直接講結論，《尚氣》睇得過

paul.play.forwa

直接講結論，尚氣睇得過

完全係梁朝偉充滿神采，落力去演既一齣戲，自從花樣年華之後未見過咁精彩嘅梁朝偉演出，眼神預咗係世界級演技，就連佢表演十環嘅動作，一放一收瀟灑有勁度，唔使問呢套片一定係日後試機必備之選

Marvel studio肯定吸收過Marvel隊長“空氣炮”冇質感咁嗰種失敗，今次十環武器響畫面同音效嘅配合上充滿質感同埋勁度，嗰種一放一收有方向感重量感嘅低頻亦同時有金屬嘅撞擊聲，加上梁朝偉嘅演出，一個字：爽！

故事雖然老土但電影整體表現真係唔錯，打鬥動作設計算係快狠勁，當然同頂班嘅港產動作片仲有啲距離，但肯定唔係平時見慣西片嗰啲慢動作鬼佬打鬥，而且又唔使擔心佢會係流於成龍式諧趣功夫快而唔勁，畫面上配合埋Marvel 式特技以及運鏡，的確係將亞洲元素融合西片推向另一個水平

女主角雖然醜樣但睇到最後總算可以接受，男主角個樣就真係睇到最後都係頂佢唔順…如果換過稍為靚仔啲嘅，今次套戲肯定唔會評價咁極端
最後響唔劇透嘅情況之下一定要講/唱：少林功夫醒，好好嘢～ 少林功夫勁，係好勁～～

小瑟

未睇唔敢睇你評價!!!!

SonSon

純粹睇套戲本身動作場面，巴士同棚架打鬥精彩過結尾部分

小瑟

岩岩睇完, 潮偉係正, 不過又未去到因為睇佢而覺得好正. 反而主角(劉思慕)同女主角(奧卡菲娜)真係有火花, 同埋打鬥場面的確係好的, 尤其係打澳門一段.
成套戲好多彩蛋位, "王"一出場真係正, 陳法拉，楊紫瓊和梁朝偉都係正的. 今次其實係開左好多第二個十年的開端, 我自己就對主角(劉思慕)有了一點好感了!

不過個故事來講, 就真係唔係好吸引, 中間小瑟都有睇錶, 感覺部戲都幾長下, 同埋D故仔唔算好引人入勝到. 見埋佢有龍出基本上好似DISNEY的卡通片感覺, 如果唔係有MARVEL連帶,  以佢自己呢個故仔來講, 真係唔算好好睇.

套戲我個人比7/10分, 希望出碟可以睇多次, 可能會好D~

chakat

我都今晚在imax睇完，正如小瑟大王所言，我唔覺得太好睇，但又未至於睇錶。。。。(個人比65分）
睇完片後，太太問我覺得點。。。我想了一陣，整部電影比我最大感覺是"外國人睇中國文化的差異"和我們實在有很多唔同的地方。。由選角到各類神獸的造型和我們傳統的觀感很不同。。。我唔覺得他們會專登選唔討好華人的男女角（始終當初佢地都好想搵到中國和華人的錢），但可能在他們眼中，男女主角至妹妹這些重要角色，才是似他們眼中的真正華人，而片中的各類神獸完全沒有我們傳統中展現的威武，似"怪獸與牠們的產地"裡的怪獸多D！對於我來說睇得有點格格不入。而劇情上對家尋仇的一段，拍得真係有點兒戲，好似七十年代的幫會片，簡陋到唔相信是荷里活出品。。另外我都贊成大王點題，文武一角好睇，但未至於完全拉高部片的整體觀感，而且對這個角色的描寫真心過於簡單，大奸角而沒有機會發揮大奸角的覇氣，完全靠梁朝偉的眼神和面部表情，未免有點強人所難，若能加多點描述文武覇度一面和行為，相信對照他放下及至回復黑道的心境會更立體吧。不過始終唔係正主角，也無可厚非！最後一提。。陳法拉的角色和戲份均不少，但點解咁少宣傳關佢事？連海報都冇佢。。真係有點不值。

陳永仁

元華有幾多戲份?thanks

paul.play.forwa

陳永仁 發表於 2021-9-6 06:58
元華有幾多戲份?thanks

工具人，過鏡幾場戲，幾句對白嗰種

paul.play.forwa

SonSon 發表於 2021-9-5 11:49
純粹睇套戲本身動作場面，巴士同棚架打鬥精彩過結尾部分

本來冇乜期望因為之前預告片都睇唔少呢場巴士戲，估唔到正片上嘅時候呢場戲俾人感覺唔錯，身邊唔小朋友都鍾意巴士呢場戲
之前睇過段影片，好似呢場巴士戲係一個香港武術指導有份參與， 可能因為咁所以先咁精彩

根本英俊

本來期望唔高, 所以冇好失望.
純粹睇下梁朝偉, 同捧下MARVEL場.

巴士同澳門嗰段已經係最好睇, 但都係香港舊打鬥片既水平.
結尾有D兒戲, 唔覺有咩精彩.  如其他師兄講法咁, 可能鬼佬會好受.

自己覺得係一部可睇可唔睇既戲...

SonSon

chakat 發表於 2021-9-6 01:21
我都今晚在imax睇完，正如小瑟大王所言，我唔覺得太好睇，但又未至於睇錶。。。。(個人比65分）
睇完片後， ...

片中神獸真係引經據典, 不過真係似過場多D......

尚氣｜MCU首現中國神話元素　還原《山海經》神獸帝江九尾狐獙獙