[少量劇透]《換諜者》︰美蘇政治角力

粗人敵卡

講起關於美蘇冷戰時期嘅電影，小弟印象最深刻嘅係Stanley Kubrick導演的Dr. Stranglelove，瘋狂黑色喜劇藉著故事中美蘇主要人物那種幼稚談判諷刺戰爭的荒謬和可笑。而今次小弟睇嘅Steven Spielberg導演《換諜者》，改編自真人真事，由Tom Hanks等一眾演員，演繹一齣美蘇交換人質的事件。

導演Steven Spielberg差不多拍任何類型電影顯出佢游刃有餘，娛樂片奪寶奇兵、侏儸紀公園，較為嚴肅嘅Schindler's List 及Saving Private Ryan ，小弟覺得上述電影有一種懾人魅力，令觀眾尤如置身於電影之中。編劇高安兄弟，小弟覺得佢哋最好作品係血迷宮，充滿黑色風格不失幽默，片中某幾段情節與對白相當精警同幽默。今次《換諜者》，呈現出當時美蘇冷戰時期嘅氣氛，戲中有幕Tom Hanks兒子上課時教師講述核戰發生時如何避難，之後佢回到家中依足教師所教的去做，另外一段Tom Hanks決定為蘇聯間諜上訴，家人受到襲擊，小弟理解為當時美國市民對蘇聯間諜嘅憎恨，並視Tom Hanks所做嘅為「叛國」行為。Steven Spielberg及幕後對戲中每一細節位毫不馬虎，塑造出當時美國60年代。

Tom Hanks飾演一個堅持自己原則嘅律師，今次演出表現沉穩，於去東德時可以話帶動到電影氣氛，於東德患上傷風一幕似乎有少少弦外之音。之前Tom Hanks於雲圖一人分飾多角，令小弟佩服佢可以演繹戲中性格、行為不同的角色。另外阿甘正傳演出算得上係Tom Hanks經典演出，還有於Saving Private Ryan飾演拯救Matt Damon的小隊隊長(唔係好記得)。

電影沒有刻意凝造緊張情節，開頭美國FBI追捕蘇聯間諜沒有誇張的拍得如一眾FBI於大街上追著蘇聯間諜。中段Tom Hanks去東德向蘇聯勢力談判，氛圍慢慢變得冷峻，與蘇聯副書記和東德華高先生等人談判嘅對手戲，充滿張力和戲味。片中蘇聯和美國對待間諜嘅行為，有對比之餘，反映出兩國對人權重視程度，美國仍然係世界上最重視人權嘅國家。小弟欣賞電影鏡頭拍攝，有一幕東德人民試圖爬牆逃至西德被士兵開槍殺死與最後Tom Hanks回國見到一眾少年爬過鐵絲網，兩者對比幾有意思。整套電影情節嚴肅，但沒有過度壓抑，沒有令小弟有一種難受，透不過氣嘅感覺。

總括而言，《換諜者》係一套拍攝精良嘅作品，Steven Spielberg與高安兄弟合作拍出一套好戲。

day2013

Dr.Strangelove 確是一部好電影，跟差利的大獨裁者一樣好戲。

粗人敵卡

day2013 發表於 2015-10-25 16:09
小弟其實想给你加更多分。縱然我現有15萬分，每日其實可在不影響自己分數情況下給有質量的帖加分鼓勵，奈何 ...

小弟係睇完戲純粹分享分享

alleelarry

版主都睇左，但太忙就未必能跟大家分享：
(Post76 Android 手機版送出)

alleelarry

day2013 發表於 2015-10-25 16:09
小弟其實想给你加更多分。縱然我現有15萬分，每日其實可在不影響自己分數情況下給有質量的帖加分鼓勵，奈何 ...

難得day2013默默的分享，加分只是一點心意與認同，只是個人早已看淡分數……
(Post76 Android 手機版送出)

alleelarry

粗人敵卡 發表於 2015-10-25 17:28
小弟係睇完戲純粹分享分享

每個星期天都會估下粗人會睇咩戲！
(Post76 Android 手機版送出)

粗人敵卡

alleelarry 發表於 2015-10-25 19:52
每個星期天都會估下粗人會睇咩戲！
(Post76 Android 手機版送出)

遲啲會睇007最新一集
極黑勢力仲諗緊好唔好去睇

mike384

前幾晚都睇左, 當日好眼瞓下, 不過時間又啱, 又就腳, 重要幾平=影藝, 米入場睇lor.

點知...唉, 1號院真係太殘, d座位好多都有下陷...坐都坐唔舒服, 好彩套戲幾好睇, 除了剛入場有d眼瞓外(放工冇耐), 後來都ok.

律師同間諜, 一個好新鮮的題材, 雖然相當大美國, 但見到史匹堡個名都預左, ok啦.

粗人敵卡

mike384 發表於 2015-10-26 10:05
前幾晚都睇左, 當日好眼瞓下, 不過時間又啱, 又就腳, 重要幾平=影藝, 米入場睇lor.

點知...唉, 1號院真係 ...

可惜我住附近嗰間凱都唔播
ua屯門麻麻，焗住去巴倫紐
巴倫紐質素真係麻麻地
小弟認為史匹堡最好睇係Saving Private Ryan
今次《換諜者》未算係最好，但都算係數一數二
暫時今年小弟睇過最好嘅電影

mike384

粗人敵卡 發表於 2015-10-26 13:44
可惜我住附近嗰間凱都唔播
ua屯門麻麻，焗住去巴倫紐
巴倫紐質素真係麻麻地

史匹堡的電影中, 其實有好多作品都未睇, 包括名作張的舒特拉, AI...等等都冇睇過.

不便評論太多了.

但PRIVATE RYAN真係傑作, 不論係故事, 或技術, 或演員, 都達到戰爭動作片的顛峰.(非動作的話, 我更喜歡波蘭斯基的鋼琴佬, 或希特拉最後個幾日, 重有意大利佬個套美麗人生)