如果想睇到更多76師兄嘅分享，快啲登入成為會員啦！
您需要 登入 收看或下載更多內容。還未成為會員？成為會員
x
本帖最後由 @肥狗仔@ 於 2015-3-13 09:35 編輯
雖然唔想承認，但WiiU的確係最早投入市場的第八代家用遊戲機。轉眼之間WiiU已經入手兩個月，草草完成了11款遊戲(包括Wii部份舊作)。可能有人會問點解一個好似我咁嘅任天堂噴子會自打嘴巴購買老任的主機，其實主要原因係據說Star Fox將會推出WiiU新作，而且唔係外包遊戲。最後經過一番心動後便決定行動。所以證明只要有game出，萬大事有商量。
對於這部正處於水深火熱之中的"次世代"主機，長時間接觸後WiiU比我感覺仍然相當尷尬，機身冇特色之餘(貌似內地老翻王的機殼)，最搶鏡的WiiU gamepad實際上亦唔算係本命。一旦遊戲人數多於一人，咁你仍然要動用到有8年歷史的Wiimote及傳統遊戲手掣。根據@肥狗仔@的遊玩經歷，只要你家中仲有一部電視，咁總有一款遊戲會令你覺得gamepad係多舊魚的，真係前無古人。
部份好似Wii Sports Club的遊戲更以Wiimote作主要控制器，將gamepad映襯得像小三小四一樣。真心若果當初老任將gamepad當成Wii的新周邊，相信會比以"WiiU手掣"的身份示人更易獲得成功。無奈Wii性能起點低，480p畫面實在無法再喺console市場上立足。
手掣定位有時亦叫人摸不著頭腦，冇記錯任天堂將這個"大mon"描繪成類似統領後宮三千的皇后一樣，以《Super Mario 3D World》﹑《Super Mario Bro U》為例，假設其中一人以gamepad遊戲，咁佢就可以通過屏幕創建踏台又或者召喚變身物件到場上，有關功能其他玩家就無福消受喇，變相做就了一場不太平等的遊戲。縱使玩上述遊戲時大家都可以開開心心，但換著係競爭性更大的核心遊戲，好難想像這種一機只能對應一隻的gamepad係如何破壞平衡(不論優勢/劣勢)。
內置app方面，WiiU/3DS那專為玩家提供分享交流的平台 — Miiverse用起上來十足Twitter般。的而且確，哩種原始造法比起其他主機更容易集中一班"玩家群"在主機上討論遊戲。但要做到一個能談笑風生的真正網絡社群，WiiU仲有好長的路要走。這也是為何PS4/XONE執意要將玩家的分享推向個人電腦或手機平台而非遊戲機本身。
話分兩頭，本人在未入手之前早已對gamepad的手感有一定心理準備，所以撇除上述問題，玩上手其實還可以接受的 (針冇兩頭利，玩法同手感好難共存)。 而且始終佢原生就可以off-TV咁玩，唔似得PS4咁要另買一機。寬橫的機身亦比起PSV果種窄小的容易掌控及按鍵。而gamepad的存在價值好大程度取決於遊戲，套上阿Q精神，主機本身不夠強大，至少也成就了遊戲的強大，這就是WiiU比我的感覺喇。以下係本人對已玩過的WiiU/Wii遊戲的少少玩後感，當中解釋到點解我會對這部問題多多的主機180度改觀。 (因為有成十一款，字有點多唔好見怪，反正大家都慣啦。)
The Wonderful 101 個人評價: 9.7/10 (神作)
玩完這款神谷英樹的作品後真心後悔當初自己睇小咗佢，眼見個樣同《The Last Guy》或者《Pikmin》等遊戲有三分相似就貿然將佢地group埋一堆。事實上《The Wonderful 101》與《DMC》﹑《Bayonetta》同屬硬派動作遊戲，質素仲喺這些老前輩之上。
其他野唔講單單係本作的game concept已經先聲奪人。表面上玩家操作著Wonderful 100的英雄們，但其實係百為一體， 玩家通過在gamepad上畫出不同符號，Wonderful 100就能使出相對應的Unite Morphs，繼而合體成不同武器作戰，最大程度地突顯出“Team Sprit”的精神。
