《思•裂》︰「大導」開眼了

粗人敵卡 · 發表於 2017-1-22 14:46

如果想睇到更多76師兄嘅分享，快啲登入成為會員啦！

您需要登入收看或下載更多內容。還未成為會員？成為會員

x

講起M. Night Shyamalan，唔少人覺得佢得一套佳作the sixth sense，之後佢嘅電影質素每況愈下。而小弟淨係睇過佢套the sixth sense，似溫情片多過恐怖片，而最後電影個twist實在令人感傷。今次睇《思•裂》，可能因為想睇James McAvoy超班演出，或者小弟受到爛番茄網好評影響，對呢位導演有信心而入場睇，套戲都無令小弟失望。

套戲話James McAvoy角色有24個人格，好似24個比利咁，為著特殊原因捉咗三個女角色，包括女主角Anya Taylor-Joy。實際上套戲show出嚟人格就十個都無，而James算係做到戲中不同人格，有潔癖嘅dennis，女性嘅Patricia，仲有一個九歲嘅人格。有幕戲小弟特別深刻，係james嘅九歲人格身份帶女主角去佢嘅房間聽CD，而James開始跳舞一段，怪異又帶點心寒，令小弟越睇越驚。仲有James嘅Particia人格去捉想逃走的女角色嘅一段戲，演技唔錯，氣氛幾intense吓。James McAvoy同女心理醫生嘅對手戲，有住導演前作The Sixth Sense嘅影子，係心理醫生想醫好James嘅人格分裂，有一段James扮另一個有fashion sense嘅人格被女心理醫生揭穿一段戲算精彩。故事尚算可以自圓其說，當中穿插女主角童年嘅故事線，亦解釋到女主角最後下場，電影最後有段好超現實嘅情節，而呢個情節亦算少少牽涉到M. Night Shyamalan導演前作嘅劇情。到底係邊套戲，小弟就唔講住，因為算係嚴重劇透，可惜嘅係小弟仲未睇嗰套「前作」，有機會要去睇睇。成套戲算係James McAvoy獨腳戲，由頭帶到落尾，略嫌被捉嘅三個女角色演技麻麻地，可能角色定位好似主流驚慄片嘅角色，無乜太大驚喜，得Anya Taylor-Joy演技好少少。

總括而言，《思•裂》係M. Night Shyamalan回勇之作，驚慄片fans，又想俾多次導演機會嘅人，可以入場睇睇。