兄弟の對決 の Onkyo PD-S10 vs. Onkyo DP-S1

Zin

加入以來當 CD-ROM 已經有一段日子，從來無諗過自己會分享一篇 兄弟の對決，又或者大家成日講嘅 AB 比較。好坦白講，我呢D窮鬼點會買 2部咁似嘅 DAP，只好怪自己無手尾+大頭蝦。

一直用緊 DP-S1 嘅我相安無事，直至某日同朋友食完飯，開車後就唔見咗 DP-S1，我一直知自己大頭蝦，心諗等佢去玩夠就應該會浦頭。點知過咗成個禮拜出街無歌聽，開車無歌聽，去做運動都無歌聽嘅時候，今次大鑊鳥… 真係唔見鬼咗部機。一步入 2018年就要破財，唔通連個天都唔鍾意我！！！

死死地氣出去睇下 DAP啦，試黎試去都喺買返 Onkyo，不過就帶咗新D嘅 PD-S10 返屋企，日本人就叫佢做 DP-S1A。好開心又有新玩具用嘅時候，我想大家都估到將會發生咩事，無錯… 你無估錯… 我無打錯…，DP-S1 死返出黎。喺邊到死出黎就唔多講，只好含淚咁望住 2部機同自己講：「都叫你搵清楚D啦！」

既然 2部機在手，做AB比較係好正常嘅事，不過 DP-S1 話晒用咗都半年有多，對新加入嘅 PD-S10 喺有D唔公平，點都好先黎一個 24 X7 嘅「煲機」做哂熱身先…，如是者過了一星期！Come On！

外表の對決
左邊嘅喺哥哥 DP-S1，右邊嘅自然喺 PD-S10（往後嘅圖片都會喺跟咁嘅左右表示）
# PD-S10 芒上面嘅絲印無左，所以保護貼可以貼得服D咁話嘞


# PD-S10 背面由磨砂改成斜紋，相比 DP-S1 無咁抗污及防花，落地無耐就沾滿指紋及花花地（相片影得麻麻地，未必睇到我講咁嘅）


# 兩兄弟嘅側面幾乎一致，沒有兩樣，分別喺佢地嘅耳機插頭位，明顯改用了新元件，相對係「實淨」；還有音量鈕都變得「緊」D，放入袋時無咁易轉到佢




# 包裝盒都略有分別，DP-S1 喺有個蓋，囉出機可以回到原位，反而 PD-S10 換成了摺疊式，開封後竟然無法返回原位，對於收藏就會有D麻煩


內涵の對決
明顯我喺唔識點拆開佢地嚟PK啦！網絡世界咁方便，不過我都喺鍾意扮下日本仔睇日文咁姐……，PD-S10所用嘅「大容量型導電性聚合物片式電容器」喺之前嘅兩倍，減少咗電源噪聲帶嚟嘅影響，實現咗清潔穩定嘅供電，即使喺 Wi-Fi 同藍牙等無線操作當中所產生的高頻下，甚至喺高溫情況下，也可以確保證穩定的「静電容量」。電池屏蔽層也比之前嘅厚三倍！實情喺唔喺日本人講到咁狠勁！？喺鋪頭試個陣因為手上無用（以為無，其實喺有嘅）DP-S1 做比較，初聽感喺黑D嘅，所以咪買囉！無得比的話，新兄弟一定好D咁話啦！真唔真睇埋落去啦（^_^）


兄弟の對決
# 同一手機連上兩兄弟，一D問題都無，但說好了嘅 PD-S10 去咗邊？只喺搵到 DP-S1A（明顯喺來自同一條生產線，改個名出口到唔同嘅地方啦，據了解行貨先至有港人愛用嘅 Tidal）


# 既然要決戰，就梗係要公平D，起用同一張歌單，自己 CAS 專用 NAS 入面隨手揀左 13只歌，咁橋已經包含了廣東、國語、英文、男聲同女聲，今時今日聽 Hi-Res，CD-Rip 唔多夠，24bit/192kHz 都爭咁D，一於全部使用 DSD 檔，加上播歌時 DAP 可調整部份都會少咗，如是者就是公平，公開，公正！題外話，歌都喺舊嘅好聽D，唔要口水歌，我要聽原唱，YEAH！PK 大法係由兄（DP-S1）聽第一首歌，之後由弟（PD-S10）接力聽第一同第二首，如此輪換 DAP咁聽，邊聽邊把音感記錄低；有D類似網球嘅 Tie Break，目的在於把任何客觀因素排除。


