遲嚟嘅“追捕”，放棄吧！

lukalok

咁啱喺HBO重播FACE/OFF，令我想起一套睇得好唔愉快嘅“追捕”。吳宇森兩年冇新戲，之前“太平輪”真係太輪悶，一返嚟就回歸雙雄動作片，滿心本來歡喜，但睇完“追捕”之後真係七不像，究竟發生乜嘢事？

有份編劇嘅陳嘉上同阮世生做咗啲乜，點解畀咗個咁嘅劇本出嚟。故事其實又唔係真複雜，但唔係吳宇森善長做到嘅題材，由中、日、韓再加吳導個女，每個人唔係用母語做戲嘅時候又交唔到戲。最嚴重嘅係，之前吳宇森喺荷里活拍FACE/OFF時出名只要演員一take，重要係第一take，話係最直接嘅感覺。如果係就出事，因為咁大量場面係重新配音，即係之前係現場收音，但收音收得唔好，而配音後效果又差，相當唔專業咁！

張涵予係律師，唔似都算又唔交待清楚點解咁好身手，佢就完全係似犯多過畀人嫁禍，實在難睇！福山雅治好用力講好英文，太用力，好硬，完全唔自然。

簽名式動作場面方面，白鴿就唔使問一定有，重要直接係白鴿屋拍，但已經改為大量CG白鴿，冇哂實感！另有一場水上電單車追逐，本來開得算OK，拍主角演員大頭本來係必要，但睇返“FACE/OFF”之後，荷里活十幾年前嘅製作水準同要求真係畀依家高好多，同做得專業好多倍，總之就好似走精面咁，前後期做得唔好，就令到我覺得“追捕”拍得好流咁！

去到ending 大戰熟口熟面，同高峰時港產片所搭嘅景拍高潮大形鎗戰差無幾，再用CG加速度，激光鎗咁，其實係幾冇新意。好似睇返舊戲電影台咁，情懷分都失埋！

“追捕”真係睇到好冇癮，所以好多人睇覺得吳宇森回塘！放棄呢齣電影，保留吳導喺大家心中嘅好印像啦！

alleelarry

完全講中了當日睇完之後，出場想講既野……

cdma

吳宇森想拍得張涵予好有型, 但完全型唔起.  拍動作時, 鏡頭 zoom 得太近人, 唔好睇. 吳導個女係套戲入面, 無吸引力, 換個靚女效果會好好多.
同意C hing 所講福山, 講英文時好唔自然, 表情好多, 但講日文時表情就好正常日本人面部無乜表情.

Hon

仲吳宇森... 算把LA...

小瑟

估唔到大導依家攪成咁喎。

mike384

其實晚節不保係好多有成就的人的下場, 黑澤明以前拍娛樂片好地地, 但去到彩色後越黎越唔知點咁, 所以作品好米去馬, 唔好米由佢.
十零年前有套劍雨, 雖然唔係掛吳大導個名(佢係監製), 但入面都睇到唔少佢的影子. 整體算係唔錯的作品, 再早就要去到FACE OFF了, 吳導演拍的時裝劇向來太過浪漫, 甚至有D抽離, 但香港拍個D大部份都叫做好睇(英雄,喋血雙雄或辣手都好), 而今次拍外景, 又搵大量外國人, 搞到唔湯唔水其實又唔算好出奇.

choymay

和廿幾年前，夏理遜福做嗰套，亡命天涯，差不多一模一樣嘅劇情,同樣都係講一啲新硏發藥物。只是醫生變律師,同樣被假禍。

bigair

吳大導超越唔到自己

mike384

bigair 發表於 2018-6-8 19:21
吳大導超越唔到自己

多好大導都係越拍越回塘...呢幾年令我有驚喜的, 是MAD MAX4個位, 佢真心利害, 為了錢拍了多套兒童片後, 一拍返自己心頭好就咁勁!!

bigair

mike384 發表於 2018-6-9 10:40
多好大導都係越拍越回塘...呢幾年令我有驚喜的, 是MAD MAX4個位, 佢真心利害, 為了錢拍了多套兒童片後,  ...

能夠拍到多元化先係勁，如果只拍一種風格，幾勁都會厭