入門便攜，高清取向 Pioneer SE-MHR5

alleelarry

前言
話說入手左一「雙」 Onkyo DP-X1 (舊文重溫按此) 之後，一直在用非平衡既入耳式耳機；但始終對「已解封」既平衡輸出感覺念念不忘，係手頭唔充裕既呢一刻遇到佢……

試聽 Pioneer SE-MHR5
無錯，遇到既就係佢，Pioneer SE-MHR5，官方價錢不到千六元，貪佢有2.5mm平衡跟埋，唔洗四圍搵，對於好似我呢D新加入「平衡」世界既人黎講就最好不過，可以玩住先嘛！耳機到手剛好手上的 Onkyo DP-X1 還有電，試左個平衡線先，係完全無驚喜……好平淡，本來諗住係便攜耳機，會相對易推，縱使未開聲都應該聽到D，只好回家用老掉牙既 iPhone 3Gs，當 iPod 咁去煲下先，煲下一日又一日，差唔多兩個禮拜後，感覺就對辦好多。



進入狀態既 Pioneer SE-MHR5，細緻位明顯聽多左，低頻感覺不俗，女聲比男聲優勝，小結係高低音比中音來得好一D，入門價錢比到既感覺尚算對辦。便攜頭戴式設計，單元相對偏細，戴上頭唔覺重，舒適度還可以，但對於會帶耳環既太太黎講，就有D麻煩咁囉。

試聽曲目
1) 譚詠麟 愛情陷阱 MQS - 火美人 (樂器用得都幾多下，試細緻度)
2) 陳秀雯 陳秀雯白金珍藏版 - 震盪 (經典DISCO歌，試低頻用)
3) 郭小霖 一些新一些舊精選 - 小霖秘笈 (起歌之前有D特效，試聲音自然與否)
可能會有人問我唔聽新歌既咩……，我呢D年紀硬係覺得舊歌好聽D呀嘛，實情係因為對首歌熟D，咩少左咩多左都容易D察覺！

∇ 試過 Onkyo DP-X1既「平衡」，完全翻唔到轉頭，點解可以咁極端既呢！？


∇ 3.5mm非平衡線，其長度適中，對於亞洲人黎講係不長不短，由袋中既DAP到戴上頭，沒有「拖泥帶水」既不便


∇ 2.5mm平衡線，不計較牌子都好幾百蚊，跟既雖然唔係高級野，對於入門取向既 Pioneer SE-MHR5，已經勝過其他同級既對手。據了解正因為加入左「平衡」既設計，所以無左3.5mm既電話專用既接線；正所謂魚與熊掌，好難兩全其美，對於我呢D唔用手機聽歌既就無咩所謂。


∇ 原裝袋，出街用的話就會嫌太大舊，但打算去旅行用的話，就十分稱職，仲可以收納兩組接線


Conclussion: 入門便攜，高清取向
入門耳機有齊非平衡同平衡，茶餐廳既價錢又未至於有牛扒屋既美味，走高清取向 同 便攜既優勢，對於預算唔多既，可能會係你既選擇之一！