耳擴小聚後感：四台便攜耳擴分享

斯路

難得今日相約朋友小聚玩玩耳擴，就上黎簡單寫寫聽感分享，希望各位師兄師姐都可以分享一下對唔同便攜耳擴既睇法啦。

近來Head-fi市場好似主要都係出便攜解碼連耳擴，純便攜耳擴好似越來越唔普及。其實都明白，始終電話方便，有個解碼連耳擴功能既一體機亦好似方便唔少。不過我係主張手機同播放器分開，而雖然好耐已前已經唔玩便攜耳放，但閑來無事，就過返一下心癮。

我手上都有兩對比較難推既入耳式耳塞：Etymotic ER4S以及Ocharaku Flat4-KURO。雖然圖片入面都有好幾部器材，但今次就主要講講用我部iBasso DX90夾下唔屬於我自己既Audio Design PEHA-100以及Lehmann Traveller既感受啦。

(1) Audio Design PEHA-100

Audio Design係一間日本品牌，有唔同類型大大小小既產品，而其便攜耳擴PEHA-100應該係比較新既產品。

我對於PEHA-100既印象頗正面。PEHA-100聲音偏光亮，速度感強，但最特別令我覺得有意思既係其音場。PEHA-100配上大部分入耳式耳塞都會有一種開揚感。機主講過配對得宜的話，入耳式耳塞亦能有離耳既感覺。即使係EarSonics SM3V2呢對定位較為埋身既耳塞亦能交代出一個相當唔錯既音場，係變得更大既同時亦更完整，更開揚。

但呢部並非最高階最頂尖既便攜耳擴，其主要缺點在於聲音完成度未算最高，以及唔同頻段比例有少少古怪，細節量以及整體音色/調音連貫性未達至第一流。今日小聚配上Ocharaku Flat4-KURO感覺唔錯，但係配上Etymotic ER4S則唔太理想，整體過於偏向上盤，有少少刮耳，不甚耐聽。

機主亦講過呢部耳擴驅動小耳牛效果不佳，試過手上既beyerdynamic T51p亦有似感覺，上述缺點會變得幾明顯下。也許耳塞耳牛表現相差咁大係同其所表示既低推力有關。

不過PETA-100既音場加成以及個種開揚既聲音，以我玩過既便攜耳擴黎講，係只此一家。

(2) Lehmann Audio Traveller

至於Lehmann Audio Traveller，則係名牌Lehmann Audio第一部便攜耳擴。我自己本身對於Lehmann呢個耳擴品牌有好大好感，而相對於其最出名既Linear耳擴，Traveller音色相對年輕，無左Linear個種老成既同時聲音亦比更具速度感。

以前試玩過Traveller一次，當時用上Red Wine Audio iMod作為訊源，用上Sennheiser IE800，係我相當喜歡既一個組合。係我自己既排行榜內，RWA iMod+Lehmann Traveller+Sennheiser IE800係我最鐘意既便攜IE800方案。不過我自己對IE800早就賣左，所以今次就配配手上呢兩對比較難處理既耳塞。

配上Flat4-KURO以及ER4S雖然效果都唔錯，但間唔時會覺得偏乾身。係同唔同耳塞配對既時侯，我覺得Traveller泛用性高，同能夠令大部分耳塞驅動得更好，但係除左IE800以及好似都未有其他組合令我覺得有化學作用。

(3) 楓大FL3

楓大FL3係仿美國Triad Audio L3既耳擴，但就體積作出縮減，係線路上亦有改動。其實都幾難說明我對於呢類型既仿製品既喜惡。一方面原廠生產於固定成本投入相對較大，而導至製成品價錢要標得較高去圍皮；但另一方面如果仿製品比起正品平近80%，甚至可能如beyerdynamic A1與其仿製品價錢相差90%。要心悅誠服完全支持大廠，站在消費者角度就也許比較難講得通。不過呢個就題外話啦。

