金仔E480入手記

aaron0071 · 發表於 2021-10-21 09:15

上年出咗post揾合拼機，三揀一問各位Ching意見（Diablo 120、金仔E480/E380 、老麥5300）先多謝各位Ching嘅意見

，。其實都過咗大半年有多，而喺標題相信大家都知道我最後係揀咗E480

，有見呢一年想揾合拼機嘅ching都係呢幾個選擇，故此想post吓我揀機嘅經歷，仲有用後感！
小資信：聆聽空間100呎到（空間鬥士），喇叭B&W CM8 S2。E480今年3月落訂5月頭攞機，喺英X買。
以下我將每次試機嘅聽感分開寫給各位參考：

1.金仔E380、E480。喇叭係大Size嘅書架郵筒
以前用Arcam A29推B&W CM8 S2 覺得好好聲（都知道一山還有一山高），一聽E480就畀佢嘅大動態嚇到（試Hotel California 、Dire Straits 嘅Your latest trick、绫戶智惠The way you make me feel、John Williams StarWars）聲音開闊，好多平時聽唔到嘅細節位全部出晒嚟，高低音好平衡唔會是但一邊過水位。
輪到聽細佬E380，聲底同大佬一個餅印，只係音埸細咗一圈，仲有喺細聲時（约-64dB）D細節無咗。
呢次聽完覺得自己鄉下仔出城，返到屋企即刻聽返晒D試機歌......死喇！D聲咁嘅！好掛住金仔呀！初步唸E380，因為聆聽空間細，仲有價格相差成皮喎！

2.老麥5300。喇叭係KEF R3書架
今次Source 係串流机NAD M10，所以聽咗好多首曲。曲子一首接一首，舒服悦耳低音無過量剛剛好，到中段我把Volume 扭大一點聽，先發現之前聽過嘅細節好像有點模糊了，而動態都有點收斂。但那水籃表堅正！
聽完唔係好有衝動要即時擁有，反而想聽聽上一级7200嘅效果如何。

3. Marantz Model 30。喇叭係B&W 705
呢次其實係陪朋友聽所以無乜期望（此終同我想要嘅價格相差有2～3萬，唔同Rank）,Source 又係串流用Marantz n30 SACD，嘩！估佢唔到，又ok喎！聲低唔係貴麗堂皇，但分析力強越聽越想加大volume，好似越大聲D細節會畀多D你聽到咁。但一聽John Williams 就明白呢兩皮幾差咗喺邊！個音埸感與動態比較細，呢樣係你點加大音量都無用。
Model 30我就麻麻喇！但部n30 SACD我就唸唸不忘.........

4. Diablo 120。喇叭係ProAc 二路書架
預約時我講明會帶埋CD去，一入毒氣房室第一眼就見到等緊我嘅係dcs嘅分體CD機（成十幾萬）
！OH my God，咁一定正啦！我當時表現氣定神閒攞晒D 試機碟出黎聽（同1.一樣加多隻天能OST ）。一口氣聽咗4首歌，好有High end音響feel，背景好静人聲同音樂分開得好有層次感，同聽老麥5300一樣有種好柔和嘅感覺，最後聽埋隻TENET天能 OST第一曲，聽完呢曲我已知道120唔係我杯茶，我愛大動態大音場的聲音！
原來呢部120嘅力水無我想像中咁揪得（又有可能ProAc難推），但300又貴到超出射程範圍，唔唸！但今次我明白到就算你有部十幾二十萬嘅CD機都好，原來部Amp同喇叭先係住導聲音表現。

5.老麥7200、金仔E480/E380 。喇叭 Sonus Faber 完美情人 Maxima Amator
終於到最後要決定買機喇！一早約定入毒氣室試埋老麥7200，試機碟同上。先黎7200！大掉眼鏡，Hotel California D現場感縮到好細，Your latest trick 頭段Saxophone 好似喺好遠吹咁（平時應該係好埋身的），聽聽吓個店員都覺得怪怪所以去Check吓有無嘢攪錯，最後原來係喇叭線接咗去4omh 佢話應該接8omh先正確喎，所以我地又由頭聽多次。可能已經先入為住，越聽越覺唔係自己追求嘅音色，所以播到一半就叫佢換返部E380試。
同上次試都巳經過咗幾個月，但一聽返就會記得返佢D聲！就算係換咗喇叭都會應得係金仔聲，真神奇！當時自己都知道係佢㗎喇！中晒金仔毒喇！想埋尾嘅時候店員話横掂預備咗部大佬，不如試埋先啦！心想：「好呀！橫掂差成皮我都唔買㗎啦！玩吓都好吖！」聽.......明明上次無咁大分別㗎！點解可解為何！低音下潛得好有力，回彈速度好快，聽John Williams 好大規模，So at last! You know me

Accuphase E480 入手！！！

多謝上述數間音響店服務過我嘅店員！佢地個個都好專業，絕對無黑面硬Sale！

最後想講返D用後感，聽咗半年無投訴，力量速度音場音樂感通通交足功課（地方細）！暫時都未有身痕想換新玩具，另外不得不提佢嘅每一個旋扭，嗰種高级感你要feel過先知（金仔fans你董我的）。
不過我终於明白到（個人見解）金仔係有好強嘅調聲，如果好似我咁本身用繄D千至萬元入門機又或者AVamp，一試過佢把聲應該十個有九個會中招，跟住去聽其他同價機便會覺得硬係佢好D之後就入坑！味精重D係好味D嘅……now 明白為何有Ching轉唔到會

完！有機會再講吓 n30 SACD入手記