《湄公河行動》︰穩打穩紮嘅動作片

粗人敵卡

睇呢套戲嘅主要原因因為林超賢做導演同埋警匪題材，成套戲其實無乜俾到驚喜小弟，不過算拍得幾緊張。

今次《湄公河行動》動作場面有少少令小弟諗起之前林超賢套《逆戰》，動作場面依舊大型同震撼。商場一幕，追蹤毒犯最後被發現，再而引發槍戰拍得算精彩。最後直搗毒犯大陣營的水艇追逐戰拍得火爆，略嫌主角一眾人講得太強，反觀奸角最後好似盲咗咁，幾乎打唔中主角一眾人等。

文戲方面基本上…真係麻麻地好睇，彭于晏為女朋友報仇嘅故事線寫得普普通通，張涵予戲中家庭狀況令小弟覺得唔太重要，唔算可以突顯到個角色，可能真人真事改編，將個角色寫得太誇張可能遭受其他觀眾批評。如果想睇類似《証人》那種牽動人情緒嘅文戲，呢套戲可能令你失望。

總括而言，《湄公河行動》文戲略嫌失色，動作場面拍得唔錯，鍾情警匪片嘅觀眾可以入場睇。