我有過Triad Audio L3耳擴頗長一段時間，單講聲音以及聽感，我認為因其聲音完成度，音場完整程度，以及其相當獨特、能夠令聲音染上一層鮮豔色彩既染色，除左其聲音因為比較Raw而唔夠細膩細緻之外，L3作為一台便攜耳擴接近有絕對優勢。不過其設計原始，差勁充電線路，笨重體積，加上我開始著重Head-fi既隨身性，令我最後都係賣左。

至於FL3，說來可惜，雖然變得相當便攜，但聲音對比Triad Audio L3失色唔少。最大分別在於低頻。FL3低頻以及全頻段聲音豐盈程度大大不如Triad Audio L3，色彩亦相對L3無咁鮮明，音場完整程度亦弱於L3。雖然FL3價錢平上不少，就體積而言既便攜性提高，不過其充電設計以及無電池座兩點，基本上都令到FL3唔算非常好用既便攜耳放。

簡單黎講，楓大FL3係Triad Audio L3既音質弱化版本，整體音質還算唔錯，但無左個種幾乎係絕對優勢既特性。就配搭而言，FL3與Ocharaku Flat4-KURO以及Etymotic ER4S還算不錯。楓大FL3驅動Etymotic ER4S係係呢四台耳擴入面較為好聽，我比較喜歡既一個配對。

(4) Just Audio AHA-120

Just Audio則係一家英國品牌，主要產品分別係其大部Class A設計既AHA-120，以及小功Class AB既uHA-120，以及其連解碼版本。不過對於呢個品牌係咪重做緊生意就唔太清楚，其網站接近無用，只係得返Contact老闆Justin呢個用途。

AHA-120係一台我相當鐘意既耳放，可調增益既同時亦可調電流輸出。雖然其電流輸出調整原意係用作於Class A Bias既修正，但係我就點都開到最大既。電流調至最大既AHA-120聲音有個性，雖然佢高頻控制力唔算上乘，但其聲音優秀既速度感，乾淨及輕盈既表達手法，高頻以及低頻伸廷以及力度增加，令AHA-120同唔少入耳式耳塞都能夠配搭得宜。其輕盈以及乾淨聲音為一大特色，能保有聲音全面性既同時加上呢個染色既耳擴我暫時未諗到有咩其他選擇。

其中我最鐘意既係AHA-120驅動Ocharaku Flat4系列，試過KURO/AKAII/KAEDEII等型號，大大發揮到Flat4系列既潛能，聲音相當寫實，係我初聽既時侯有幾下幾可亂真，嚇到我以為自己思覺失調。AHA-120驅動beyerdynamic T51p亦相當好聽，在於係能夠保有beyerdynamic高品質聲音同時多加兩分狠勁。

不過，AHA-120驅動動鐵耳機如SM3V2則唔算太理想，而比較令我失望既係，AHA-120同Sennheiser IE800既配搭亦唔算討好。

總結

早前都有零星見過其他師兄講對純便攜耳擴有興趣，但市面上新款而價錢又合理既好似都唔太多。希望今次可以拋磚引玉令其他師兄師姐分享一下唔同既便攜耳擴，又或者其他一體機既耳擴功能啦

我對於RSA SR-71/SR-71A，Sound Potion Monolith，Cypher Labs Theorem 720以及MH Audio HA-01/HA-11都有興趣，奈何都未聽過。如果有聽過既師兄師姐唔介意簡單講講其聲音質素以及調音風格的話就好啦。



圖片解密：
Audio Design PEHA-100/Lehmann Audio Traveller/楓大FL3/Just Audio AHA-120
iBasso DX90/Toshiba F20/Ocharaku Flat4-KURO/Etymotic ER4S

USA2010

Lehmann linear 試過一次...但價錢唔合心水放棄左..但真係好正...
Traveller之前用iq去試...可能iq對推力要求唔大...分別真係唔大...

估唔斯路兄有toshiba f20我都有部...有冇試過LO去AMP??

Andykong

講埋楓大FL3 和 Just Audio AHA-120 啦，呢兩部在市面上想找試聽也非常困難，唯有靠師兄們的橫評才能理解了！

斯路

USA2010 發表於 2015-6-22 23:59
Lehmann linear 試過一次...但價錢唔合心水放棄左..但真係好正...
Traveller之前用iq去試...可能iq對推力要 ...

