簡單得黎好精彩, 殘酷得黎但又壯麗的復仇故事《復仇勇者》

mike384

復仇, 作為一個好常見的電影題材, 可以發揮的地方又係出奇的多, 愛情, 陰謀, 懸疑, 動作等等都可以加入去.

而話明係復仇片, 首先係要有個仇係度先可以去報, 有D片可能只輕輕帶過個仇恨, 例如係頭幾分鐘, 安排主角一家人突然被殺之類, 跟著就係戲肉, 講主角點樣去報仇, 呢類通常會係動作片.
但有D可能會有較長的時間去鋪排, 但又唔可以太長, 太長的話就冇篇幅畀主角報仇了,而後來的戲肉, 當然係主角點樣安排, 執行佢的復仇計劃, 呢類電影係難度上較高, 導演要識得計算.

而本片《復仇勇者》的仇恨, 算係用了較長的篇幅去鋪排, 先係半意外地遭到紅番襲擊(因為其實係因為法國佬捉了猶長個女在先), 再到主角遇上大灰熊受重傷, 期間只留伏筆畀TOM HARDY, 將佢的形象介紹畀觀眾, 再到主題, 就係TOM HARDY如何自願申請留低照顧主角, 其實個個都明佢立心不良架啦, 但又真係吹佢唔漲.

之後就到大仇恨的發生, 主角都因此差D冇命, 所以之後的主要故事, 都係講佢如何求生, 要有命返去個城堡先.

到了最後, 再搞個因果報應的結局出黎做收尾.

故事可以話好簡單, 其實睇到TOM HARDY周不時單打主角兩父子時已經估到咩事, 自然又估到最後TOM HARDY會有咩下場.
當然猶長個女的出現都係意料之內.

但即使如此, 真要對導演講個服字, 由開頭的紅番大戰到主角大戰熊人, 再到雪地求生, 拍攝都一絲不拘, 真係好精彩, 而且絕對適合係大螢幕睇.

我係上星期先去戲院睇的, 本來冇打算睇, 但朋友話D風景一流, 於是都係入了場, 果真冇後悔.

靚仔攞最佳男主角自然冇得講, 我睇著都覺得痛~ 但大奸角TOM HARDY都係近年少見的好演員之一, 夠哂衰~~~但其他人相比之下就顯得一般了.

我對呢套戲的總結係, 一定要去戲院睇大螢幕, 享受呀!!

mike384

大讚完呢套復仇電影, 又講下兩套最近睇的復仇片, 咁橋又係同一演員擔正
1.倫敦淪陷
呢套主題文面上係[恐襲], 但成個故仔就係基於大反派的仇恨, 個仇恨可以話冇太多鋪排, 開場幾分鐘, 一粒導彈就搞定, 而主要篇幅就係講大反派如何報仇, 雖然未報哂最後死埋, 但殺了咁多仇人都算係咁.
片唔算難睇, 當然係絕對大美國, 但中間都不忘自嘲一返. 拍攝尚可, 鍾意睇槍戰動作要捧場.
2. 埃及神戰
基於古埃及神話, 雖有華麗的包裝, 什麼金甲戰神... 但冇精彩的內容, 動作, CG 全部都係相當低B, 近年來睇的cg為主的電影中佢絕對可以排尾幾位了.
演員更令人失望, 主角個個什麼天空之神, 扮到snake咁(唔係打機mgs個位, 係元祖逃出紐約個位), 入面的動作場面可以煥美70年代的美國牛仔片...睇到我呢....
當然啦, 本來都預左係大爛片一部.
而主題當然又係報仇, 重係報殺父之仇, 而老豆之死, 又係因為阿叔唔抵得阿公偏心...最有趣的係入面報仇個位成日以為自己要搵齊兩隻眼先可以飛....原來係唔使的...咁大整蠱呀, RA神~~~~

Hon

我又唔覺得佢拎男主角係靠晒靚仔既， 淨係佢同隻熊隻揪嗰幕我已經會俾佢攞獎， 嗰份真實感配上演技， 無返咁上下經驗都唔會做到， 嗰下痛比佢負傷返基地黎得更全神
(Post76 Android 手機版送出)

mike384

Hon 發表於 2016-3-20 13:31
我又唔覺得佢拎男主角係靠晒靚仔既， 淨係佢同隻熊隻揪嗰幕我已經會俾佢攞獎， 嗰份真實感配上演技， 無返 ...

我上文中指的靚仔, 唔係話佢靠靚仔攞獎, 只係平時慣左叫佢做"靚仔" 咁解.
佢係戲中的每一下痛, 都印象十足, 係近年來少見的精彩演出.

Hon

mike384 發表於 2016-3-21 10:28
我上文中指的靚仔, 唔係話佢靠靚仔攞獎, 只係平時慣左叫佢做"靚仔" 咁解.
佢係戲中的每一下痛, 都印象十 ...

明白, 我誤解左, sor.

認同, 佢每一下痛都好似自己痛緊咁, 好耐無睇過一套戲會有咁深刻既感覺.