以往好多動作遊戲的QTE皆為千篇一律的撳掣及低級腦力練習，興奮一時卻難以爽足一世。與一般戰爭類近，《The Wonderful 101》的QTE系統同樣要求玩家在gamepad上畫圖(玩家可選擇用joystick畫，如果你有信心可以一步到位的話) 以召出不同Unite Morphs對抗敵人。考慮到畫圖的出錯機會比傳統QTE更高，技巧及變數大了，即使失敗從來，感覺也是全新的挑戰。
而每當遇到敵人重擊，英雄被打飛後，玩家必先要四處跑整醒暈倒的英雄先可以繼續反擊。此舉直接或間接地影響了遊戲的成功與失敗。"萬人為英、千人為俊，百人為豪、十人為傑" 相比起純粹扣血，本作的設計固然提高了難度，卻又起到點題作用。畫面上那細小又密集的小英雄仿佛向你呼叫著: 「你不是一個人!」。
記得遊戲未推出之前，曾經有自稱小道消息指遊戲又係類似《Vanquish》咁六七粒鐘爆機，結果@肥狗仔@花近18小時先完成所有流程 (遊戲另設多人合作模式)。不誇張的說，本作係我近十年玩過最完整的硬派動作遊戲，整個遊戲流程滲透住史詩式的氣味，且並非單純得個打字，遊戲有一條頗有深度的主線還有抵死幽默的對白。 Wonderful 100的英雄們各有自己的性格及過去，當中所產生的火花出乎意料地精彩，最終Boss戰更有幾分勇者王的神韻。
對於睇重關卡設計的本人黎講，《The Wonderful 101》一改了之前《Bayonetta》的缺點，將普通遭遇戰 / QTE / Boss戰 / 小遊戲 及神谷英樹最喜歡的打飛機關卡共冶一爐，平均分配在每個章節之中，令遊戲流程不乏高低起伏，沒有任何一個部份出現喧賓奪主。最難得係那怕去到最後一個章節，遊戲仍keep住為玩家送上全新敵人，全新的小遊戲，反映遊戲的內容係幾咁龐大。比著係《Bayonetta》，踏入中後期連Boss戰都不停loop。
講到Boss戰，《The Wonderful 101》絕大部份的Boss都係哥斯拉級別(體型)，與之戰鬥感覺比起戰神有過之而無不及，隻隻耐打，隻隻震撼。此外gamepad都唔係得個畫字，部份解迷及操作巨型機械人關卡，玩家要一眼關七，望實兩個mon黎進行複雜操作，雖然有時都幾煩人，但都不失為一個十分有趣的人機互動體驗。
其實這款《The Wonderful 101》本人都係最近先爆，事前從未唸過哩隻cute版畫風﹑ 售價$240的特價遊戲會係如撕神作。回望近幾年日系硬派動作遊戲的發展，我地見到被鬼佬搞垮的DMC仲有被傻仔主理的忍龍; 縱然本作的風格化非常利害，不宜直接比較，但論遊戲的創意﹑內容﹑手感及完整程度，@肥狗仔@自忍龍2之後已經好耐冇見過這種可以真正稱得上"大作"嘅日系作品喇。《The Wonderful 101》絕對係我玩過PlatinumGames最出色作品，也是WiiU的最強遊戲，為佢出機都值得。(熱血mode)
Super Mario 3D World 個人評價: 8.9/10 (推薦)
當本遊戲的前作《Super Mario 3D Land》登陸3DS的時候，我滿以為只不過係3D Mario的掌機版本。誰不知玩咗幾鋪之後發現本作根本唔係64, Sunshine果種3D Mario，而係將傳統橫向動作版的關卡立體化而已。玩起上黎都幾大分別吓，但個人好buy這個3D World。可能先入為主，成日覺得Mario哩種遊戲應該要比較casual，而之前的Mario 64雖然設計得妙，卻因為核心"過頭"缺少歡樂與輕鬆的氣氛。相比之下3D World就恰到好處，保留了多人遊戲及經典的終點旗子設定同時，又以全3D形式展現Mario那色彩繽紛的遊戲世界 (此亦可歸功於720p+60fps)。關卡設計及全新配樂更旅見驚喜，玩時既刺激又開心。《Super Mario 3D Land》可以話係本人玩過最好的Mario遊戲，哩家唸返仍唔覺得誇張。
