[定の影評] 《大黃蜂》(Bumblebee) 短評

阿定

說老實，《變形金剛》系列電影一集比一集爛，雖然作為PopCorn Movie，比錢入場睇都唔係太大問題，但比錢入場睇的衝動真係越來越低，原本今次聖誕檔期咁多大電影同卡通片上，《大黃蜂》於我來講，應該排係好後好後，買一送一的日子先會去睇，但外國媒體一致好評，加上好評的原因係故事同畫面都值得比高分的評價，所以決定昨天星期日放假去一轉沙田，花了三百蚊買了兩張MX4D戲院門票睇呢套大作！

先講故事，因為係前傳的關系，所以成個故事返去了1987年，一個人類科技仲未咁先進的美國，所有事都係發生係鄉村小鎮，小女孩同大黃蜂的相遇，故事有唔少時間都係講緊佢地一同生活的趣事，說老實話，睇得幾窩心的，橋唔怕舊，最緊要受，真係至理名言，唔少感動位雖然好老士，但真係感動到我，唔怪得今次外國評價咁高，甚至外國有人用E.T.來型容呢套《大黃蜂》。

咁除了故事，睇得《變形金剛》，無理由無打鬥場面，今次打鬥場面無以前咁大推頭，但反而更好睇，由一開始見到卡通年代的《變形金剛》造型，搞到個人勁興奮，差d開聲想講呢隻咪就係......個隻來，再到用番慢鏡睇佢地變型，唔似得最近呢一兩集，轉眼已經變好型，咩細節都睇唔到比，今集明顯比以前更用心機做Detail位，大部分時間都係1VS1打鬥，可以更易欣賞動作場面，所以整體來講更滿意，不過明顯睇得出製作成本比以前低，所以有D位係4K投影下，你會好易睇得出係Key上去的，作為特技電影就有少少不合格了，不過勝在夠爽快，加上劇情搭夠，仍然值得推薦。

今集兩個男角都係花瓶角色，所以說真的無咩好提啦，女角樣靚唔靚就睇Trailer你都見得到，唔評論，不過可以同大家講，以往的好身材好性感的女角一定唔會出現，雖然故事女主角係設定在18歲，但明顯係一個小朋友角色，作為一個劇情主導的電影，想睇性感美女的話，你不如睇番以前個幾套《變形金剛》的4K碟吧，呢套絕對唔適合你，加上故事好八十年代，就算有幾個女路人角色身材有番咁上下，但因為衫褲都好老士的關系，我保證你唔會願意去欣賞就是了。

以PopCorn Movie來計分的話，整體分數，故事我比到8分，特技比到7分，同期的《水行俠》我睇了IMAX 3D版，故事我比到6分，特技比到8分，如果對《變形金剛》真係有愛的話，絕對應該入場睇，因為今次終於唔再九唔搭八，似番套《變形金剛》啦！

最後，今次係我第一次睇MX4D電影，亦係沙田戲院開番後第一次入去睇戲，唔知係聖誕假期搞到沙田好多人，定平時周日都咁多人，商場迫到我睇完戲就決定走人，原本打算行個圈睇下野的心情都無埋，加上MX4D間影院原來唔係戲院入面，係商場三樓的另一邊，好彩我自己早到，否則一定遲入場，開場後頭十幾分鐘都不停有人入場，明顯就係指示不足的缺點，如果大家第日打算去沙田睇MX4D電影的話，一定要留意番呢點，不過MX4D的動感位真係幾有趣，成套戲好似去了主題樂園睇短劇咁，又會震又會閃光，有風有水有煙，比貴少少都真係幾值得一試，當然前提要係多特效的PopCorn Movie啦，我估除了今套《大黃蜂》外，《水行俠》都應該可以一試，有閒錢的話，絕對推薦！

Hugo Fok

今集《大黃蜂》將"少女心事"元素結合到老變系列招牌硬派打鬥... 文武戲均屬老橋段，但整體調度得當，且 Hailee Steinfeld 同眾配角做對手戲都有唔少火花...  追看性同娛樂性都唔錯... 今個聖誕其中一套必睇之作

灵鹫思梦

很不错，谢谢分享，收下了~~

cyber_look

睇到外國和香港的影評都讚好, 先決定入場睇, 我都同樓主師兄一樣, 今日係第一次沙田影院重開之後第一次去睇,

第一係想趁平日而又係自己假期去試下, 第二其實係搜尋很多九龍區戲院, 都不是把這套戲放在一院上, 畫面自然不夠大,

一院確實吸引.

margaux

Thanks for sharing!

Chubill

seem ok wor, will see later, thanks for your review

mike384

故事同人物(包括外星人)都較突出, 唔似得前作咁得一大班鐵人係度變變變打打打, 睇到眼花時會恰眼瞓, 呢套係我第一套冇瞓著的變型金剛.
不過啦, 雖然冇了性感美女係爭DD, 但整體上明顯進步了.
唔係有心想話佢, BAY導演真係只適合拍MTV, 變型金剛還好了, 套珍珠港真係眼火爆, 電影雖不是歷史, 但也不應該亂改, 塔倫天奴改完(希魔...)個個笑, 佢改完一大堆人嬲嬲.
講返大黃蜂, 成套戲四平八穩, 有笑有淚有動作, 收貨啦.

alleelarry

呢期病了，還好之前買的是明天(星期日)的飛……，點都好 IMAX 2D 好吸引下！

放鬆心情入場，唔知有無驚喜咁呢

jc2ssych

alleelarry 發表於 2019-1-5 22:47
呢期病了，還好之前買的是明天(星期日)的飛……，點都好 IMAX 2D 好吸引下！

放鬆心情入場，唔知有無驚喜 ...

一路支持開 isquare imax (其實最想去機場, 奈何time cost太高), 睇3D覺得個screen好大。今次難得唔洗硬食3D票價, 當然繼續imax。

但感覺怪怪地, 難得電影114分鐘全片1.85 : 1, 但睇睇下就覺得個screen都唔係太大。可能雙眼慣咗3D景深。

雖然文戲我訓咗兩轉, 但我認為無傷太雅。打鬥場面實在交足功課。值得入場一看!

alleelarry

jc2ssych 發表於 2019-1-8 10:19
一路支持開 isquare imax (其實最想去機場, 奈何time cost太高), 睇3D覺得個screen好大。今次難得唔洗硬 ...

全程 FULL SCREEN 的話，我假定佢為偽 IMAX 版，清晰度其實比一般還要低，比對上一次去機場睇 Ready Player One IMAX 2D 算好一點！

其實去機場睇十二點前的場次會比較平！