葡萄友：當西多士用煎Pan上 價錢就可以提升四倍

Cheong448

抄襲

https://hk.style.yahoo.com/%E8%9 ... 40852175233078.html

        葡萄友2017年3月10日
好多香港人呢去旅行就死慳死抵，從買機票開始計盡一分一毫，多件行李少件行李都要諗幾日，去到當地又會遠一遠都要去食地道平價小食，因為「抵食」。但係好奇怪，當一返到香港，就覺得使錢唔係問題，貴一貴都去。

日前尖沙咀一間嚟自東京嘅麵包咖啡店開業，打住「東京麵包」呢個名，已經贏在起跑線，叫一眾港男港女幾乎感動到喊出嚟啦。再望一望價錢，一件手掌咁大嘅法式多士，承惠$68，加配咖啡，合共$98！一睇呢個價錢就知：「掂呀！實大把人就算要跪喺門口都要入去食呀！」無錯，「過江龍」加埋「貴」呢個組合幾乎係必殺，成功例子多不勝數，例如「港女M」蛋糕咁。加埋大大小小網媒免費試食再宣傳催谷之後，成為一窩蜂去搶先打咭影相呃Like嘅熱點，咁就完成呢條「搵港人錢方程式」喇。仲有咩例子係用呢條方程式？睇下啦。

日本＋法式多士 $98 vs. 茶記西多 $25

上述講剛開業嘅日式麵包店，賣嘅包括幾十種麵包之外，招牌就係法式多士，即係西多啦；製法材料同一般西多無異，雞蛋、糖、鮮奶等咁啦，不過話全部用日本材料，最最最重要係用煎Pan上，影相先夠gimmick，加埋聲稱每日限量30份喎。至於味道呢，睇咗幾間傳媒試食都無講。唔緊要啦，味道排最後嘛。港女唔係唔搶呀！