《三打白骨精》︰一帶一路取西經

粗人敵卡

對於鄭保瑞，第一套正式接觸係佢同馬偉豪聯合執導的《追擊八月十五》，仲好有新紮師妹嘅feel。之後套《怪物》，鄭保瑞真正嚟料，套戲俾我嘅感覺係一種歇斯底里，兩個失控母親於住宅困獸鬥，林嘉欣毀容造型嚇窒當時小弟。而《狗咬狗》將呢種歇斯底里的風格推至極致，陳冠希尤如野狗的演繹，李燦琛為報仇的不惜一切，絕望的結局令人睇完久久未能平復。而《意外》，叫做新嘗試，好有杜sir風格，但細節位上小弟覺得有少少兒戲，對小弟而言算幾失望。講番套戲，今次《三打白骨精》係《大鬧天宮》續集，最大分別係孫悟空今次係郭富城做，宇宙最強今次無份做。

郭富城今次做孫悟空，比上次套《踏血尋梅》更大發揮，睇雜誌訪問知道佢準備咗好耐，fing棍同化裝係近年郭富城最辛苦嘅一套戲。今次郭富城做孫悟空做得幾入戲，一舉一動幾似一隻猴子，面部表情豐富，耍棍耍得幾靚，同宇宙最強比…上一集無入戲院睇，恕小弟講唔到兩者之間有幾大分別。鞏俐飾演嘅白骨精，佢扮老人同唐僧講自己嘅悲慘過去，令小弟諗起《怪物》林嘉欣嘅角色，唔知係咪導演刻意咁樣做，角色上變得立體。小瀋陽做嘅豬八戒，做得幾過癮。貪圖女色，遇到麻煩事推俾沙僧做，但不失幽默，之前對小瀋陽認知係王家衛套《一代宗師》做古惑仔，當時睇覺得係咪搵錯人嚟做，哭喪咁款實在破壞成套戲氣氛。羅仲謙做嘅沙僧，比我印象係戇直同單純，做得無其他人咁突出。

特技方面，除咗前段老虎CG做得好唔像真之外，基本上算做得幾靚，最後同白骨精決戰相當震撼，拍得相當緊湊，動作方面拍得算見得吓人，洪金寶今次做得OK，係略嫌對打方面拍得有少少單調。不過唔滿意嘅係白骨精造型抄《黑魔后》，而白骨精大本營，尤如copy Superman Returns裡光頭佬用Kryptonite喺地球造出嚟嘅小島，真係睇到眼突。講吓故事方面，唔會改到好面目全非…同上集故事簡介相比。

總括而言，《三打白骨精》特技唔錯，郭富城做得幾好，以賀歲片嚟講，值得入場睇…另外嗰套喺未上嘈到火紅火綠，算啦…(邊套心照)

ayumi678

我之前睇大鬧天宮睇完人人妖媽拆蟹 所以呢套入場睇無抱任何希望 之後一睇非常有驚喜同大鬧天宮比 無論係故事 動作 特技都係好太多！
鞏俐做既白骨精非常妖豔 眼神非常到位 讚！
基本上白骨精故事大家都好熟 係入場睇動作 特技 最終戰鬥真係好震撼
我希望個故事會一直拍落去 見佢今次拍得咁好

粗人敵卡

ayumi678 發表於 2016-2-7 18:20
我之前睇大鬧天宮睇完人人妖媽拆蟹 所以呢套入場睇無抱任何希望 之後一睇非常有驚喜同大鬧天宮比 無論係故 ...

下次孫悟空會唔會又轉人做
另外點睇郭富城唱嘅主題曲

杜sir

師兄
我個人覺得鄭保瑞拍得最好係「發光石頭」

粗人敵卡

杜sir 發表於 2016-2-8 00:48
師兄
我個人覺得鄭保瑞拍得最好係「發光石頭」

八月十五前期作品
未有時間睇
所以小弟自己最欣賞佢拍嘅《狗咬狗》
當然近期《殺破狼2》水準唔錯{:9_426:}

杜sir

粗人敵卡 發表於 2016-2-8 08:04
八月十五前期作品
未有時間睇
所以小弟自己最欣賞佢拍嘅《狗咬狗》

《意外》亦是一套出色的作品

victor_wong

$35 正啊！抵睇！
(Post76 Android 手機版送出)

粗人敵卡

victor_wong 發表於 2016-2-8 15:00
$35 正啊！抵睇！
(Post76 Android 手機版送出)

正場記得平過屯市間戲院

victor_wong

粗人敵卡 發表於 2016-2-8 18:34
正場記得平過屯市間戲院

屯門凱都戲院 早場都是 $35
(Post76 Android 手機版送出)

SonSon

victor_wong 發表於 2016-2-16 14:09
屯門凱都戲院 早場都是 $35
(Post76 Android 手機版送出)

對套戲要求唔高既呢間首選
(Post76 Android 手機版送出)