《街角遇見貓》~ 不一樣的寵物片, 不一樣的勵志片

SonSon

首先簡單講吓主人翁Bob同James資料, 強項不得不講佢既FB, 2012成立後全球有五十幾萬Fans追隨, 號稱全球最紅街貓, 忌廉哥都要企埋一邊, 咪話唔犀利 .......而Bob最早亦係跟隨James係街頭賣藝比途人拍片放上youtube等跟住瘋傳而網絡走紅 , 2010被報紙追訪後, 2012出埋同名小說, 係英國即有百萬冊銷量, 小說最後翻譯成30多種語言, 至今全球總銷量過一仟萬冊. 2013重得到"英國榮譽動物獎"..........威威, 所以知道會拍成電影後真係好興奮架, 凱特王妃都有黎英國首映禮添





講返電影本身, 都係圍繞James由遇見Bob開始到小說發行期間3年內既人和事, 當然片長100分鐘無可能詳盡交待, 但電影都有將重要事件簿一一重現. 例如James初時因吸毒同戒毒期間遇到既人情冷暖, 經常缺錢受盡白眼至不停重蹈覆轍. 就算遇見Bob後亦非一帆風順, 會有立心不良既人倒亂, 或工作上被眼紅既人排擠. 初時同生父相遇亦不歡而散, 好彩最後真情對話化解雙方隔膜. 當Bob走失徬徨至都奇蹟搵返欣慰 (雖然事實不只走失一次) . 與鄰居Betty一段友達以上,戀人未滿既感情, 以及最後戒斷毒癒都可係電影本身見到, 可以講電影已成功濃縮咗小說內容精髓. 電影主線除james同Bob外, 友人Betty, 社工Val, 父親Nigel都有合餘其份表演(現實中原來James同Betty係情侶關係, 唔怪得演出咁投入), 加上鏡頭間唔中由Bob眼中出發, 導演應記一功 .






當然拍動物電影, 事前搵定替身係常識嘛, 但呢次唔係唔想用替身, 而係最後無一隻可成功替代Bob, 貓奴一定知點解 , 所以電影最終搵返Bob真身演出大部份場景, Bob既強項騎膊馬/high five/坐巴士/街頭賣藝等一一都難唔到Bob. 至於邊度用替身嘛??自己入場估吓啦..........