進擊之蘑菇隊長 個人評價: 7.9/10 (推薦)
上年E3公佈時我已經唸如果入手WiiU，一定要買埋哩隻以Toad為主角的《進擊之蘑菇隊長》。將cube創作成地形關卡的遊戲其實唔少，不過老任的強項就是將另類的點子注入自家的遊戲上。蘑菇隊長在"挑戰", "創意", "耐玩" 三方面都取得唔錯的平衡。尤其是gamepad操作部份，唔單止改變鏡頭位置及移動物件，有時Toad會坐過山車，玩家此時須要手持gamepad當作scope咁發射蘑菇，非常過癮。不同於Mario, 由於每關都發生在一個方體/有限的地方，玩家收集鑽石的意欲相對提高。唔似得Mario咁連生命都保唔住，何談儲星星。有褒自然唔少得貶，接近80關(?)的解迷內容，每個章節往往只有兩個BOSS招呼玩家，而這兩隻BOSS已經貫穿整個流程，總共出現了六次之多。雖然內容各有不同，但對比其餘幾十個各具特色的關卡，重覆的BOSS戰特別礙眼。
Pikmin 3 個人評價: 9.1/10 (必買)
除咗紅白機時期的"三朝元老"，其實任天堂一直以來都有嘗試創造全新的角色及遊戲。但唔知係咪因為Mario家族這個光環太耀眼，好多原創人物都被打入冷宮，而《Pikmin》算係少數能夠存活的遊戲之一。玩上手的感覺亦喜出望外，高清畫面向每吋土壤注入細緻，玩家指揮顏色鮮艷的小精靈，並在限時內排除萬難，玩法算不上創新，但整個氣氛及表現上卻顯獨突。而gameplay更出乎意料地核心向 — 搵路解迷﹑ BOSS戰又要講求觀察力及戰略，那怕主線任務唔長，當中衍生出黎的收集元素﹑多人合作/對戰(仲有DLC)已經夠你玩幾個月。
Nintendo Land 個人評價: 7.2/10 (可以一試)
與眾同樂的小遊戲合集，不同是這些小遊戲都是有"背景"的。其同樣以任天堂旗下遊戲為主題。老實講個人平時都唔願花時間在這些小遊戲之上，不過《Nintendo Land》的性價比確係吸引。其集《Wii Party U》及《Game & Wario》於一身，當中大部份遊戲針對兩人以上合作/比賽，毒撚的話，遊戲仲提供了一定數量的solo play, 全部都充分應用到gamepad功能(個人最愛忍者飛標)。小弟買的同捆裝就係包含咗哩隻抵到爛的遊戲，係居家必備的party利器也。
Wii Sports Club 個人評價: 6.0/10 (唔買冇損失)
Wii平台的原祖級Killer Software — 《Wii Sports》相信就算冇機，大家在各種場合上都曾經接觸過。黎到以高清自居的Wii U，新版Wii Sports順理成章地繼續翻炒搶錢。《Wii Sports Club》與第一代Wii Sports一樣收錄5項運動，其中棒球及高爾夫均加入gamepad操作。前者以gamepad代替接球動作，後者略兼搵笨，只係以gamepad screen顯示高爾夫球來完成牽強的人機互動而已。不過最搵笨都莫過於這款命名為"Club"的新作竟然唔包含《Wii Sports Resort》的運動。雖則話玩家可以在WiiU上玩返舊版Wii Sports, 但忍受不到標清畫面的朋友就真心冇得揀喇。
Wii Fit U 個人評價: 7.3/10 (可以一試 for 肥仔/師奶)
若果唔係HK Records做特價，@肥狗仔@可能一世都要與"肥字"掛上等號。早在Wii時代，當玩家得知原來Wii Sports唔可以用黎減肥的時候，老任好快以新產品挽救其"健康主機"的形象。新版的《Wii Fit U》與《Wii Sports Club》一樣，根本上就係個高清版本，再加入需要gamepad操作的遊戲。其實哩種鍵身遊戲，用好唔好玩黎形容未必適合，始終事後的汗水與淚水先係最好的review，在這點上，本作絕對係高分之選。部份純粹講求平衡力的遊戲更意外地有趣，即使唔係用黎健身，當作全身小遊戲玩都值回票價。
