《狂野時速9》: 無視物理定律,飛車戲碼最爽爆一章

Hugo Fok

今晚 Hugo 及 龍無忌 獲 Logitech 邀請出席《狂野時速9》首映活動，一行 5 人一齊到圓方戲院 Premiere Elements 觀賞該片。經歷 FF8 及外傳作品兩度失去系列焦點及大方向後，FF9 最終由  Justin Lin 重掌導演一職，動作場口即時恢復 FF5 及 FF6 時代的癲狂狀態，大量真人親身上陣飛車特技元素及無視物理定律真人加 CG 合成勁爆動作戲碼都應有盡有。衝上太空一段情節戲碼雖說誇張，但亦能維持在真人電影可接受範圍，以飛車動作來講可算係集過去 20 年系列之最，對初次接觸 FF 系列的觀衆而言可能會睇到頭疼，但對 Hugo 而言今次動作場口絕對係用心之作，很有衝動再入戲院一次再體驗一番。比較失色是今集劇情繼續重用過去三集舊橋段，主綫故事可說零新意，慶幸新加入 John Cena 與 Vin Diesel 在對峙場中有火花，加上各演員在過去 20 年早已建立極高默契，一個眉頭都已足夠鋪陳出角色關係，對系列粉絲而言收貨有餘。但對於初接觸觀衆而言就可能被空洞劇情及反物理動作戲碼衝昏感知神經。總括而言 FF9 都值得大家到戲院好好體驗。



Elements 有   Logitech  X FF9 體驗專區，大家去開呢個戲院睇戲時，記得留意下

1234qwer

我尋日都睇左, 劇情可以唔理, 飛車動作場面真係刺激過癮

Hugo Fok

我覺得今集真係飛車雜技 + 無縫 CG 大曬冷，堅 FF 系列粉絲唔會失望。

:o)

套戲嘅大套路估得到，不停攞返啲舊人舊事出嚟玩情懷，而且已經拍到第9集，佢既大場面真係開始覺得無咩咁驚喜。

另外第三集東京Drift三條友唔玩日本車唔玩甩尾，無啦啦唔知點解去左第二度玩火箭車好無厘頭，
再加上第三集男主係今集既角色行為形態， 睇落變咗回到未來嗰個神經博士咁


＃永遠的ＢＢＱ結局

Hugo Fok

我入場前已有心理準備係 FF 系列自第 6 集開始已經轉型為真人版 Hot Wheels 競技，全程都無心裝載佢既劇情，一心睇佢地點樣將飛車雜技玩玩到極緻...而出來既動作場口新鮮度我覺得係有誠意既   另外， FF 系列電影既劇情其實都係用模組化方式分拆上市，單憑一集内容我自己都唔識點樣評論好與壞...
另外，整個系列經歷左成二十年，你發現個 BB 結局反而係成套片真諦所在... 最尾個幕個張預留左既凳，我覺得除左有可能係其實舊角色歸隊外，亦可能係向 Paul Walker（Brian）致敬，不過專登講得隱晦 D 免得又催淚...   不過因爲而家只係我個人猜測... 遲下全球所有地區正式上映後，可能仲有其他解讀方式都未定。

kenji

第三集啲角色好殘😅

jc2ssych

邊個位無視物理定律呢？
根據物理定律又應該係點呢？
不如分析下丫！

chm

講完物理之後，又可以講 生物，之後又可以講化學，之後又可以講 歷史......等等  👍

Hugo Fok

搞到咁大, 一定要請外援 wor...  要徵召各路師兄出馬先得 ...