笑匠是怎樣煉成的？－甘小文

michael

[YoutubeHD]GRQNmec_Z5U[/YoutubeHD]

文：MenClub Patrick　　圖：MenClub
http://www.menclub.hk/people/2296

筆者有睇開facebook上「80s人和事」等懷舊群組，發現關於港漫的post，講得最多的不是《龍虎門》、不是《風雲》，而係《玉郎漫畫》入面的《太公報》，其中最深入民心的一句「柑蕉桔李碌柚，雁鷲鵰狸獅狒」，更加久不久就會被人回帶。

將這句經典粗口諧音gag發揚光大的《太公報》主筆甘小文，80、90年代通常被人直呼「小文」，但近年多了人尊稱他為「小文老師」，身份升呢了，可謂一代港漫笑匠。連他也說：「我哋畫笑話嘅，以前地位好似好低微，唔知點解而家啲人講親《玉郎漫畫》，都淨係會搵我出嚟講。」（編按：84年創刊的《玉郎漫畫》，由多位主筆聯合編繪，內容並不只有搞笑漫畫。）



無心機畫得精細
訪問甘小文當日，正值《風雲結局篇原畫展》舉行開幕禮，80年代在玉郎機構任職、而現在還留在港漫圈中的主筆，近乎都有到場參觀，唯獨甘小文仍身在他位於葵涌工廈內的辦公室，與一名助理為其新作趕稿。當年他非主流，今日，他仍是獨立於港漫圈。

「點解唔畫武打漫畫？畫唔到呀嘛！自問性格唔係咁。我都試過坐定定畫到啲畫到好精細，打晒陰影，畫晒風位，但係畫完一張好靚，第二張已經冇心機。反而我細個對《老夫子》嗰啲四格漫畫好有興趣，成日諗點解啲作者咁叻，四格就講到條橋，仲引到人笑。」於是他16歲中二綴學入行做助理，到21歲在玉郎機構升做主筆之後，便一直畫搞笑漫畫，從未改變過風格。


為人津津樂道了廿幾三十年的經典gag：柑蕉桔李碌柚，雁鷲鵰狸獅狒。



小文老師說他畫漫畫會花絕大部分時間度橋，反而真正動手畫的時間不多，就好像這幅送給MenClub的哨牙珍，由起稿到完成，不用3分鐘。

       
畫笑話不代表真人搞笑
後來《玉郎漫畫》創刊，找他畫搞笑漫畫。「唔知點解我細細個就好鍾意睇新聞，又會成日畫畫寫嘢扮報紙玩老師，所以咪諗到喺《玉郎漫畫》度畫《太公報》囉。」人所公認，笑話比武打橋段更難度，初時玉郎機構也有找編劇幫《太公報》度橋，但結果經常被甘小文改到面目全非，「我改得仲好笑過原本條橋，跟住上頭就任得我畫咩。」

說到這裏，當然要問到底「柑蕉桔李碌柚，雁鷲鵰狸獅狒」係點樣度出來？「有次無端端聽到同事噏呢句嘢，我就記低佢，扮看圖識字咁畫番出嚟，其實唔係我諗㗎！」所以，他說度橋最緊要係吸收外來事物。「好多讀者喺街見到我，會走埋嚟同我嘻嘻哈哈，佢哋以為我畫笑話，一定係講嘢好好笑嘅人，實情我有時都好沉靜吓，我靜嘅時候，就係觀察緊身邊嘅嘢。」據說周星馳、Mr. Bean扮演者Rowan Atkinson，甚至差利卓別靈等喜劇演員，真人都是比較嚴肅，大概這是笑匠的必要性格。       



最近小文老師為大陸漫畫家寒舞的《十萬個冷笑話》翻譯廣東話對白，是他的最新創作；早前還為主要在診所派發的健康書籍《下半身的幸福》畫插圖。


目前小文老師的主要個人作品，是為《AM730》、《鐵將縱橫》、《熱血少年》等報紙及港漫繪畫四格漫畫。

       
鍾意睇字的小文
由「甘小文」這個筆名（原名甘健文），到《太公報》入面的粗口諧音屎尿屁gag，甘小文從來都予人地踎低俗的感覺。但當我走進他的辦公室，卻發現一本本又大又厚的學術性書藉隨處可見，數量比漫畫多很多，老實說，我確實認為與他的一貫形象有好大落差。「我諗到最多橋嗰陣，就係成日睇文字書嘅時候，成日覺得寫書啲人諗嘢好天馬行空，跟住就吸收埋擺落我啲漫畫裏面，比睇其他笑話同漫畫仲有用。」
       


辦公室內有大量文字書，科學、歷史、經濟書及小說都有；漫畫主要只有浦澤直樹的作品，小文老師說視他為偶像，所以仍會收藏他的漫畫。



97年自資出版的《至GOAL無敵》大受歡迎，以致多年來不斷有人找小文老師畫足球明星插畫及出商品，更幾乎成為馬會御用漫畫家，連他都認：「一本書食足十幾年。」

       
要出書就要求變
近年小文老師除了替報紙及其他港漫繪畫四格漫畫外，還經常為馬會及很多商業機構畫插畫、出商品，這些工作已足以維持他的生計，但他依然在籌備自資推出個人新作，預計數個月內就會出版。不過，在現今低迷的港漫市道下，連他也直言對銷量的信心只是一般，仍然決定出書的原因係，「鍾意畫漫畫嘅人，點都係希望出書嘅！」

新作的內容，小文老師還在賣關子，只透露是古代故事，但會借古諷今，反映香港現況，因為他認為時事漫畫會係港漫一條新出路，搞笑漫畫亦要不斷求變、要有新元素。「時代唔同，你睇而家網上啲人，關心時事多過關心漫畫主角幾多，唔通我幾廿年都畫《太公報》、幾廿年都玩屎尿屁咩！」       


小文老師的繪畫工具已經比其他香港漫畫家簡單得多，但辦公室依然很有香港漫畫家的特色－－亂！


目前只有一位助理協助小文老師繪畫，新作屬百多頁一期的精裝書，製作時間已超過一年。「諗住畫好兩期先一齊出，費事出咗一期之後太趕，今年內一定出到！」

       
提到網民，原來小文老師都好留意高登、《100毛》等惡搞文化，兼且盛讚他們有創意、有深度。其實回想30年前小文老師畫的搞笑漫畫，玩的元素跟現時的惡搞也有點相似，稱得上是惡搞始祖。未睇過《太公報》、《至GOAL無敵》的90後、00後，不妨認識一下甘小文！

zidanedc

由細睇到大

michael

我都有看過, 已經成為其中一個童年回憶啦.