任天堂明星大亂鬥U 個人評價: 9.0/10 (必買)
《大亂鬥》可謂最能代表任天堂遊戲精髓的一次完美示範 — 易學難精。首次遊戲會覺得門檻好低，男女老幼都可以得心應手(反正就係狂撳吧)。不過時間長咗，尤其是與國外玩家對戰後先發現遊戲其實需要以玩街霸的心態看待。"鳩打"的背後玩家仲要了解每個角色的招式及地形的設計方能獲勝，並達至亂中帶序的最高境界。考慮到本作的關卡平衡度及博大精深的動作要素，話佢係年度最佳遊戲都不為過。(至少係我玩過2014年最好的遊戲)
Wii
Wii在第七代主機大戰中雖然係最早退市的一個，但亦都係最春風得意的。過億台銷量為任天堂贏來名利，同時又帶來罵聲。事實上在上一代機的中段時間，任天堂的第一方陣容已經顯得後繼無力。部份已入手其他主機的玩家到了後期就再唔願意放低手中的PS3/X360手掣轉行改玩雙截棍。難得購入WiiU，而又巧遇本主機能夠向下兼容Wii遊戲，所以主機到手後本人便馬不停蹄地從不同途徑補回在Wii時期未入手的心宜遊戲，特別係那些被稱為滿分大作的都被我一網打盡。可惜玩完之後結果往往係驚大於喜。
Mad World 個人評價: 不予置評
冇記錯係PlatinumGames的處女作，黑白色漫畫風再配以血腥暴力堪稱遊戲界的《Sin City》。不過理想歸理想，現實往往比想像中殘酷100倍。黑與白的強烈對比在480p的"加強"下，遊戲所呈現的每一粒pixel都令我感到非常唔舒服。再加上PlatinumGames對"God Hand"情有獨鍾，係都鍾意玩身後視點。每轉一圈，鏡頭陪你玩海盜船。最攞命係gameplay一啲都唔有趣，只係要求玩家通過體感操作，不斷以相同技兩殘殺唔識得反擊的敵人，毫無刺激感可言。上面提到同樣出自PlatinumGames手的《The Wonderful 101》，質素與本遊戲相比一天一地。
Super Mario Galaxy 個人評價: 8.5/10 (推薦)
雖然被唔少玩家封為2007年的GOTY，本作亦好難叫人向宮本茂樹起大姆指。繼承了64的優良傳統，Galaxy無論在遊戲性上或者是關卡創意上都冇得輸。Wiimote手掣亦豐富了Mario以外的遊戲互動及雙人合作。然後問題黎喇，多得這個Wiimote體感手掣，遊戲接近3成的內容，玩家都不是直接操作Mario而是與角色外的關卡互動，這雖然得意但對遊戲代入感打了個5折，我有時甚至會質疑究竟自己係控制緊Mario去闖關定還是幫緊Mario去闖關。
禍不單行，貌似製作組只懂做內容，但卻不懂如何將一大堆內容有效地編織起來，打造出有節奏感的遊戲流程。Galaxy以摘星作為過關條件，但每個星系入面往往隱藏了至少4粒星星。更甚者，每當搜出一粒星星遊戲就會結束，玩家唔能夠好似一般2D Mario般緊接向其他星星進發。換言之，要將所有星星同伴收歸摩下，唯一方法就係造訪同一星體4次。
星星的問題由普通關卡連累到最終BOSS戰，因為出現在同一星系的星星都位處一個至兩個全新地段而非單純收集。除非下毒誓要100%通關，否則一般玩家根本唔清楚究竟要儲幾多粒星星先算係打通哂該星系的所有地區(仲未計隱藏地域)。最誇張嘅一次，當時遊戲仲有一個包含四個星體，卻無任何BOSS戰的"支線"銀河系未被涉足，而@肥狗仔@所收集的星星就已經足夠取得最終BOSS戰的入場卷。可惜為時已晚，遊戲前部的一大堆重複的流程早已令我燃燒殆燼。眼見面前就係終點，咁我仲點會走回頭路入又一個深坑呢?
