[定の影評] 《變形金剛 : 終極戰士》速評

阿定

話說早前睇過電影公司安排的 IMAX Demo，聽過導演講解今集係用到兩部 IMAX 機來拍攝 IMAX 3D效果，所以就買了iSquare IMAX的場次睇啦，但買飛買得遲，位置有少少靠前同偏左，有少少失望。

講番套戲，故事照舊唔知佢想講咩，硬生生作個故事出來，結局完全係亂來，如果大家認為睇變形金剛的重點係睇故事的話，大家可以放心，呢套戲完全唔適合你，至於植入式廣告方面，今次無上套咁過火，可能上次太劣評了吧，今次仍會有少量中國廣告，但已經比之前順眼，當然如果你連一個中文字係套戲到出現0.1秒都接受唔到的話，你又可以慳番啦。

咁我個人來講，睇變形金剛當然係為睇大製作場面啦，套戲又真係接近由頭打到尾啊，3D比以往都來得順眼，可能兩部IMAX機拍出來吧，又真係幾吸引的，有古時的人類攻防戰，有飛天翼龍噴火，有飛車，有無人機係室內飛來飛去的槍戰，基本上求其抽五分鐘都係試機天碟，你想試咩情境，呢套戲都有齊，搞試聽會帶一隻碟就可以了，而無打鬥場面時，亦有大量笑料，甚至最後解決件事的方法我都唔知佢係咪有心搞笑，我直情好似聽到戲院有人講，唔係下化，真係只要你唔理戲本九唔搭八的話，全場係100%無悶場的。

最後，如果因為上一集太爛，你唔想入場，我可以話你知，今集OK的，如果目的係睇動作場面，比錢入場睇吧，咁當然，你硬要同第一集比，咁就無話可說，等明珠台播吧

alleelarry

老實講，上一集講到咁爛，所以無入場睇，到睇碟又唔係咁差，植入式廣告向來唔係一個問題，當年《回到未來》都唔少啦，只不過見到中國字就即刻帶眼鏡，的確好唔公平架！至於今集，已經買飛入場睇，無預期有好故事，只期望有好既視覺效果就可以了！但又有人話打係好睇，但睇到眼花花，呢點又好奇怪勒，第一集都係咁架啦，睇 3D當然又會再花D，唔係常識黎既咩！

hgc021321

2D 好似無全景聲?

:o)

無話公唔公平既，觀感問題，點解會有咁多人接受唔到，大家心裡都有答案

lamwaikit007

正噃。我最鍾意看一切唔合常理的電影。

freestylemen

真心佩服佢咁9588都做得出，仲要做足4集（唔計首集，雖然有些情節莫名其妙）今次決意不入場，留名支持ching對各樣的分析，或許喜歡得淡笑的會支持本片，台灣就是有這類影評，竟然讚～

countryboyhk

上集當係支持香港, 不過攪到福昌樓變左旅行團景點 今集堅決不入場, 場面設計到幾刺激都好, 唔想再睇住一堆爛鐵打餐死.

mdo

Transformer系列中國內地已成為第一票倉，內地公司亦有份投資，出現植入廣告不足為奇，商業世界一切向錢看。今集全球首影不在歐美，而是在廣州。現在內地票房動隨時十億八億，還未計衍生商品之收入，做电影投資的沒有選擇。這個回報率是高得出奇。中國這個電影市場很奇怪⋯⋯個人覺得，很多在美國本土市場大賣之電影，在中國卻PK. 相反很多在美國本土PK的，郤在中國大賣。今年令我最嘆為觀止的是生化6，在內地竟然破十億。Star Wars7全球勁收廿幾億美金，在中國卻水土不服。

onon4359

完全係為左一句「破天荒98%IMAX鏡頭」而入場觀看！但見網上一片負評下之下真係有少少驚，吖！又冇人講得貢差喎，唔係話我品味與別不同呀嗱！

onon4359

而係佢地只係用錯角度去欣賞姐！變形金剛不嬲係一套兒童向嘅品種，劇情就不能要求過高吧？我認為聲畫質素、視覺效果均為上乘之作，仲有新車登場呢！可惜只係買不到IMAX既飛，不過我發覺冇98%咁多，約六七成吧？但已經係有史以來最長！不過我睇果場去到一半又冇左3D,又係得我一條友發現走去同職員「投訴」之後先有番3D,原來D觀眾係咁容易呃，俾左3D價錢係仍然可以帶住3D眼鏡睇2D架，吹脹！