[少量劇透]《毒魔》︰咁都叫爛片？唔差喎…

粗人敵卡

呢套喺上映前後一個禮拜左右，爛蕃茄評分跌穿50%，大部分影評將呢套戲批評得一文不值，話比新神奇4俠更爛！當時小弟原本想睇都即時打退堂鼓。然而《毒魔》上映後，觀眾評價同影評家口碑係天與地的分別，有唔少觀眾話毒魔好睇，所以我自己都半信半疑咁入場睇吓。

故事講述Tom Hardy飾演嘅記者喺一次採訪得罪Riz Ahmed飾演嘅科學家兼奸角，導致之後名利雙失。之後同Riz Ahmed合作嘅女科學家發現Riz Ahmed進行非人道實驗，決定搵Tom Hardy爆料兼幫個記者潛入個實驗室。前半段劇情尚算流暢，解釋共生體來歷同埋Riz Ahmed奸角嘅理念。Tom Hardy得罪Riz Ahmed後落泊，慢慢鋪排佢點解答應女科學家潛入實驗室。但到咗Tom Hardy喺實驗室俾Venom上身後，劇情交待開始差咗。

Venom點解唔侵略地球？Venom同Tom Hardy嘅關係轉變拍得有啲怪同交待不清，佢哋地位幾時變到對等？演員Tom Hardy話套戲公映版剪咗差唔多四十分鐘，可能因為咁樣令到套戲後半段劇情太跳躍，令人睇到無所適從。另外一點係Tom Hardy嘅女友Michelle Williams演出有點尷尬，尤其係Tom Hardy初初俾Venom上身，佢要去餐廳搵Michelle Williams求救一幕。Michelle Williams的行為反應實在令小弟睇到有點出戲，套戲一有佢出場觀感極差，拖累埋Tom Hardy嘅演出。敝除Michelle Williams演出同後半段劇情推進過快，電影劇情唔算差，合格有餘。

動作戲要大概到Tom Hardy被Venom上身後先開始，Tom Hardy揸電單車逃亡一段戲拍得緊張刺激。Tom Hardy靠著Venom能力飛天遁地，只係後段咬爆追殺佢嘅散仔為咗PG 13評級，拍得遮遮掩掩有啲唔夠喉。最後火箭場Tom Hardy同Riz Ahmed大戰，特技打鬥拍得不過不失，但同之前飛車一段戲比較下，相形見絀。

總括而言，毒魔作為爆谷片算係合格有餘，唔太深究劇情呢套戲叫做睇得過。

mike384

睇左, 由於冇乜期望, 也冇乜失望.
難睇未至於, POP CORN叫合格, 故事擺明REBOOT兼洗白, 特技, 尤其係兩隻野打個D場面, 就真係有睇到我眼都花.

gashapon

我睇o左都覺得OK. 可能我自己一向唔會太理d影評家講咩, 自己想睇就會睇, 所以都無受佢地影響. 反而因為睇完電影而睇到有d報章/網站的影評, 感覺好似"收了錢而咁寫"而不是真的評論(否則佢地d分析能力都好差).

我自己一向都覺得"同一種食物, 唔同人吃完都有不同的感覺好正常", 電影都一樣, 一定有人睇完會唔喜歡, 如果簡單因為別人一句(仲要係唔知邊個)就信晒人, 我覺得咁做人太無膽了....

我自己覺得故事拍得有少少趕, 劇本好似唔太完整(可能是因為中間拍拍下有不少改動?) , 但整體上都OK, 當然如果無睇開漫畫就可能會悶. 等於我去睇twlight我都覺悶女士們可能會覺得好好睇 (記得當日Jacob一出場有人大叫"i love you" XD) 另外少少唔明d一開始應該有5樽symbiote, 但好似有一個撞完機之後就唔知去o左邊? (好似無o左件事咁) , 不過可能自己數錯都唔定.  

ps: 期待carnage出場~~

粗人敵卡

gashapon 發表於 2018-10-23 11:04
我睇o左都覺得OK. 可能我自己一向唔會太理d影評家講咩, 自己想睇就會睇, 所以都無受佢地影響. 反而因為睇完 ...

嗰隻走咗嘅symbiote

會唔會鋪之後carnage出場

gashapon

粗人敵卡 發表於 2018-10-24 13:52
嗰隻走咗嘅symbiote

會唔會鋪之後carnage出場

相信係, 因為最尾個"after credit scene" (監獄內, woody harrelson那段)都有暗示佢會變成carnage. ("When I get outta here, and I will, there's gonna be ... carnage," )