想揾隻合併機夾ProAc 1sc，最終揾老麥（8#樓，一闊三大聽後感）

jan_ng2001

小弟用緊一套300B mono channel 前後級推挽膽機嚟推呢對ProAc 1sc，呢套老爺機玩咗10年有多，音樂感非常好，聲音甜美，但係略嫌大棚嘢場面細，依家想揾隻AB Class 合拼嚟推得好ProAc 1sc，將佢潛力發輝到盡（雖然慾望無限，金錢有限）初步推文睇到有幾隻都好似幾好，例如：Diablo120，Luxman 509x，老金E480，kinki studio ex-m1等等。全部都非常好評，但係唔知夾唔夾我對喇叭，又唔知夠唔夠力，又唔知會唔會嗱得太死。我聽嘅嘢都好雜，乜鬼嘢都聽，交響，人聲，室樂，古典，流行。所以都唔知點揀，師兄們可否給我一些意見，謝謝。

Hehatau

Pls check PM.

holelight

Quad ,性價比之選
中音密度厚實，大電流設計，相信會夾 proac 特性

小弟房用 TA Ann 用舊Quad 50e 就好正

jan_ng2001

前後試咗六隻Mark仔585，Moon 600i v2，細菠蘿120，金仔480，老麥7200，力士文509x，先講細菠蘿駁proac書架，嗌歌，好嘈，我聽咗一陣就覺得唔鍾意，未聽前，心裡已經有少少傾向貴豐，一心諗住咁多好評，聽完一定割喉放血就抬走，但係點聽都唔鍾意浸除，現場乜鬼嘢都播，最後聽完感覺聽咩都好嘈，我都唔係好接受呢個事實，最終失落地走，跟住走去聽金仔480駁sonus小座地，一開播女聲，好甜，好濕潤，好似上咗天堂，跟住繼續播男聲，結他等等，幾好，低音係有力，但係內斂有暗勁，中音動聽悅耳，但係同我之前聽Mark仔585又唔同，585有肉地啲，不過金仔都好聽，有音樂感，音場撐得好大有深度，深度多過細菠蘿，但係最後聽大棚嘢，就有少少亂亂地同少少少少腳軟，就係呢度搞到我未去到有即刻抬機走嘅衝動，跟住橫掂都係，試埋麥記7200啦，老實講，我從來冇諗過會睇麥記，因為諗住美國聲應該會粗聲，但係當一播啲歌（playlist同金仔一樣），我即刻要同麥記講對唔住，失覺晒，第一，唔粗聲，女聲冇金仔咁仙女feel，但係唔嚡，冇金仔咁濕潤，嗰吓我即刻覺得金仔份前級有料嚟，但係金仔多啲音染，跟住繼續攞老麥播，男聲，結他等等都好好，但係冇金仔咁深，咁闊，不過都非常工整，跟住去到大棚嘢，我就即時覺得佢贏金仔，件頭，件數，全部有形有相，低音亦唔係金仔咁內斂，亦唔係霸道，我覺得啱啱好，跟住再搭𨋢去試咗509x，有力，但係太清寡，好難投入，唔啱我，moon 600i v2，唔難聽，但係唔難忘，樣樣都工工整整，對得住個價，如果要排，我會咁排：
1. 老麥7200 播乜都三頻非常平均，唔慢聲，有力，有感染力，樣樣合乎水準，啱我呢啲雜食怪。最後我亦入咗呢部。
2. 金仔E480播歌仔係強項，音場，分析力，非常高水準，但偏內斂，但係一到大棚嘢就比播歌仔遜色，所以如果淨係播歌仔，室樂，基本上係不二之選。
3. Mark 仔 585，場面大，豪邁，中頻有肉，但略嫌唔夠亮麗
4. 力士文509x，大大力，冇音染，冇乜校聲，太清寡，冇乜音樂感，啱監聽，錄乜播乜
5. 月亮600i v2，以呢個價樣樣都合格，但未去到好高水平，但係唔係一試難忘或者就算依家特價都唔會有衝動即買嗰隻
6. 怪風細菠蘿120，真係唔啱我，同我當初諗嘅完全兩回事，原本已經好想買，但係真係落差太大，失望而回，有力，但係惡聲，嗌歌。
以上純粹個人聽感評價，全部都係我自己個人口味及偏好，未必啱其他師兄嘅口味，意見亦未必中肯。

