音茶樂 FLAT 4 AKAZAKURA開箱+其他動圈耳機分享

eve111

大約年半之前接觸音茶樂呢個品牌，果時響DXA有KURO,KURO II,KAEDE II同Donguri幾款音茶樂既耳機試。最後入左KAEDE II。呢幾款耳機既走向都好似(除左Donguri，因為佢唔係FLAT 4系列)。分析力極高，音場好廣闊，唔似聽入耳式咁，高音可以上去到好盡，低音亦都好實淨。聽一D管絃樂團既音樂好正，果種整體既感覺、氣勢基本上好難響其他牌子既入耳式搵到。

不過到依家我都覺得呢個品牌既耳機都難搞。首先夾機最難，我覺得厚聲國磚好似HIFIMAN 901係便攜機入面比較夾呢個牌子。如果配冷聲機會好刺耳，好難長期使用。第二係煲機時間長，我本來係唔信煲機既，但隻KAEDE II經過長時間使用後V型聲同齒音問題都有大幅改善，真係不得不信。最後就係隔音，可能係氣孔問題，出街用始終唔太適合，好易受街既雜音影響。

2個月前左右音茶樂出2款新產品，SAKURA PLUS同AKAZAKURA PLUS。根據官網所講，呢2款新產品係FLAT 4系列入面最暖聲既。SAKURA PLUS同AKAZAKURA PLUS既分別就係條相位修正管既長短，即係FLAT 4 果條好顯眼果條U型管。SAKURA PLUS就係標準既28mm修正管，而AKAZAKURA PLUS就係30mm長既修正管。理論上佢係有將NOISE抵銷既效果，幾有趣既技術。當然理論還理論，用家既聽感係另一回事。
上次買既KAEDE II係28mm長既標準長度既修正管，今次我就決定試下30mm既AKAZAKURA PLUS。搵人響日本代購大約一星期後到香港。買之前試都冇試，review都冇睇(亦都好難搵)，好彩最後冇令我失望。



一開始一定要同上一代既KAEDE II 做比較，質素上大體繼承FLAT 4既優點，分析力高，音場大。分別在於AKAZAKURA PLUS既人聲較KAEDE II前，高音冇KAEDE II做得咁盡，齒音雖然有，但比KAEDE II已經少左，個人認為係可接受範圍。橫向音場較KAEDE II 細但縱向音場做得較好，簡單黎講立體感較好。
雖然官網話係新款既SAKURA係用COMPLY棉同SPINFIT耳膠調音，不過我都係覺得FLAT 4 用耳綿適合D，用耳膠始終太刺耳。AKAZAKURA PLUS係比較符合大眾口味，較上一代較易夾機。但我認為佢都係唔太適合出街用，手提機係可以推得唔差不過同用枱AMP既感覺差太遠。



第一次寫文，想分享埋其他我其他既動圈耳機，分別係AK T8IE，DITA ANSWER (TRUTH BALANCED EDITION)同FAD PIANO FONTE IX

T8IE
T8IE係5款動圈入面最適合拎出街用，佩戴舒適，線身軟，體積小，方便攜帶。聲音方面係微暖聲底，分析力不俗但未算好，雜食型，而且好耐聽。其實係一隻好好既耳機，只係MMCX頭個位好有問題，似乎好易斷。我都換過2次，希望換既新版本有改善。黎緊好似會出T8IE MKII，不過都未必敢入手。

DITA ANSWER (TRUTH BALANCED EDITION)
一個新加坡既品牌，呢個款好似都出左1,2年，2.5mm TRRS版比3.5mm TRS貴成2千幾實在不能接受。最近可能係代理清貨或者可能有新品推出，DITA 出果3個版本既ANSWER都大劈價。最後入左BALANCED EDITION。
睇番制作團隊既理念，佢地想用家聽到最"真實"既聲音，所以款耳機都叫"TRUTH"。不過對我黎講，最接近真實聲音既耳機係ER4B。DITA TRUTH ANSWER個聲音都好中性，但又唔會好似ER4B果種咁鑑聽既感覺。人聲較前，立體感同分析力都不錯，不過線材好硬。整體上都好好，都會有人覺得佢冇咩特點。個人認為定價太進取，希望下一款產品會調低D個價錢。


FAD PIANO FONTE IX
原本唔想寫呢隻耳機，寫佢既原因係感覺依家耳機品牌愈出愈多，不過調音風格上都好似為左遷就大眾口味而變得冇咩特色。呢個系列既耳機非常重口味，即使PIANO FONTE IX已經係夜壺系列入面最正常既一款。缺點非常多，0隔音，只適合家用，佩戴上好奇怪，到今日我都唔知自己係咪戴得好。聲好似有一層鈔隔住咁，平時用黎評價耳機既幾樣野好似音場分析力全部響佢身上都唔適用。好難想像點解賣得咁貴。
不過佢泛音方面做好好，人聲有味精不過好獨特好好聽，完全冇齒音。我覺得佢聽流行曲好唔錯，帶到個感覺出黎。

hiyori

很精彩的分享，很同意師兄對Flat4系列的感想，我也是很喜歡Flat4的高音延伸、細緻的分析力和空間感表現，尤其是Kuro。
AKAZAKURA PLUS看來會很合我口味，尤其人聲比較前這點，師兄的聽感都是以901做基礎嗎?又，師兄聽開邊d歌?

eve111

hiyori 發表於 2016-6-23 12:29
很精彩的分享，很同意師兄對Flat4系列的感想，我也是很喜歡Flat4的高音延伸、細緻的分析力和空間感表現，尤 ...

以上耳機都係用DPX1 LINE OUT出VIOLECTRIC既HPA V200做基礎試。HIFIMAN 901 只係去鋪頭用KAEDE II試過，覺得幾夾機。AKAZAKURA人聲比較前係對比KAEDE II，我會覺得KAEDE II既人聲同樂器算係平排，而AKAZAKURA就係人聲方面凸出少少，並唔係指好似TG334果種貼耳。
平時咩類型既野都會聽，流行曲、JPOP就比較多，其次係動畫同電影既OST。

hiyori

eve111 發表於 2016-6-23 18:30
以上耳機都係用DPX1 LINE OUT出VIOLECTRIC既HPA V200做基礎試。HIFIMAN 901 只係去鋪頭用KAEDE II試過， ...

>>我會覺得KAEDE II既人聲同樂器算係平排，而AKAZAKURA就係人聲方面凸出少少，並唔係指好似TG334果種貼耳

師兄說明得很清楚啊，這樣也和我預想的相近，很有興趣聽聽看。

Near

hiyori 發表於 2016-6-24 15:30
>>我會覺得KAEDE II既人聲同樂器算係平排，而AKAZAKURA就係人聲方面凸出少少，並唔係指好似TG334果種貼耳 ...

今天已入手了
香港 某大型耳機店有入少量
據知 貨量只有個位數量
我試的那間店隔天已剩下demo

Invisible_manic

Brought one pair in Japan last year