時仲係一個正常人嘅思維邏輯




但發覺楚凝能力改變唔到結果，於是去開始用自己嘅方法去處理，第一樣嘢去搵魚蛋報仇 ... 殺人後才發現有機會殺錯了人，但深感自己無能為力，呢個時間進一步對信仰作出質疑

“若有人犯罪，就得擔當他的罪孽”





提出與楚瑩一齊合作又遭到拒絕，呢個時候阿月就認定楚瑩未有善用呢股力量，如果力量響佢手，就可以真正做到儆惡懲奸

“你寧願企響壞人嗰邊，都唔將部相機交俾我"



而且畫面上亦都有側寫到阿月對信仰嘅放棄，由希望神可以作出幫助，到一幕響太太墳前完全捨棄信仰(畫面呈現欄杆形成一個十字架，而且阿月係背向十字架)，當一個人連信仰都可以捨棄，就會更加走向偏激

"如果呢個世界冇神，咁我係咪可以主宰返自己命運； 如果我可以主宰自己命運，咁其他人嘅命運我係咪又可以主宰到"


第六集畫面，由開首對信仰動搖(面對十字架)，至尾段信仰崩潰(背向十字架)




劇情發展到魚蛋女友報仇刺咗佢一刀冇死到之後，就更加堅信自己嘅極端諗法


到最後即使楚瑩講出佢太太USB嘅秘密都已經動搖唔到佢，佢一心只係執着證明自己冇錯，甚至要用最極端嘅方法令到對方認同，所以佢選擇要越空殺人，要兩位主角感受相同嘅痛楚以及無力挽回嘅失望





其實細心可以從阿月嘅表現中睇到，佢希望證明比其他人睇佢啱。所以當佢認定冇辦法挽回老婆嘅死之後，就轉去執着證明自己才引發最後穿越時空殺人嘅動機。如果我哋細心睇呢個角色嘅變化，其實都寫得幾仔細，甚至乎分分鐘係全劇之中描寫得最深嘅一個，黑化心理變化層層進逼，加上朱柏康精彩嘅演技，單單在角色描繪上其實無懈可擊

太太死亡 > 知道楚凝能力重新燃亮希望 > 但發覺改變唔到以至信仰崩潰 > 極端行為證明自己冇錯以掩飾逝妻之痛

黑化是人物在性格上或精神狀態上的一種劇變接近崩潰而變壞，精神上的壞掉甚至切換至陰暗人格，在這種極端心理的影響下可能會發生社會報復性行為。壞人他們永遠不會意識到他們是壞的，在心理學層面上是由於一種社會認知偏差(Social cognitive bias)所導致，以致他們就得尋求另一種方式去把他們的想法合理化

全劇結論：期望落差使口碑兩極，敢於創新近年少見

當初導演都有響自己嘅LIVE 等講過，今次《940920》風格上與前作《二月廿九》其實完全唔同，甚至乎一早亦都講過主角戲份比例亦會有所不同。但似乎部份 Fans 都比較一廂情願沉醉於前作純愛劇嘅浪漫氣氛，大家都冇諗到會響一套純愛劇度睇瘋狂殺人狂，根本來不及有心準備去欣賞，雖然演員們嘅演出相當精彩，只係同觀眾對套劇嘅整體期望落差太大，其實當返《940920》 係一套穿越時空劇去睇成個觀感就立即fit晒

如果當初宣傳只係強調呢一套係時空穿梭嘅劇集，當觀眾見到兩pair人最後響埋一齊，可能反而仲會有驚喜，但當然好多嘢並唔係劇組自己可以決定，但我相信劇組已經做出最大嘅努力

總括嚟講《940920》可以好完全延伸出比《二月廿九》 更闊嘅宇宙， 作為fans真係收貨，非常期待劇組可以繼續延續新作，創出更大嘅《二月廿九》宇宙

alleelarry

個人認為「暴走」既係某一群觀眾

paul.play.forwa

我都認為係咁，我覺得最大問題係觀眾對呢套劇嘅期望落差，本身呢套劇真係ok

阿定

今集個尾收得唔太好，用萬能Key方案去扭個結局其實好低手，唔同上次由頭到尾都係用穿越去解決咁統一。

paul.play.forwa

阿定 發表於 2022-3-19 19:56
今集個尾收得唔太好，用萬能Key方案去扭個結局其實好低手，唔同上次由頭到尾都係用穿越去解決咁統一。 ...

的確係，如果劇情最後關鍵係靠流星許願嘅話， 真係 DLLM

TKFelix@FB

阿定 發表於 2022-3-19 19:56
今集個尾收得唔太好，用萬能Key方案去扭個結局其實好低手，唔同上次由頭到尾都係用穿越去解決咁統一。 ...

其實神聖幾何就係話畀觀眾知，New age唔只時空穿越，所以轉一轉個角度，佢話外星人幫左佢地都仲得架🤣

paul.play.forwa

TKFelix@FB 發表於 2022-3-19 20:06
其實神聖幾何就係話畀觀眾知，New age唔只時空穿越，所以轉一轉個角度，佢話外星人幫左佢地都仲得架🤣 ...

咁又係喎， New Age嘅嘢真係吹佢唔脹

不過如果真係外星人最後幫手解決嘅話，我諗我都會寄刀片

阿定

TKFelix@FB 發表於 2022-3-19 20:06
其實神聖幾何就係話畀觀眾知，New age唔只時空穿越，所以轉一轉個角度，佢話外星人幫左佢地都仲得架🤣 ...

同現實一樣，成日比朋友問買咩HiFi好，答足佢地幾個禮拜各類問題，但最後自己走去買條sound bar

terry1407

阿定 發表於 2022-3-19 20:25
同現實一樣，成日比朋友問買咩HiFi好，答足佢地幾個禮拜各類問題，但最後自己走去買條sound bar ...

深感體會，成日有咁嘅親戚朋友問完又唔信 ... 燥底