|
|
首先恭喜樓主進入毒海先~!! {:9_426:} 
對於每位初入毒海既朋友們, 小弟通常都會建議樓主諗一諗, 究竟係咪真係諗住入毒海, 喺一步一步享受美妙音樂既同時, 為咗一步一步更享受佢成長既滿足感而一步一步咁令荷包肝硬化; 定係想有一套普通人睇落好似"唔同啲", "有品味啲", 又滿足到目前既自己既器材? 
有啲人可能會覺得, 小弟咁問可能係有啲過份, 毒都未吸過就要諗日後要吸得幾深? 係咪痴線架? (的確曾經有師兄們PM或whatsapp咁鬧過小弟...) 但作為過來人, 小弟曾經見唔少師兄初時都話想入一套嘢就唔再upgrade, 但結果毒海就係一入豪門深似海, 結果因為本身套架生無upgrade既可能性, 就不斷咁賣不斷咁買不斷咁賣不斷咁買不斷咁賣不斷咁買不斷咁賣不斷咁買不斷咁賣不斷咁買....
小弟當初入毒海都係多得小瑟大王搞埋啲CAS活動, 加上高人kent poon既講解, 令小弟覺得以小弟當時銀根係無可能得到自己理想既聲音, 所以一早就決定一步步咁向住自己目標入器材, 先從自己心儀既喇叭入手, 慢慢再入DAC/後級/前級之類, 當然喺咁多年之間, 無錢入心儀既, 就先入一啲筆直許可而又比較容易賣出既器材, 到宜家雖然仲未可以話係好理想, 但享受中間成長既過程, 都叫做非常之enjoy~!! 
以上係第一條問題, 第二條問題就係: "究竟樓主鍾意咩聲?" 又或者深入啲講就係: "聽過幾多器材?" {:9_419:}
呢個又係會被人問候既問題, 有好多人會覺得小弟咁問, 係咪即係話未聽過百萬器材就唔比人買機先? 非也, 非也! 需知道音響界有N咁多種品牌, 每一種品牌每一種品牌甚至唔同年代都會唔同聲, 邊一隻器材肯定好聲啲小弟唔敢講, 但好肯定就係"沒有最好, 只有更好"...
試聽過唔同品牌產品配撘器材, 從中揀選自己覺得喜愛既聲音, 例如中頻人聲厚潤/樂器定位清晰/音場闊度/側重高頻或低頻之類, 咁就會更加容易去"夾"自己想要既器材~ 又或者有師兄會問, 點解我唔可以乜都有呢? 真心講, 我諗都無乜邊個品牌產品配撘器材夠膽話自己套架生係"乜都有乜都掂~"....
然後又係第三個問題, 究竟玩CAS, 仲玩唔玩CD? (當然小弟只討論合法比錢既途徑得嚟既音樂) 小弟自己會咁諗, 如果喺毒海既總投資只係2-3皮而又唔會諗upgrade, 玩CDP絕對係CP值較CAS高~ 原因係一部幾千至一皮既CDP+線材, 出嚟既效果絕對係可以好過用一皮去買"NAS+streamer+DAC+之間既線材+線牛+switch+...."; 但如果係想進入更高享受又鍾意upgrade, 玩CAS長期計係會得到更好~ 正如小弟宜家咁, 用nimitra(行roon)去白金鹿(農夫USB), 當然中間有好多補品, 但部wadia cdt已經無著過機好耐好耐咯, 而且用roon將自身既file同tidal完全結合, 真係連買碟都少咗好多好多....  |
評分
-
查看全部評分
|
[複製鏈接]
樓主
發表於 2018-6-24 23:33
其他我就無點聽過
