值得推薦的韓國驚慄片——《記憶之夜》（Forgotten, 2017)

龍無忌@FB

好巴打介紹我睇《記憶之夜》（Forgotten, 2017)，果然係一部奇情嘅驚慄片，網飛有播，認真唔錯。值八分！👍🏼
呢類比晒心機去扭橋編劇又留意細節嘅電影，切勿好似我個女咁，因為好奇，走去睇埋啲電影介紹同觀後影評，俾人爆雷🤬🤬咁樣到時欣賞嘅時候，就失去晒意義同趣味。所以我都好討厭人哋將劇情透露，其實睇完寫觀感及評語咪得囉。

故事開端講和諧四口之家搬入新屋，有個神秘唔掂得嘅房，主要吸引觀眾好奇心來繼續看下去，點知一轉眼，好多發展都令人意想不到，後半部才換個角度同你講清楚，凸顯編劇功架。
導演同為一人，營造氣氛有一手，鉛芯筆果幕好正，聚焦大特寫用咗幾次效果亦不錯。
兩個男主角演技都很好，呀哥嘅面部表情變化時忠時奸，細佬時老時嫩，身體語言甚佳，搞到我仲特登回帶睇下係咪由兩個人飾演同一角色😂

不過最後花咁大精力去查証自己由細到大的想法，得知答案後崩潰到咁，冇必要咁悲情，我認為係可以改善嘅地方。
但最後加插的兄弟前緣有啲浪漫，像是補飛等觀眾離埸前開心啲。

網上好多人誤以Night of Memories 作英文名，但其實係Forgotten（當然電影韓文名稱意思就係「記憶之夜」），但要明白無論電影抑或係小說作品，甚至故事裏頭嘅主角名稱，我相信有心思嘅作者都會有意義隱含其中。 所以如果你睇完個結局都唔知點解部戲叫Forgotten， 咁樣，都冇乜問題，不用在意，忘記吧，繼續欣賞好戲。
Netflix 中文譯名應該係出自台灣，佢哋係差幾皮，如果我睇完之後，我可能譯其名為《亡忌》，秉承香港人鍾意玩食字嘅精神。🤪
再次感謝巴打介紹。