公開我的「400次咖啡」秘訣，超綿密一次就成功～

paul.play.forwa

最近紅遍網絡嘅「400次咖啡」，源自韓國綜藝節目之前到澳門一間茶餐廳取景時，偶然發現的招牌飲料。其實400次咖啡 (달고나커피) 就是焦糖奶蓋咖啡，要攪拌近400次，才能出現泡沫狀的奶蓋，因而命名。因為口感creamy，而且賣相療癒，用嚟打卡一流，仲要唔難整可以響屋企都輕易做到，所以火熱地人人都搶着去試，但又係咪個個都整得好飲整得靚？




首先我哋睇吓基本製作方法：
1. 將咖啡粉、糖及熱水以「1：1：1」的比例放到碗中完全溶合
2. 用攪拌棒攪拌400次，令空氣充分地打進咖啡混合物之中，打發直至成奶泡狀
3. 在空杯中加入牛奶及冰塊
4. 最後加上咖啡泡沫




基本上以上面嘅方法就可以做到，但有少少秘訣可能會整得更好，下面係我嘅小小心得：
1. 咖啡粉方便必須要選擇無奶成份嘅“齋啡”咖啡粉，即係響超級市場買嘅所謂“美式即溶咖啡粉"，因為只要有奶成份就好難攪拌出creamy的質感
2. 試過幾隻，最好效果嘅係越南製造嘅G7美式咖啡粉，容易出泡之餘味道都幾適合做奶凍咖啡，一盒唔使$20有15包，非常抵，惠康有售
3. 至於攪拌方便就梗係唔好自己用手攪啦，最簡單係用電動打蛋器，好過自己打到手軟又唔及電動打得均勻同埋creamy，因為力度問題電動的更能容易把空氣打入當中，效果比業餘嘅人手好得多
4. 用咗電動打蛋器效率會快好多，人手嘅可能要10幾分鐘，電動嘅可能二三分鐘就搞掂，總之你覺得啲泡呈現淺啡色又夠creamy就得喇
5. 另外我會把白砂糖改為咖啡用嘅啡糖，當然所謂“咖啡應該落乜嘢糖”其實一向有唔同嘅說法視乎大家嘅口味，但普遍來說亞洲人偏向落啡糖因為相對較少影響咖啡本身嘅味道，而且今次嘅組合鮮奶嘅份量好多，如果再加上白砂糖好容易會搶咗咖啡嘅味道，我今次選擇係好容易可以買到嘅太古啡糖
6. 我會建議用雪凍嘅鮮奶而盡量唔加冰，使到口感盡量保持creamy
7. 最後選擇一隻比較窄身杯口嘅杯，而奶與泡嘅份量盡量呈現七三比例，再加上突出少少嘅泡，影起相上嚟立即加分唔小，打卡都高分D啦

如果大家有咩意見歡迎下面交流吓吖～

alleelarry

手藝野係要花D時間，係好好玩，只可惜我太多野未做，就用最簡單既 Espresso 機就算

小寶老豆

抗疫期間... 留家玩樂...

terry1407

其實難唔難做？(利申，全無經驗)