歌曲一律儲存喺 16GB內存（避免 SD卡質素差異），兄弟均使用相同設定：
Balance: ACG （AudioFly AF160）
Digital Filter: SHARP
Gain: High
Volume: 45（最大為 60）

音壓：PD-S10 稍大（要不是AB比較，跟本察覺唔到^_!）
音場：不算得闊，兩兄弟也差別不大
細緻：兩兄弟差別不大
高音：PD-S10 較優（林憶蓮嘅「燒」相對正好多，高音去得夠盡）
中音：PD-S10 略優（梅艷芳嘅「壞女孩」，當年華星錄音唔算得好，但當中喺 DP-S1 聽到嘅「不是」，反而喺 PD-S10 得到一點點修飾
低頻：PD-S10 完勝（Spandau Ballet 嘅「Gold」，鼓聲夠哂實淨；林憶蓮嘅「燒」一開聲已經好唔同）

PD-S10 表面小改，但機內改動明顯針對了前作的不是而來；既然分出了高下，跟身嘅自然會係弟弟（PD-S10），而兄長暫時無打算放到二手市場，因為佢（DP-S1）天生有 Line-Out，放係車入面以 Aux-In，以補足天生連 Flac 都播唔到既 CD Player，從此可以播到高至 DSD 5.6嘅歌，再唔需要為每只碟保留多個格式，為遲早會飽嘅 NAS 作好準備（^_^）

翻外篇：X-DAP Link
之前用 DP-S1 時已經發現佢唔可以好似韓國機同國磚，只要資料夾入面有幅圖片，即使歌曲檔本身無封面圖，都可以默認成封面；聽歌無封面睇其實堅無味，後來發現這個 Onkyo 研發軟件，既免費又不太難用，加封面再唔係難事了！

eric_explorer

Support 用心報告

ichk

多謝師兄,用心報告,

Dick0810

x-dap link 點樣加封面架? FILE 用左WAV, 無封面, 有點不爽

Zin

Dick0810 發表於 2018-2-10 16:56
x-dap link 點樣加封面架? FILE 用左WAV, 無封面, 有點不爽

Wav 檔格式不容許加入封面，但仍可加入一些基本資料，如歌名、歌手及年份。國磗及韓系主動找圖片當封面嘅做法，明顯是針對這而設！

Mingming19688

請敎師兄,我部bdps1你水貨,我揾朋友下載dsd檔得1bit聽渗超 難聽請問機內調敎至出到24bit以上格或,麻煩師兄 解答！

Zin

Mingming19688 發表於 2018-2-14 07:11
請敎師兄,我部bdps1你水貨,我揾朋友下載dsd檔得1bit聽渗超 難聽請問機內調敎至出到24bit以上格或,麻煩師兄  ...

個人理解喺咁，DSD的1-bit跟 24bit/192kHz 是有所分別，不應混為一談！再者當播放 DSD 檔時，一般 DAP 可設定部分減少，換句話說可調整的就不多。更重要嘅喺 DSD 格式並不代表好聽過 CDRip，重點在於錄音來源，又或者後期 mastering。好多前輩有教：聽歌不要聽格式。

Mingming19688

Zin師兄,謝謝你詳細解答！

Mingming19688

Zin師兄,可否代入D歌落張sd咭入面,因本人不懂入歌,我喜歡D歌都是80年代中文歌,如陳百強,林子祥,張國榮,譚詠麟等等？我見你入左D歌都好正！

Zin

Mingming19688 發表於 2018-2-21 13:26
Zin師兄,可否代入D歌落張sd咭入面,因本人不懂入歌,我喜歡D歌都是80年代中文歌,如陳百強,林子祥,張國榮,譚詠 ...

有番咁上下年紀，喺聽舊歌㗎啦！