如果想睇到更多76師兄嘅分享，快啲登入成為會員啦！
您需要 登入 收看或下載更多內容。還未成為會員？成為會員
x
上星期一晚上終於有時間去了睇列尼史葛的出埃及記：神王帝國. 本身我好少留意一套電影係邊個做導演的, 基本上故事啱睇就會去睇, 不過當知道原來係由列尼史葛導演時, 都增加了期待感.
細個在小學時由於有宗教科, 所以先小就有接觸聖經故事, 出埃及記都係其中之一. 另外記得好細個時在明珠台睇過出埃及記, 雖然印象已經無乜, 不過記得果一套電影係好好好長, 感覺做極都仲未完咁.
講返呢一套"新版本". 第一個感覺係節奏好明快. 基本上無咩"dum"波鐘. 另外我睇的是IMAX版, 所以覺得成個場景都好壯觀 (同時覺得d演員幾辛苦哈哈~XD)
故事一開始摩西已經係埃及的將軍而無提佢的"來歷", 同佢兄弟拉美西斯(王子) 情同手足. 當時的摩西知道佢並不是法老王親生的兒子, 所以佢一直都知道佢本身係無可能繼成王位的. 反而拉美西斯有少少"遲早都係我做"的心態, 感覺比較"懶洋洋" (當然佢作戰時依然好勇猛) 當時埃及王同一班"議員"正在討論是否出兵, 由於埃及王是一個迷信的人, 佢問o左"埃及黃大仙"之後 (即係占卜), 無意中知道有個預言係"有一個人會救o左國家的掌權者, 而呢位人兄將來會成為掌權者" (詳細字眼已唔太記得, 總之意思係: 有條友仔會在戰場上救o左王子, 而呢條友仔將來會變成反骨仔對抗埃及, 法老王你自己執生啦~) 而剛好摩西在戰場上救了拉美西斯, 因此大家心中開始有少少芥蒂. 及後在一次出差工作期間, 摩西得知自己的身世, 而呢件事最終又傳o左去已經成為法老王的拉美西斯, 因此最後摩西被迫離開埃及而流放.
雖然是流放, 不過佢命中注定死唔去, 仲結埋婚生埋仔, 本來過住好平穩的生活. 點知佢一次上山時見到上帝. 上帝同佢講要佢率領六十萬名以色列人奴隸離開埃及. 起初佢都唔願意, 不過老闆叫到都要做啦, 於是同佢巴打法老王傾. 比著係我, 無啦啦要拎走我國家大部份的勞動人口, 我都一定唔制啦, 於是上帝就用十災迫法老王就範. 十災的場面拍得好流暢, 因為我記得聖經內係每出一個災害, 摩西就走去同法老傾一次, 即係同一種場景應該出現10次, 但導演使用的手法我都好喜歡, 講成是由於某原因令河水變成血紅色, 水質影響之下, 產生了另一個災害. 每個災害好似chain reaction咁接連咁發生, 感覺比較科學化. 直到第10災, 上帝派手下去取去埃及每個家庭的長子生命, 令到法老王都失去了自己的兒子, 先至比摩西同佢人民離開.
當佢地離開之後, 法老王後悔了, 於是就派兵去追殺佢地, 摩西當然知道成件事唔會咁順利, 因此一直都認為過o左紅海先至安全. 而電影中紅海被分開了就講成是隕石做成的. 場面就好震撼. 最後的結局我覺得是精簡化了, 因為聖經內部講佢地未去到目的地前在野內生活了40幾年. 佢地的下一代先去到迦南地.
導演在上一套prometheus都有提過上帝是外星人一種, 都係"mortal", 而呢一套電影我自己覺得導演都無太刻意去神化上帝, 唔信神的人, 可以睇成摩西撞親個頭而產生幻覺, 而十災之中的頭九災可以講成是自然現象. (當然第10災都可以講成是某種病毒, 塗o左血在門外就無事. (當然再反駁, 可以問點解d病毒咁叻只揀長子落手而其他同屋的人又無事~) 另外有人會問, 做乜上帝咁血腥, 郁d就殺人, 要害咪害過法老王, 做乜要攪d市民. 講真我都有想過呢一點, 不過認真地說舊約聖經中的上帝又的確比較暴力d, 我會睇成: 假如真的是有"after-life", 死後的世界比依家的美好(無病無痛), 在我地眼中可能是被殺死, 但其實是先去享福. 當然我又唔會無啦啦走去死啦, 只不過人人都會死, 是係遲早的問題無得逃避. 另外又可以問, 點解d奴隸人口多埃及人咁多都唔反抗, 仲咁順攤? 只可以說古時的人未必有我地咁多機會去學自由是什麼吧. 可能佢地一出生就只知自己要工作, 聽人指示等等?
電影中另一感覺係, 除了法老王拉美西斯個樣似埃及人之外, 其他人都似"cosplay"緊咁, 唔多似埃及人. 另外異形女主角阿花姐都有出場, 不過成套戲只講了幾句對白, 唔算太突出~
最後總結就係: 如果熟識聖經故事的人, 睇起黎唔會覺得唔舒服, 同樣地無睇過的人, 應該唔會覺得太悶. 除非是一心由入場一刻開始, 就想成套電影不停咁打打殺殺, 爆炸, 死人, 主角爆seed + 出超必KO壞人的人, 否則都可以一看. 電影都有150分鐘, 不過除o左開頭一小段比較慢之外, 整套電影的flow都好流暢, 我就唔覺有咩悶場~ 如果同Prometheus比較, 我反而喜歡呢一套出埃及記多d~
|
[複製鏈接]
一名永遠的入門玩家, 對電影, 音樂, 影音等玩意永遠雀躍, 其後為了可以將這個毒海無涯信念推展開去, 故建立了這個毒人唔洗本的影音娛樂資訊平台
發表於 2014-12-17 10:49
樓主
發表於 2014-12-17 13:30
發表於 2014-12-23 22:56
)