好多人唔介意有重覆收集元素，話咁先係物有所值，有挑戰性。喺我角度，雖則話因為戰死而重新挑戰係遊戲當中一種必然的樂趣，不過既然普遍玩家都唔喜歡在戰鬥中經常戰敗﹑經常要面對同一隻打不死的敵人，咁其實無理由要我欣然接受一隻要重覆遊覽黎刷成就感的遊戲。《Super Mario Galaxy》可謂係曹操眼中的雞肋 — 食之無味，棄之可惜。若然續集都係咁嘅樣，相信屆時本人未必可以鼓起勇氣迎接下一次的3D Mario之旅。
薩爾達傳說: 黃昏公主 個人評價: 9.5/10 (神作)
N64《時之笛》係我讀小學時候的回憶，亦基於難度比較苛刻的關係，哩段回憶並唔完整，最終都與"爆機"擦身而過。事隔多年終於與林克再續前緣，結果聞名不如見面，一玩60粒鐘，滿足程度不亞於GTA。
《黃昏公主》的佳好難用筆墨形容，真係好難。"精密"或者係我認為最好的形容詞。簡單啲黎講本作就係一部龐大得超乎想像的作品"。佢可以將相等於六部Mario — 設計精良的關卡迷宮集結於同一款遊戲上面。當中最妙之處係迷官的各項設計都係針對住玩家所接收的裝備黎創作，且絕非曇花一現，而係一系列心思熟慮﹑ 佈局精深得叫人五體投地的鬼斧神工。對於喜歡解迷的朋友，哩部作品可謂國民級的遊戲天書。
連續玩咗幾隻Wii game，就《黃昏公主》的品質最叫人滿意，亦都可能係@肥狗仔@玩過最出色的遊戲之一。唯獨相見恨晚，現在已經係2015年，慨嘆好遊戲終究只能突破時代限制，卻未必可以讓所有玩家所認識，我就係一個人板喇。
BTW，有一個想吐槽的地方，《黃昏公主》本身唔係原生針對Wiimote設計的作品，使用Wiimote+雞脾作戰同讓賽冇分別，尤其是在部份需要頻密出招的戰鬥中，你會發現原來作為萬物之主，人類真係及不上一個AI。
總結
就算係任天堂粉絲都要接受的一個現實，就係WiiU現在已經與第三方脫離了關係 (好吧，至少佢仲有年貨賤兔)。不過單靠老任自家及第二方獨佔遊戲就真係唔值得入機嗎? @肥狗仔@會答你絕無此事，可以話這幾個月裡面，WiiU帶比我的歡樂並非什麼有"瑕疵"的硬件等藉口所能掩蓋，過中的精彩甚至比PS3那堆第一方大作還要強烈。睇返老任的換代史，WiiU大概會在兩年內退市，希望這部被外媒形容為任天堂最失敗主機可以在大限來臨之前盡全力發光發亮，唔好再搞咁多周邊或者係唔關gamepad事的遊戲喇。 | 
[複製鏈接]
發表於 2015-3-3 13:14
樓主
發表於 2015-3-4 10:22
