nowTV 4K 英超 睇唔睇得過！？

alleelarry

前言：
自從 LeTV 無錢找數，4K 英超隨之而壽終正寢；事隔多年既今季開始，nowTV 再度接手，4K 英超是真是偽就跟大家討論一下！

條件：
個人的 nowTV 合約就只有「星級體育」及 HBO 頻道，亦因為早年轉用網上行 1000M，免費享有 nowone，所有 4K 英超條件有齊；起初以為要加錢先睇到 4K 英超，但原來係唔洗！

∇ 網上 01 圖片，611 台有得睇 4K 英超


開波：
4K 英超基本上一星期會播兩場，大概係看戲碼而定去播邊場，頭兩星期唔係去左旅行，就係開波開得比較夜，老人家捱唔到太夜，只好睇重播！身為永不割蓆的曼聯粉絲，重溫就梗係睇曼聯主場對車路士！（相片係用 iPhone 8+ 影既，只是栽切，無執過相）

∇ 曼聯主場對車路士（4：0）


觀感：
本人現時用既 Sony Curved 4K TV 係無 HDR，睇到既畫面就只有 SDR，nowone 係接入去 Pioneer SC-LX901，訊源係 Dolby Digital EX 6.1 ch，Direct 模式下就輸出成 7.1.4 ch。

以往 nowTV 播放既英超，話就話 1080，但實際感覺只有 720，顏色偏淡，高速畫面明顯有格；或許受惠 4K 源頭，今季即使唔係 4K 版本，顏色鮮明同流暢度都有改善；重溫了兩場 4K 英超及收看一場直播，發現了一件有趣既事場，就是開始放映時，實際看到其實只有 1080，差唔多到中圈開波先至會係真正的 4K，中場休息又回到 1080，下半場開始就是 4K，完場重溫都係 1080。4K 畫面感覺良好，但又未至於佢地既廣告咁講，連條草都睇得一清二楚咁跨張，或許是流量比以往都多，耐唔耐會斷下聲，畫面窄一窄咁啦！（無法確認係 nowTV 還是本身既訊號來源既問題）

聲音方面就更加有趣，諗住有 2.0 已經好好，但竟然見到有  Dolby Digital EX 6.1 ch，係 7.1.4 ch 輸出下，隻隻喇叭都有聲出，前置喇叭明顯較其他大，包圍感係多過平時既 2.0，亦有D類似擴音機把 2.0 聲源，使用 Dolby Surround 差唔多既感覺。

之前見有朋友仔話熄左 nowone 之後再開，會出現跳回 1080i 既情況，自己都偶爾遇到；剛試左一星期都無再有呢個問題，方法就係開電視機之前要先開 nowone，唔睇時就先熄左 nowone，先至熄電視；或許佢有「保障機制」，一遇到溝通不足，就跳回最安全既解像度，即係 1080i！

∇  Pioneer SC-LX901 顯示來自 nowone 既訊源


簡結：
不完美，但可接受，要改善
一名愛英超港人

anan_andy

D色水唔知點解差到嘔
最後都係睇番621

alleelarry

anan_andy 發表於 2019-8-25 04:04
D色水唔知點解差到嘔
最後都係睇番621

1080 同 4K相比，後者顏色相對會淡少少，整體音量都細左，係無 HDR 上面表演，個人係接受既。另外，個人瑅解，電視調色方面，1080 同 4K 理論上要有不同，才可發揮各自的長處。

SonSon

anan_andy 發表於 2019-8-25 04:04
D色水唔知點解差到嘔
最後都係睇番621

如果熄燈睇會刺眼咗D......

alleelarry

SonSon 發表於 2019-8-26 10:09
如果熄燈睇會刺眼咗D......

所以個廳一早設計左有唔同光源既光管，開少少又得，全光又得

anakinowen7

點解做唔到場場都有4k呢？

alleelarry

anakinowen7 發表於 2019-8-27 10:27
點解做唔到場場都有4k呢？

呢個明顯係錢既問題，開場前、中場同完場要跳返 1080 的話，意味住資源用多左好多，慳得就慳，再加上睇波既又唔一定要 4K，身邊都有朋友唔太願花錢睇，求其有畫面就得

個人認為出年播放場數會有所增加，收費加唔加就要睇今年大家既取向

anakinowen7

alleelarry 發表於 2019-8-30 08:59
呢個明顯係錢既問題，開場前、中場同完場要跳返 1080 的話，意味住資源用多左好多，慳得就慳，再加上睇波 ...

但人係犯賤ge,睇過好ge就返唔到轉頭頭???

alleelarry

anakinowen7 發表於 2019-8-30 09:29
但人係犯賤ge,睇過好ge就返唔到轉頭頭???

呢個好可能係 nowTV 既策略，但有得睇 4K 我都唔多願意睇 1080

malikysl

睇左幾場4K ，感覺光暗度比佢既621 好D，但我係用2K 電視睇1080P/50的。