如果想睇到更多76師兄嘅分享，快啲登入成為會員啦！
您需要 登入 收看或下載更多內容。還未成為會員？成為會員
x
本帖最後由 ykluk 於 2016-4-5 15:17 編輯
相信各位CHING應該會對活躍於AV同HIFI區既MDLP兄都有所認識, 小弟第一次認識MDLP兄既文章就係佢既重口味地盒: {:9_428:}
http://post76.hk/forum.php?mod=viewthread&tid=207082
對於MDLP兄, 可能有啲CHING會覺得會以"好串"嚟形容佢, 以小弟認識既MDLP兄, 我會覺得佢係一個好直接既人(同小弟鍾意長篇大論講完等於無講既性格好唔同~~). 對於一啲答問, MDLP兄可能已經經過咗佢多年既經驗去直接講個"結論"出嚟, 唔知來龍去脈既咪會以為佢永遠主觀咁得一個anwser毫無餘地, 小弟當初都有同感, 不過接觸多咗, 就會好明白點解MDLP兄其實真係一個好角色分明既人, 正如佢既器材一樣~~!! 
上星期六, 小弟有幸得MDLP兄邀請去佢屋企玩吓, 有咁既機會真係要跪求老婆大人都要放小弟幾個鐘頭去啦~ 順便捉埋呢期乜機都壞既小寶老豆一齊上去吸吓毒~~ 正~~!!  
先講吓MDLP兄既聆聽環境, 大約一百尺內既聆聽空間唔算大, 前中置單元離皇帝位大約有6-7尺距離(小弟腳短, 喺皇帝位伸直腳係掂唔到中置既, 仲有3尺咁上下), 右邊前置係露台窗(大約5吋到), 而左邊就完全放空係飯廳同走廊, 呢個聆聽環境我諗同好多香港地家庭都會類似. 而呢個環境最大既問題就係左右空間既大不同, 一邊彈聲一邊走晒聲, 所以對於喇叭擺位係要非常講究~ 
至於器材, 小弟無問得詳細或抄低, 大致上兩聲道係全金仔CDP同前後級, AV就係pionner 58+88同埋crown既專業8聲道後級, 喇叭除咗十仔全部係JBL(前置係array 1400)包括7.1.2,十仔係Rythmik F15HP, projector係三菱, 詳細如下~~ {:9_423:}
2 CH
Accuphase DP550 CD/SACD Player
Accuphase C2410 前級
Accuphase A45 後級
JBL Array 1400 前置
AV
Pioneer 58 bluray player
Pioneer 89 AV amp
Crown DCi 8300 professional power amplifier
JBL Studio 520c 中置
後置及天花:
JBL control 128
JBL control wave
JBL S50
2 channels
小弟鍾意2CH嘢, 首先梗係先試吓全金仔+JBL array 1400既威力先~~ 小弟發現MDLP兄係一個好細心好有準備既人, 如果你無咩特別要求, 其實佢會準備好一啲表現到唔同層次歌曲既CD不斷換不斷試比你睇, 堅係好服務過去毒氣室, 當然小弟話想聽人聲佢又即刻可以搵到好嘢嚟試, 搞到小弟同小寶老豆好似廢人咁坐喺度.... 真係唔好意思.....
之前提過, 聆聽空間既限制係好需要喇叭擺位去搞掂音場平衡, MDLP兄將array 1400既左右toe-in角度其實令音場都做到好好既平衡(只係左邊有好微既空洞感但真係無得避免喇~). 但呢個toe-in最大既問題就係會令皇帝位嗰一點位置既聲音同隔離既分別好大, 不過小弟相信已經係最好選擇, 除非用晒全個廳打直去做聆聽空間, 但呢樣應該過唔到MDLP老虎嗰關喇~~!! 
有啲CHING可能會問:"咁多人講既金仔究竟係咩聲音?" 小弟會覺得喺MDLP兄屋企都可以睇到金仔幾全神既一面. 以小弟有限認知既JBL喇叭有一個非常好既特色就係夠真實簡單直白, 如你想聽出DAC/CDP+前後級既真實聲音, 用JBL喇叭就可以好清楚咁表現到, 尤其是去到用號角+超大低音單元, 以四十幾火純A類既金仔去推, 你比乜佢出JBL就出咩比你, 呢種實在感覺非常好. 以前小弟都曾經去過一位根據JBL18吋單元同自製號角去DIY喇叭既CHING屋企,佢用上天價既全kondo前後級, 真係聽到真正kondo聲音想走對腳都唔肯郁~~ 
講返金仔聲音, 如果小弟夾硬用幼稚園級文字去寫既話, 我會覺得啲聲好似每粒都包住咗一種又圓潤又厚甜但又唔會濛既感覺, 好似食緊嚟自和歌山既甜橙一樣好冧~~  最重要係因為JBL既關係, 喺速度上金仔一啲都唔會慢, 我諗以前聽過金仔覺得慢聲可能係喇叭關係, JBL果然係膽機同class a機既恩物~~!! 喺音場同樂器定位上, 以MDLP兄屋企聆聽空間去表現其實都幾好(當然小弟既300呎正方形廳係好啲啦~ 不過小弟個廳太大啲聲包唔晒呢又~~), 可惜係前後距離唔夠所以無辦法做到好大既前後空間感. 至於中音人聲方面, 一直聽開ATC既小弟梗係話ATC既中音密度更好啦~~  不過以三頻平衡感覺嚟講就輸晒囉(ATC想要三頻平衡真係難極登天....)