Lehmann Linear而家國內淘寶只要撞岩日子，好似只係3750人仔，係香港定價唔知點解同國內相差咁多。

至於Lehmann Traveller夾Ultrasone IQ原來唔太理想，真係可惜。印象中IQ相當唔易推，但有實力亦有潛能。唔知USA2010師兄而家點樣夾對IQ呀?

其實部Toshiba F20唔係我架，係我朋友話放埋落黎一齊影相好睇少少。今次就無玩部F20啦，不過之前有玩過下，我覺得F20有著相當舒服既聲音呢。

斯路

Andykong 發表於 2015-6-23 01:21
講埋楓大FL3 和 Just Audio AHA-120 啦，呢兩部在市面上想找試聽也非常困難，唯有靠師兄們的橫評才能理解了 ...

無問題，訓醒係主文度更新

不過無估到Andy師兄對楓大FL3好奇，印象中Andy師兄對於呢類仿製品唔太欣賞。

USA2010

斯路 發表於 2015-6-23 02:13
Lehmann Linear而家國內淘寶只要撞岩日子，好似只係3750人仔，係香港定價唔知點解同國內相差咁多。

至於 ...

淘寶...我只會最多只會買幾佰蚊既野...
始終對呢淘寶冇信心...

我用Dx90直推...當時試都本住買既心態..
但印象中分別唔大...所以放棄

F20聲音除左較為粗聲少少之外
真係一部好機黎..最奇特既地方係部機用HDD黎作儲存

我同樓上為師兄一樣都想知Just Audio AHA-120既聲音係點樣...

Andykong

斯路 發表於 2015-6-23 02:15
無問題，訓醒係主文度更新

不過無估到Andy師兄對楓大FL3好奇，印象中Andy師兄對於呢類仿製品 ...

我自已不用仿品，朋自友問意見也不建議，也就僅此而宜，有朋友用緊的我不會因此而當睇唔到的，一齊玩也不會因些而玩唔埋的吧。

FL3/L3 正品也找不到聽嘛，所以唯有仿品的橫評也有殺錯無放過的！

斯路

USA2010 發表於 2015-6-23 07:27
淘寶...我只會最多只會買幾佰蚊既野...
始終對呢淘寶冇信心...

賣咁平個幾間係認証商家，有一兩間我有接觸過，基本上我覺得還好，同eBay相比我覺得係半斤八兩。不過我認同淘寶係有唔少古惑商家係度，所以都係小心為妙啦。

其實Toshiba F20年代唔少機都用HDD作儲存，而且都有唔少好聲例子，不過隨住時間流逝，唔少都被淘汰，少數幾部則被神化，好似Kenwood HD30GB9/HD30GD9/HE30GD9EC等等。大部分缺點都係低燥較大，不過當時初燒覺得真係相當好聲架。至於Toshiba F20我印象中並唔算特別粗聲，未知師兄個部有無換過HDD呀?

Just Audio AHA-120聽感客後補上。另外因為排版好似有少少亂一陣都會更新一下主文。

斯路

Andykong 發表於 2015-6-23 11:10
我自已不用仿品，朋自友問意見也不建議，也就僅此而宜，有朋友用緊的我不會因此而當睇唔到的，一齊玩也不 ...

我有過Triad Audio L3頗長一段時間，對比楓大FL3兩部其實聲音都幾唔同下。雖然楓大FL3話就話參照L3，但不過亦有作修改，便攜性因為體積減大提高，不過設計一樣原始。我認為單講聲音以及好聽程度的話，Triad Audio L3係便攜耳擴黎講幾乎有著絕對優勢，不過其造功之差，設計之弱，就未必個個都會喜歡啦。

USA2010

F20係人地比我...但應該就冇換到HDD
但我rockbox左可能影響左....不過雖然我話粗聲...其實只係在細緻方面差少少咁解

原來部楓大FL3係彷Triad Audio L3
早排先諗住搵下部L3有冇得試但結果都係冇