xieling

jan_ng2001 發表於 2020-3-23 02:05
前後試咗六隻Mark仔585，Moon 600i v2，細菠蘿120，金仔480，老麥7200，力士文509x，先講細菠蘿駁proac書架 ...

謝謝師兄分享


我都係金仔用家， 你的意見 我某程度很同意( 我自己曾經用過貴豐120 麥記及金仔)

麥記本身 有輸出牛， 加上足火200w， 在力度上 畀金仔好力我同意。 金仔480我冇聽過 但係我曾經聽過470， 他所標榜 有180w， 但我唔覺他有呢個 瓦數， 我覺得佢 大約有150w到。 所以我覺得兩個 機種 ，力感上金仔會 輸少少。

jan_ng2001

Hehatau 發表於 2020-3-22 15:54
Pls check PM.

唔好意思，因為有一大輪嘢要搞，啱啱先set好個passthru玩AV bypass，跟住嚟緊要搞埋對Foundation腳，仲有部Lumin T2返緊貨，所以未有認真坐定定聽，我諗要遲多幾日先出到詳細報告，但係初步聽，背景好黑好靜，分析度俾我以前部300b膽機優勝，件頭數到，有立體感，比以前更有深度同立體感，有力量得嚟亦唔會勒死啲聲尾，無over damp。聲音特性初步聽係夾到ProAC 1sc，三頻平均，冇乜特別邊樣會標聲。其他再煲多幾日，settle好晒啲嘢，再俾報告。

Hehatau

jan_ng2001 發表於 2020-3-27 04:57
唔好意思，因為有一大輪嘢要搞，啱啱先set好個passthru玩AV bypass，跟住嚟緊要搞埋對Foundation腳，仲有 ...

唔該哂師兄，真羨慕仲有咁多玩具陸續有來，你的意見好具參考價值。

jan_ng2001

終於揾到老麥MA7200嚟夾對ProAc 1SC，由於老麥有得玩AV bypass ，所以就換走對座地，睇戲嘅時候直接用天龍8500 passthru去老麥7200推對ProAc 1SC做前置，聽2ch就直接用老麥7200嚟推ProAc 1SC聽歌，為咗ProAc 1SC有最佳表現，所以入咗對Foundation Designer II 腳等佢腳踏實地，跟住再入埋部Lumin T2，可以玩埋file，串流同Tidal MQA，跟住再入手
訊號線Gotham 11301 XLR同電源線Gotham 85015俾Lumin T2，跟住再入條AQ forest USB 3.0俾Lumin T2駁
Hard Disk播file

煲咗幾日，覺得人聲較前，有肉有感情有口水有尾音，低頻無高中頻咁出，高音唔標聲，分析力分離度夠，成個人企正喺前面唱歌，後面有樂器彈奏，有深度，有少少高低，背景好靜，無乜毛燥，就算tidal未去到MQA都收到貨，高低伸延一定好過我之前部300B膽機。暫時得咁多先，因為腳又未坐定，機又未夠熱身，線又未煲夠，全部嘢都未到100%工作狀態，嚟緊仲有兩條Sanwa CAT7線會到，所以遲啲再有報告要出，到時再分享吧！

rayyip@G

jan_ng2001 發表於 2020-4-3 00:39
終於揾到老麥MA7200嚟夾對ProAc 1SC，由於老麥有得玩AV bypass ，所以就換走對座地，睇戲嘅時候直接用天龍8 ...

買條靚小小既lan線係必需的

avsuperman

我一樣要食樹皮，嚟緊一闊三大，考慮老麥5300定金仔380