[劇透]《雷神奇俠3：諸神黃昏》︰喜出望外？

粗人敵卡

之前雷神第一集上映我無入戲院睇過，第二集亦係因為口碑普普又無去戲院睇，所以今次睇第三集小弟係差唔多無打雷神前兩集底去睇嘅。未入場睇之前仲以為爛蕃茄網98% fresh純粹係一班影評家格硬吹捧出嚟，睇完就無我想像中咁差…

導演Taika Waititi對小弟嚟講係陌生嘅，佢套What We Do in the Shadows(低俗殭屍玩出征)小弟仲未睇，不過聽聞口碑唔錯。今次雷神因為個導演關係，風格由前兩集嚴肅變成輕鬆惹笑。故事就係Thor想阻止諸神的黃昏，輾轉間見到Thor家姐Hela出現。Hela因為Odin壽終正寢，突襲Thor同Loki兩人準備殺進聖域界，打算稱霸全宇宙。就咁睇呢個故事大鋼就可能令人覺得又玩大義滅親嘅慘情嘢，但係套戲到第一次Thor兩人見到Hela再打完後，意外去到殺加星，劇情開始有趣起嚟。

開頭套戲就率先有笑料，就係Thor返番聖域界見到Odin(Loki假扮)安排嘅話劇，係講番雷神第二集劇情。令小弟驚喜嘅係Matt Damon客串做開頭戲中戲嘅Loki，Thor見到嘅反應加上Matt Damon演釋充滿幽默感。之後電影夾雜著不少笑料，Tessa Thompson飾演嘅Valkyrie第一次出場飲酒又仆倒，Thor見到Stan lee要剪佢長髮嘅驚情表情，再到Loki見到Thor俾Hulk蹂躪嘅興奮樣子，唔會令套戲沉悶同埋令劇情生色不少。另外Loki喺呢套戲完全變咗丑角，電影到Thor帶Hulk同Valkyrie逃回聖域界，Loki又一次出賣Thor但俾Thor識穿，仲有Loki俾Thor等人用嘢擲佢無數次，無哂復仇者第一集梟雄形象。還有Thor同Hulk喺Thor 3變咗一對歡喜冤家，第一次打完喺間房互相鬥氣，仲有Hulk變番正常人類Banner Thor喺度講口號令Banner不再失控變番Hulk等細節令電影添上一種趣味。

CG同打鬥場面算精彩，Thor同Hulk喺打鬥場比賽打得精彩。再之後Thor帶同Valkyrie，Hulk逃離殺加星有場飛機空戰刺激緊張。到電影最後Thor、Loki等人同Hela與佢哋班戰士最後決戰，刀光劍形睇到令人血脈沸騰，遺憾係Hela輸嘅原因係Thor班人使橫手(笑)。套戲所謂諸神的黃昏直頭無沉重氣氛，中段觀眾好似去咗嘉年華咁款，而Thor最後靠「出術」解決咗Hela但同時引發諸神的黃昏相當諷刺同黑色幽默。有個小驚喜係引發諸神的黃昏係同電影頭十至十五分鐘出現嘅偽boos Surtur，到電影後期又出場完咗個伏筆。不過Cate Blanchett飾演嘅Hela又係面譜化奸角，除咗佢去神殿望著油畫發怒之外，無乜發揮。反而Thor個角色無咗復仇者第一二集嘅刻板，做得幾好笑。

總括而言，《雷神奇俠3：諸神黃昏》好笑又有得睇打，想入場輕鬆一番實在不能錯過。

edlsang

講到雷神盲左隻眼。其實marvel 原著係咪有描述雷神变左單眼佬㗎！

粗人敵卡

edlsang 發表於 2017-10-28 16:55
講到雷神盲左隻眼。其實marvel 原著係咪有描述雷神变左單眼佬㗎！

無睇漫畫唔知

alleelarry

第一集唔知點解無咩興趣入場，睇藍光又感覺唔錯，到第二集又無預期中咁好，今集唔用搥改用雷射槍，格格不入……

cinemaquette

多謝師兄詳細報告……必者

粗人敵卡

alleelarry 發表於 2017-10-28 23:27
第一集唔知點解無咩興趣入場，睇藍光又感覺唔錯，到第二集又無預期中咁好，今集唔用搥改用雷射槍，格格不入 ...

其實我覺得開頭Hela整爛Thor個槌係搵戲嚟做

ltho3k

睇左, 我又覺得ok wo...好睇過第ㄧ同二, 不過我睇2D.

alleelarry

粗人敵卡 發表於 2017-10-29 07:00
其實我覺得開頭Hela整爛Thor個槌係搵戲嚟做

槌係最強的，何以……

mike384

爛鎚同入鬥獸場呢條橋, 係好多英雄片都常用的[失去權勢(或象徵), 英雄落難]橋段, MARVEL電影中, 如IRONMAN3入面TONY套甲失靈(同TRAVIS失聯), 冇電跌落鄉鎮的安排.
而個人覺得亦有D似GLADIATOR的麥斯母將軍咁, 不過呢套明顯走輕鬆搞笑路線,整體表現叫不過不失, 但開頭都係悶左D.
加上一到緊張位就搵阿LOKI或HULK出黎搞下笑, 搞到整套片冇乜高潮位.
另外, 係戰女神圍攻HELA個場, 居然冇用WAGNER個首, 有點兒失望.
個人三套雷神都係麻麻, 其中以1最為差勁, 好好的PORTMAN都畀佢浪費了.

gashapon

我有睇1同2, 不過我之前都有講過, 以marvel電影來說, 雷神系列真係比較一般. 今集我覺得似睇緊Guardians of the Galaxy多d. 雖然劇情上比較輕鬆搞笑, 但某程度又令到d角色好"低能"咁...我自己就真係唔太喜歡呢種style. (即係電影有新的都會去睇, 不過睇完就算唔會買碟或再睇多次etc)
我覺得爛鎚同鬥獸場係參考了漫畫 (Thor變得unworthy 而唔起個鎚, 鬥獸場參考了"planet hulk"故事)
grand master最後(after credit 2) 又化身獎門人大叫"大家都咁叻, 一於打和啦SUPER~~第一個after credit我估係thanos 架飛船?