準備中Hi-Res系列試聽Party 現場直擊+聽後感

michael.t · 發表於 2015-9-10 00:37

本帖最後由 michael.t 於 2015-9-10 23:16 編輯

首先我不入地獄誰入地獄
連大王都不禁感嘆一聲音質奇怪的《準備中》
竟然一推三隻新版包括LP SACD 同埋K2HD
咁到底呢三隻理應發燒級嘅版本實際上係點呢？

咁要得到呢張試聽會嘅入場券我就掉低咗幾舊入咗SACD同埋K2HD各一先可以得到呢張門券
咁搞得試聽會地方一定有返咁上下class
今次就響香港藝術中心呢到一間意式餐廳舉行

準時六點 Eason正式出場咁就首先吹咗陣水講下佢同hifi嘅關係睇法
仲有佢原來同大家一樣都係未聽過呢啲新版本
佢仲問主持人咩嘢叫K2HD 非常搞笑

今次順道係慶功會
《準備中》係Eason兩年來第一隻廣東大碟成功連續八個星期佔據三大唱片店銷售榜冠軍
環球亦派出高層頒發獎狀俾Eason

咁跟著就到主菜了今次試聽Party係Bowers & Wilkins贊助同埋提供器材
Eason更加收到B＆W嘅大禮
原來係一隻B＆W P7 Headphone
首先試聽嘅係SACD版
第一隻歌就係老細我撇先
由於成隻碟都loop咗好多次
所以都叫做可以分析到個分別
明顯地SACD就係呢隻真正應有水準
啲和音背景全部分明地出返曬嚟真心有啲感動

我諗緊會唔會係器材嘅分別之際跟著就播人生馬拉松
我就知道SACD係真材實料
本身我真係覺得呢隻歌悶到Hi
但係今次固然層次分明而且音場都好大
第一次聽到呢隻歌嘅真正韻味出來

第三隻係黑洞 SA嘅優點更加顯而易見
當中和音果種嘅穿透力又真係好打入心入肺
我知道今次終於扳回正軌
身為臣迷都好開心一隻有水準嘅碟終於有一個體面嘅版本登場
正式準備好

甚至我望著Eason都見到佢聽到好投入
同埋佢都明顯聽得返本身studio中的聲韻

跟著就到黑膠上場
第一隻就當然係無條件啦
一放下唱針我真係吳若希上身
心諗點解會咁嘅？
點解我好似聽緊串流咁嘅
啲聲真係好實好實好似好死咁
不過聽完我都未敢下定論住即管再聽下

但係原來大會想播心燒變咗黑洞
一個AB對比我就知LP真係出咗事
音場呢分析呢好似將我睇電視由4K拉返落480p嘅慘烈
完全拍馬都追唔上係只不過比SA少啲數碼味
Well 今次我寧願要返少少數碼味都好過假黑膠味
我而家更加深信一個數碼錄音後製年代要反其道行
Analogue嘅LP 製造上一定要更加用心如果唔係真係可能比普通CD更差

不過side b最後一track 夢的可能
又有返黑膠果種獨有暖和感聽落好舒服
雖然細節都未算好出
所以我而家都好confused 究竟點解會咁嘅
Side A兩隻係失望
Side B又好似未係太差

至於Eason一聽LP自己面色都沉一沉
都講咗我想講嘅一句"真係好實好實⋯⋯"

但係去到後期製作佢一來好忙二來佢都未必識搞
即使係自己公司出碟 CD上的不足我諗佢都控制唔來

另外聽SACD前後佢都有分享到錄音製作嘅過程
佢響聽完SACD後講到每隻歌嘅每個微細detail
睇嚟呢隻SA真係俾返佢聽Demo果時嘅感覺係應該最接近原味嘅版本

希望Eason繼續有呢份執著甚至自己公司可以多啲自己落去做下鑑聽
盡善盡美今次見到其實係可以出到SACD呢啲音效出色嘅碟