似足深水埗的日本夜冷市場~大井競馬場

takeishi · 發表於 2018-3-6 15:06

本帖最後由 takeishi 於 2018-3-6 21:50 編輯

大家去東京掃碟. 不外乎都係新宿, 渋谷、池袋呀呢D地方. 我貴司兄真係行到已經掉番轉都識路啦. 所以~係時候要發掘下D新地方搵下碟架啦. 好啦~今次就等我帶大家去D另類D既地方掃碟, 今次帶你去行下日本東京最大型既跳蚤市場, 真係似足深水埗的東京夜冷跳蚤市場. .
大井競馬場

大井競馬場~好易去. 就係去羽田機場果條~東京モノレール線. 「大井競馬場前」駅~徒歩3分鐘就到
沿途有著有很美麗的景色, 而且好近市區. 新宿過去都唔駛半個鍾.

晌個露天停車場入面. 非常之大. 成個維園. 可能大過維園呀.
官方數字係有600-800個灘檔. 但係重未計出而同四周擺賣的小販. 再加埋食市既灘檔. 可能接近一千個都有呀.
總之. 真係多到你都行唔晒. 我就用左3個鍾行,. 買左好多野. 兼且食埋野先至走. 由朝頭早9點半行到下午12點.

裡面真係咩野都有~disco ball , 舊既音響, 唱盤..........

唱片黑膠~就當然不在話下. 我計過, 最小有30-40檔係賣唱片架.
而且~價錢唔貴. 普遍都係3幾百円就有交易. 貴極都係5百円、不過就真係要俾D心機慢慢摷,
因為全部都係放晒一埋埋無分類. 你要慢慢搵, 但係~絕對會搵到好多好野架. ,

CD 全部100~5000任揀. 好多都重係新淨到死架.]
有D重要賣10円－50円昨, 我都不知掃左幾多幾拾円既碟呀.

最好笑~居然俾我搵到隻"林志美" , 真係無諗過去日本都買到中文碟架.
重要係200円。$15蚊港紙. 哈哈哈.

咩都有, 諗到既又有. 諗唔到既都有. 總之. 真係包羅萬有.,絕對令你有意想不到的驚喜.

當然唔小得既.......玩具. 公仔書. 模型車. tomica, diapet.......Match Box. 最岩我呢D又要平又要靚既窮L架啦.
入到去. 幾千円. 你會掃到幾大貨既戰利品. 如果去買新品. 我驚你幾千円都只係夠你買一件兩件昨.

還有四周圍都有D小販車, 佢地有D直頭成車貨櫃咁樣車過黎.
如果計埋呢D小販車呀. 可能成個跳蚤市場真係有過千檔擺出黎架.

行到肚餓呀. 無問題. 有好多熟食檔俾你坐晌度慢慢醫飽個肚再行過, 買埋送都得呀真係.

大井競馬場~以下係官方的資料同埋Website, 大家可以click入去睇下

https://trx.jp/hallDetail.xhtml?hallId=1

開催時間 09:00 ～ 15:00 , 住所東京都品川区勝島2-1-2
出店数 600-800店  , 入場料無料
開催場所 ≪大井競馬場【第一駐車場】にて開催≫
屋内・屋外屋外雨天時小雨決行
交通【電車】:  京急線「立会川」駅徒歩10分
東京モノレール「大井競馬場前」駅徒歩3分

睇下我個Friend搵到隻咩野. 開心到佢懶屎呀. 100円俾佢執到隻鄧麗君既細碟. 雖然呢度唔係好值錢. 不過搵到佢都好利害架啦.

下次大家去日本~東京. 又多個浦點可以去下啦. 就係........大井競馬場
記住. 係全日本最大型既跳蚤市場. 只係開星期日9點至3點既姐. 大家唔好錯過啦.

Msuper · 發表於 2018-3-7 20:47

我相信蘿蔔國地灘乾淨過深水埗多多聲，我有理由相信深水埗部份地灘的碟來自用家棄掉於垃圾桶裡面！
貴師兄，其實日本自己有無生產 CD盒的 (有顏色底托如傳統黑色底托那種) ? 甚至有紅色/綠色/金色/紫色/藍色/七彩的靚靚底托CD盒賣呢 ?
我針對蘿蔔國生產不是指阿爺生產那種！謝謝回覆！

ernietse · 發表於 2018-3-7 22:16

Msuper 發表於 2018-3-7 20:47
我相信蘿蔔國地灘乾淨過深水埗多多聲，我有理由相信深水埗部份地灘的碟來自用家棄掉於垃圾桶裡面！
貴師兄 ...

most of CD jewel box (including those colorful box) sold in Japan are China-made!

just this brand NAGAOKA has Japan made basic color (Black, white and transparent) CD box