總括嚟講, MDLP兄屋企既2CH表現係幾耐聽幾舒服, 有味道又唔會慢(啲結他聲咁爽真係唔錯), 仲要JBL既還原度好高, 相信如果佢有啲搬大地方玩應該好過癮~~!! 
AV
聽咗成粒幾鐘歌, 因小弟放監時間太短所以就要輪到睇戲喇. MDLP將個外置harddisk放入pioneer 58 bluray機, 就一直用部ipad係咁玩, 原來佢播片同調教58/89都係用一部ipad搞掂, 見佢個control介面都幾全面又易用, 睇到小寶老豆好開心~~!! 
小弟一直對pioneer av amp係有一種偏見, 皆因當年86/87出時小弟去試聽, 嗰種高頻尖聲到好似界玻璃既聲令小弟頂唔順走佬, 所以一直小弟都好坦白咁講係唔鍾意pioneer聲既. 不過今次真係對pioneer有啲改觀, 改觀既唔係佢唔再尖, 而係我明白pioneer既尖聲只係表達咗佢還原度超高既原因. MDLP兄試咗幾段片, 對比小弟屋企既Yamaha同垃圾八國聯軍喇叭, Pioneer+crown+JBL既組合真係好真實, 基本上套片落咗咩音效, 佢就差唔多全部(除咗50Hz)就比幾多你. 試《絕地孤軍》既鎗戰, 啲子彈聲真係好堅揪, 到最後小弟都係有幾分鐘頂唔順要行開一陣(呢個唔關器材事, 係小弟好驚某啲聲音). 小弟未聽過真實既鎗聲, 但聽MDLP兄講, 佢有位做警隊既朋友一聽完呢堆子彈聲就入咗部89~~ {:9_433:}
而另一樣嘢小弟覺得好過癮既就係佢成套嘢既低頻表現, 睇返MDLP兄佢既setting, 佢因為擺位問題, 將隻15吋十仔放喺梳化隔離(當茶几用~~)然後backfire打後牆, 咁梳化背脊位就係咁一嘢嘢咁打(佢仲要set個十仔係最快速最快收既setting), 而佢將前置set做large, array 1400既14吋低音單元就會出埋前面低頻, 雖然低頻係好難聽出有分向, 但前後打既感覺都幾過癮~~  小弟仲未得閒喺屋企試咁做, 不過以小弟ATC SCM40既低音單元同屋企空間, 都唔使旨音做得到....
分析力高一直都係pioneer既特色, 今次家訪完小弟會再用埋"還原度高"去形容pioneer, 但相比小弟用既yamaha, 我會發現呢2個品牌完全係兩極既表現: pioneer可以比晒應該要有既嘢你, 你頂得順就得架喇; 而yamaha係會cut頻cut咗一啲小弟頂唔順既聲, 但DSP會比返一啲"唔應該出現"既環迴感覺你, 只可以講無話邊個好, 係純以個人喜好去揀amp用~~ 另外, MDLP兄話Pioneer個apps係可以調教high pitch同filter, 可玩性同可調教性係高好多(當然相比yamaha玩得死人既調教又唔同啦~). 
最後MDLP兄試咗佢2隻天花喇叭比我哋聽, 呢對JBL control系列既喇叭睇spec只係得100Hz - 10kHz, 講真唔係全頻唔會出得晒全部天花聲, 但要玩天花玩得到全頻係咪咁易呢~? 小弟無玩天花唔識答, 不過以佢出得到既頻寬嚟講算係好唔錯, 況且只有2隻天花喇叭都聽到有唔同距離既聲音~~ 唯一問題係佢太大隻同太樣衰, 真係好難過到老虎, 甚至自己嗰關.... 
後感
短短唔夠3粒鐘家訪時間, 小弟同小寶老豆都好開心好滿足, MDLP兄既器材setting同佢個人一樣咁單刀直入角色分明, 完全無同小弟屋企垃圾器材咁含糊不清, 每一樣嘢做咩功能有咩特點真係清清楚楚~~ 小弟相信各位CHING以後有咩想問MDLP兄, 簡單直接佢係最受落(佢提過話最唔鍾意啲人問完又問同一問題~~). 我又覺得MDLP兄又唔會淨係得金仔先峰皇冠同豬標先肯講(呢啲佢的確好熟), 聽佢講佢都有玩過yamaha同其他2CH嘢, 不過佢未玩過就真係唔會答囉~~!! 各位CHING如果對金仔先峰皇冠同豬標有興趣, 不妨直接問MDLP兄甚至上佢屋企試吓, 小弟好肯定你一定會得到答案~~!! 因為我知道小寶老豆就將會有答案喇~~!! 
多謝觀看~~ 歡迎討論, 不喜勿插~~!!  |
[複製鏈接]
發表於 2016-4-5 14:24
樓主
