20世紀少年-最終章-我們的旗幟.... J J 小評 (含內容)

lkljason · 發表於 2009-12-7 10:02

如果想睇到更多76師兄嘅分享，快啲登入成為會員啦！

您需要登入收看或下載更多內容。還未成為會員？成為會員

x

本帖最後由 lkljason 於 2009-12-7 11:25 編輯

終於黎到最後一集，講真睇完第一章時好想快d睇第二章，但到呢集反而追看性真係無第一集咁強，可能攤得太耐已經攤凍晒啦，加上呢集既回憶敘述都唔小，所以初段真係有點兒悶場。

可能我已經知道邊個係"朋友" (註：我係無睇漫畫版，知道既原因係互聯網既流傳)，所以唔會有好大既神秘感估究竟誰是兇手，反而呢套戲比到我既係童年既回憶，係同學仔之間點樣溝通既回憶。睇完成故仔比到我既感覺就係"朋友"原來只係一個童年被老屈兼無朋友既自憋仔，感覺上好鬼死兒戲，成套戲最慘就係咖南，係咁被老豆同老母玩。同埋如果最後"朋友"唔係自動波行出黎，我覺得都無人可以殺到佢，所以都係覺得裸戲黎做。

總結：我個人就覺得個結尾有點兒反高潮，男主角呢集除左比較氣定神閒同比到d人精神食糧外(歌聲) ，真係感覺唔到佢係救世主，佢既道歉其實最後"朋友"臨死前好似都唔多願接受，反而萬丈目打低佢至搞掂件事，佢好似反而仲有d建樹播！無睇開既朋友我見議可以慳返。預算成個系列一戲呵斥成黎睇既朋友，建議先睇漫畫版後至睇佢可能會好d (網上面d人討論都係咁建議)。而我因為已經睇完晒套戲，真係再無心情重溫套漫畫，就係呢度劃個句號就算了。

lkljason · 發表於 2009-12-7 11:22

小弟之前既小評，等大家可以一戲呵成咁睇！

20世紀少年

岩岩睇完，我從無接觸過呢套漫畫，不過睇前都做過小小research知係漫畫改篇既電影，仲知會係分三步曲拍成電影，之前亦都有朋友講過如果未睇過漫畫睇呢套戲可能會有點兒混亂，事實套戲出場既人物真係幾多o下，所以小弟都要打醒十二分精神黎睇怕miss野，好彩睇完後都覺得ok無乜悶場 (包括我老細都係咁講)，不同時代交錯敘述亦算清晰，唯一係坐到pat pat有d痛姐 (2個幾鐘呀大佬，再坐耐d生骨刺都有知呀~~~~~~~一笑XD XD XD )，呢套戲出場既明星真係好多，如果你睇慣日劇或者日本電影，肯定會覺得個個都熟口熟面。下集上畫時我都會預算繼續追埋佢，希望唔會虎頭蛇尾啦，09年1月30號就有勒，而第三集就要到09年秋至有！

總結：比我想像中好睇，睇d forum或者討論區既朋友討論，大多數覺得套戲改篇得麻麻，例如太過平淡、交代童年時代既野唔夠深....等等，不過我覺得只得兩個幾鐘頭既電影，仲要大部份依足原著，邊d要cut邊d要交代，取捨其實都幾困難o下，可能我無睇過漫畫無先入為主既感覺，所以覺得拍得不俗，聽講結局 (應該係指第三集)會同漫畫有d出入，記住散場出完字幕睇埋下集預告片至好走呀！

題外話：你地覺得唐澤壽明似苗橋偉、阿叻定歐錦棠呢？:lol :lol :lol :lol

20世紀少年 - 第2章：最後的希望

睇完返黎，呢集緊接上集既劇情，無乜特別緊張既場面，好彩149分鐘我都唔覺好悶，好好睇一定唔講得，如果比較我鐘意首部曲多d，不過話晒睇左頭兩集，最後果集點都會去戲院追埋佢，無睇漫畫版既我好多疑團o係個腦度，唔係因為睇唔明，而係電影版實在太多未解既迷，希望第三部曲能夠完滿咁解答到我啦！

歸到家忍唔住上網穩d漫畫資料黎睇，好心急想知道究竟邊個係"朋友"，原來同我睇完第一集估既答案係一樣無錯，黎緊就係要睇佢最後果集拍成點o勒！