不專業的冷門包膠~「軌跡球」

ilavbnm

已經有一段時間無上嚟76...電腦區更好少嚟...因為我係電腦白痴...
我之前對於使用電腦上遇到多少障礙(滑鼠手)
所以...出現左以下一篇"包膠"
軌跡球哩樣野唔係咩新事物...甚至舊到接近淘汰邊緣
只有甚少品牌仲有生產...所以款式唔多
今次我就搵左3款價錢比較平民化嘅嚟試用
雖然話係試用...但係...其實每個都係我用真金白銀買架...






Logitech($169)

外形比較獨特...但係放隻手上去...並無任何唔舒服感覺
由於左右鍵較大...位置亦較後...所以使用上都好就手
至於個波波(軌跡球)操控上...阻力唔太高...手感幾暢順
反應算快...而且準確度都幾好
優點:價錢合理...新手操作都唔算難...軌跡球入門嘅好選擇
缺點:無滾輪...使用上比較不便(如果有滾輪...我會全力推薦)

Kensington($399)

外形應該係大家最容易接受嘅一款(而且附設手腕墊)
放隻手上去...舒適程度感覺上較高
同時有埋滾輪(軌跡球外...灰色圓環就係滾輪)
表面睇...應該就係3個之中最好
可惜左右鍵設計得太前...使用上比較唔就手
手指公要伸到直先可以剛好按到左鍵...長期操作...會對手指公組肌肉做成負擔
對於男性或者手掌比較大嘅人...使用上真係比較難(扣好多分)
至於個波波...無論"阻力/手感/反應/準確度"都同Logitech相近
或者...可以話Kensington會高分少少...但係分別只算輕微
優點:設計比較全面...就到手位的話...絕對係一個好選擇
缺點:價錢相對較高...一定要符合到手形大小先可以正確與方便使用

雙飛燕(淘寶:人仔$88《匯率+郵費請自行計算》)


外形與做工...的確係3款之中最差
不過...結果竟然係佢最符合我嘅手位
好似兩隻翼嘅左右鍵...放隻手落去...位置竟然啱啱好
又有滾輪...睇落應該掂啦
點知一用落...個波波好緊下喎...游標移動得好慢...移動幅度好少
拆個波波出嚟一睇...原來唔係光學定位
竟然仲係用兩個軸輪定位嘅舊式設計
唔怪得個波波會咁緊...手感亦比較差
終於要入去滑鼠設定度...將游標速度教到最快先可以接受
兩個滾輪...原本話...一個負責頁面上下滾動...一個負責頁面左右滾動
結果...兩個都只可以頁面上下滾動
最有趣嘅係...右面個滾輪係正常上下滾動
左面個滾輪係上下相反...滾輪向上滾動...頁面就向下滾動(反之亦然)
優點:價錢算平...功能算齊+就手...想嘗試一下咩叫軌跡球...可以買嚟玩下
缺點:做工/手感較差...操作較慢...樣樣野都感覺差少少

以上3款軌跡球...我都只係plug & play
因為全部都無程式跟...需要自行上網搵 & DL
而我對滑鼠功能又無咩特別要求(唔打機...主要做下文書+上網)
所以我並無刻意去為每一款尋找/安裝相對嘅程式
如果為每一款安裝左相對嘅程式...結果如何...我就話唔到比大家知
哩個包膠的確唔全面...極其量只可以比大家初步了解一下功能與操作
因為...就唔就手...絕對只有自己先知
所以...如果大家好似我咁...有需要用軌跡球的話
要有心理準備...未必一次就搵到完全符合自己需要的軌跡球(價錢高低/就手與否更完全無關)
對我嚟講...雙飛燕最就手...所以只好暫時用住個雙飛燕先
但係操作上...滿意度依然偏低...Logitech就充當後備
如果搵到更合適嘅軌跡球...我一定會再換
Kensington...真係唔啱我手位...已經比左人
至於市面上有D用手指公操作嘅軌跡球
雖然我未用過...但係依照操作方式嚟睇
我擔心會對手指公組肌肉負擔太大
長期使用...恐怕有機會得到肌腱炎...所以我唔打算試哩種軌跡球
最後希望大家可以健康使用電腦...記得適時要比隻手休息下呀...

cat35a

猫戏老鼠报告. very good

ctmk

篇幅太長, 要扣分