世榮撮合 Beyond 年底開騷

pochacco161

【太陽報專訊】自 Beyond 的靈魂人物黃家駒去世後，有關 Beyond 的是非不絕於耳，當中黃家強和黃貫中更一度擘面！本報收到消息，甚少發言的葉世榮透露三人有望破冰，相隔七年在年底合體舉行真正紀念家駒的慈善騷，以宣揚家駒愛心精神，證明兄弟情不變！

於 1983 年成立的 Beyond 一直是樂壇搖滾班霸，雖然靈魂人物黃家駒不幸於 1993 年墮台身亡，但黃家強、黃貫中（Paul）和葉世榮仍繼續以三人組合的姿態發展。直到 2005 年，三子舉行完告別演唱會後便宣告正式解散，最後一次同台已是 2008 年的事。然而在家駒去世後，圍繞 Beyond 的是非從未間斷，當中家強和Paul的牙齒印更是多不勝數！家強曾多次強調，Beyond 不會再合體。對於種種是非，世榮如同局外人般沒有發聲。可是，近日世榮卻打破沉默，更宣布三人將於年底合體再開騷，這將會是他們相隔七年再次同台！

邀同期樂隊合力撐

世榮向本報表示，近日在網上得知有人以紀念黃家駒為名，於今年家駒生忌當日舉行紀念演唱會，據知由世榮一手帶出道的樂隊 Ever 亦有份演出，對此他有感而發：「最唔開心有份演出嗰個人係我識，但事前冇知會過我，連家駒家人都冇通知，雖然都多謝仲有咁多人掛住家駒。但我覺得啲小朋友唔識禮貌，雖然佢哋有心搞，但一定都要通知家駒嘅家人，希望佢哋之後做人處事會成熟啲。」他又指一直以來，很多歌迷都期望他們可以合體開騷，隨即自爆年底有意在紅館舉行一場真正紀念家駒的慈善演唱會：「今次我會做發起人，已經着手籌備，到時仲會邀請 Beyond 同期嘅樂隊組合力撐，好似太極、草蜢、達明一派。」

宣揚家駒愛心精神

世榮亦強調希望藉演唱會宣揚家駒的愛心精神：「可以教下一代包容同愛，喺我心中家駒係不死，相信佢知道我哋嘅理念都會好支持。」談到開騷最大的困難是拉攏已擘面的家強和 Paul，世榮表示有信心說服他們：「相信以家駒名義搞演唱會，佢哋會放低成見，一齊做好個騷，日內都會約佢哋兩個出嚟一齊傾，畀啲時間我哋。」但他亦慨嘆重組 Beyond 需要很多配合，不是一朝一夕的事，所以今次算是重聚，但有信心可以做好這個騷。再談到早前家強爆料謂 Beyond 解散原因是Paul不想再養世榮，世榮說：「嗰陣後生，口不擇言，個個都多嘢講，有時講咗啲嘢傷害到人哋都唔知，其實我都唔知佢有冇咁講過，不過我都唔會放心上，無論講啲乜都唔會摧毀我哋幾廿年嘅兄弟情。」另外，記者昨日就家駒紀念騷一事致電樂隊Ever主音，惟截稿前未有回覆。

太陽報作者 音樂組 | 太陽報 – 2015年5月16日週六香港時間上午 6:10

小瑟

係咪堅呀？？勁正？？
(Post76 Android 手機版送出)

245141525

作為fans，當然好希望見到偶像嘅演出。
如果最後成事，希望出返嚟嘅係有血有肉嘅BEYOND，而唔係為錢、夾啱時間走出嚟敷衍樂迷嘅BEYOND。
不過恩恩怨怨、是是非非，局外人真係唔知咁多......
亦都唔係係咁二講幾句就可以解決嘅問題......
(Post76 Android 手機版送出)

alleelarry

印象中世榮講過：你地FANS想姐，但有無諗過我地係台上既感受！

點都好，隨遇而安，FANS們都係會支持既！