3月推介 《Ori and the Blind Forest》— 獻給核心玩家的心靈雞湯

@肥狗仔@

曾幾何時，打機係一種要動用到攻略去協助的娛樂，但隨住哩筆生意愈做愈大，遊戲商開始為吸引更多玩家而選擇將遊戲難度降低。時至今日"過關"﹑"爆機"哩啲代名詞經已貶值得可以經常掛在咀邊。不過上得山多終遇虎，早在09年，From Software就搵到一條方程式可以激發起玩家潛藏已久的果種 — 求生不得求死不能的原始機癮，那怕要死上百次先可以殺死一頭Boss，玩家亦願意為遊戲付出早已遺忘的激情。而就喺今個月頭，@肥狗仔@萬萬想不到會繼Souls系列之後，遇到好似《Ori and the Blind Forest》哩款打到手殘的超核心向遊戲。

而我不知道點解只有簡體字

簡單黎講，《Ori and the Blind Forest》其實就係一款冇咩特別之處的橫向動作game，最多係混合埋技能樹哩啲升級要素。一眼望落，視覺上則比較吸引，遊戲除咗由美輪美奐的手繪畫風所構成之外，故事亦相當摧淚，講述外貌似小羊的精靈Ori因為一次意外成為了孤兒，幸好被居住於深山﹑ 外型似卡比獸的生物Naru所救，此後兩人過著父子般的生活，但歡樂時光過得特別快，生命之樹的能量被巨型大鳥所奪，大自然失衡，就算係力大如牛的Naru都抵不住飢餓而死去。傷心欲絕的Ori為了拯救滄生，決定踏上無盡旅途。試問咁窩心兼悲傷的opening，又點會唸到接下來的十粒鐘，會係唔相襯的地獄之旅?

"愛"字環繞著整個故事，在Ori中，愛可以獲得勇氣，也可以因愛成恨....

"難度"係本作的關鍵字，遊戲並冇十分強勁的怪物，但佢果種滿佈致命機關的關卡設計先叫人髮指，究竟有幾難，請睇吓下面條片。


上述創舉係經過5~6次死亡後才能過關，然而苦盡未必可以甘來。當你以為過到check point的時候，你會發現遊戲的存取點實在寥寥可數，而真正的儲存點就落在Ori身上的靈魂能量，該靈魂能量一般可以作兩種用途: 一是出大絕，二是儲存進度。換著是其他遊戲，這些隨身帶著的存儲點大概非常破壞平衡，但換著係”Ori”，該設定絕對係玩家心靈中的安慰，當中已經未計靈魂能量其實係屬於消耗品的一種...無可否認，這種對玩家有技術要求的遊戲，其挑戰性及隨之而來的成功感的確比一般遊戲更高，不過比較奇怪係遊戲的難度並非按進度而逐漸提升，有的關卡可能係easy-normal級別，而更多嘅地方屬於瘋狂難度，沒有一定規則。玩一隻game可以感受到甜酸苦辣，Ori算係第一隻。

有如神來之筆的美工令遊戲生色不少，治癒系的畫風為勇者們帶來前進的動力

好喇，關於難度的問題就暫時放埋一邊。最初接觸嘅時候，遊戲極之偏重動作，Ori身上的光球有如浮游炮般在一定距離下自動追蹤目標，但Ori的身體就需要玩家的高超技巧來避開敵人，又或者通過敵人的攻擊來彈射(可用於反擊)到高處。老實講，論動作這隻飛簷走壁的羊仔身手拍得住龍隼，好似上面提到的鬼冢級關卡某程度上唔單止要為難玩家，仲將80, 90年代遊戲的果種一失足成千古恨的緊張及壓迫感重現在玩家眼前。

遊戲設有技能樹，要搜集所有用以升級的能量核心，玩家必須要打通所有隱藏地域

@肥狗仔@花了11小時爆機，死亡次數與死法實在不能盡錄

隨住劇情發展，玩家需要動吓腦筋解迷，在無任何提示下連@肥狗仔@都差唔多要放棄，唯獨遊戲那種獨到的美工加上動聽的迷人樂章，使到再難應付的難題都份外有感染力。部份要應用到重力原理的解迷要素，設計上唔會比其他以解迷作主導的遊戲輸蝕，感覺十分驚喜。

"哩個係咩機關?" 腦筋唔太靈活的本人用一日時間才唸通

遊戲可以讓玩家在沒有敵人的情況下儲存進度，但好多地方其實係要求玩家0損傷通過，真係連透氣嘅機會都無。(Ori的HP值在某種怪物及機關下形同虛設，所以敵人攻擊力等情報玩家通常要用"死亡"黎獲得)

即使哩款《Ori and the Blind Forest》比想像中要好玩，亦扭轉唔到XONE今年上半年冇獨佔大作的事實。幸好遊戲與主機的銷量好多時都唔直接影響玩家享受遊戲，以一隻賣百幾蚊﹑而又咁精彩的作品黎講，本作算係抵玩至極果批。再講Ori亦好難用確實的感覺去評好壞，從一般玩家的角度，佢係又一款"中伏"作品，封面係可愛的羊型精靈，玩落先驚覺原來係小肥羊嘅地獄麻辣火鍋。考慮核心向的問題，要我推薦本作比76的各位都需要一股勇氣。只能夠話《Ori and the Blind Forest》由十多年前的動作架構與收集解迷結合而成，如果想重拾細個打機時的感覺，本次的3月推介或者會避免到唔少滄海遺珠的情況。在本人角度，這是一場值得花百幾蚊換取的旅程，然而金錢頂多算係入場費，玩家仲需要有必死的自信去與Ori走完這場帶有淚水的救贖之旅。

*《Ori and the Blind Forest》現已登陸XONE及Steam平台，所以PC玩家一樣可以玩到呢。

johnlau

嚟緊應該就快patch, 等到patch左先繼續玩返先

@肥狗仔@

johnlau 發表於 2015-3-26 10:21
嚟緊應該就快patch, 等到patch左先繼續玩返先

放心，我玩咁耐冇遇到咩bug~

henryhh

3月太多GAMES玩, 暫時唔買住, 等有DEAL先

s1011125

哈哈,好似幾正甘..
不過我都係等steam deal再買
3月出左太多正game

原明

等多陣先玩呢隻！

googleli

呢隻真係堅正