Winning Eleven 2015 感動登場

阿定 · 發表於 2014-11-20 01:10

本帖最後由阿定於 2014-11-20 09:08 編輯

2014-11-14 19.39.27.jpg

前言
香港地，會打機的男孩，邊可能未玩過Konami的足球Game，而其中最為大家熟悉的，一定係Winning Eleven，以我自己為例，由超任玩到宜家，花得最多錢的遊戲，一定非Winning莫熟啦，最瘋狂的時候，即係N64年代，一年買兩隻，真係會買窮人，而PS2年代，去Game鋪抄Save Update球員轉會亦都係一種樂趣，不過最近呢幾年，即係進入PS3/XBOX360年代中期，普遍人都認為對家作品比較吸引，轉會的機迷著實不少，而我亦成為其中一個轉會人士，不過對Winning的愛是不滅的，頭幾年都仍會兩邊買，兩邊玩，但到了2012年，不知是不是海嘯問題，質量變差，我買了也好少玩，上年2014更因為無出係PS4/XBOX One，令我非常失望，買都無買，不過今年出的Winning Eleven 2015正式使用新的Fox Engine重新開發，又令我重拾興趣一試了！

評價
首先，如果大家玩過Demo覺得唔太對路，無進步的話，我可以話比大家知，忘記Demo吧，Demo是害死人的爛遊戲，正式發售的版本完全是另一回事，好玩好多，畫面亦靚好多

今集WE2015畫面改進了不少，正式進入PS4/XB1的世代，進場畫面、過場動畫，慢鏡重播，都非常細膩，唔再係以前PS3時代比人只係Bug Fix的感覺，係真正重新做過的一隻好Game

由於我玩的係XBOX One版本，而上網見人地講PS4係1080P畫面，而XB1則只有720P畫面，我初時都以為無咩大問題，因為其它Game係兩部機上的分別其實都不大，但玩落就好後悔當初無揀PS4版本啦，因為in-Game畫面真係有點強差人意，唔係唔靚，但係就明顯唔夠細膩，Frame數略有不足，不過正如之前所講，進場、過場、慢鏡重播都無影響，Keep到1080P水準，球場光源處理亦唔錯，畫面同對家比，可以話有過之而無不及！

操作方面，Konami講過，佢地比對家更清楚什麼是足球Game，今集WE2015係真係比得番我地機迷爽快的感覺，而呢種爽快，並無夾雜跑狗，老屈頭球，波子機等的問題，比到我真正打機的樂趣，打足球Game，真實的物理元素緊要定爽快緊要，比我揀，我會揀WE2015的爽快，所以我個人來講，認同今次Konami的設計

同以往一樣，因為版權問題，有唔少球隊都無實名真衫，由其香港最受歡迎的英超球隊大部份都只能用假名，呢點Konami真係仍需努力，不過球員實名化已經做好了，加上球鞋、球員外觀、有授權的球衣的真實化都做得比對家好，都算係一種安慰，而今年更加入了AFC Champions League，有不少亞洲球隊可用，感覺又有另一番親切感，由其我呢d年紀，揀番支J League球隊，加埋日語旁述，果種Winning情懷，入波之後大叫Goooooal，真係感動到喊，無得呃人！

線上對戰方面，非常流暢，無lag機問題，以前PS3上網對戰時，真係lag到想殺人，不過執筆之時開Server無耐就死Server，加上唔知係咪無咩人買XBOX One版，唔太容易找到對手，只係玩左幾鋪，希望日後有改善，又或我直情轉會去PS4好了

總結
Winning返來了，換上Fox Engine真係唔同晒，整體畫面進步巨大，但in-game畫面仍有待改善(XBOX One)，版權問題亦需加倍努力，雖然我手上無PS4版作正式比較，但如果係雙機機主，你懂的，我就不多說了，而如果大家好似我咁，已經轉會幾年的話，我推薦大家比多次機會自己，比次機會Konami，可能係重返母會的時候了

試玩片段
以下係我自己用XBOX One的DVR功能錄影出來的in-Game片段，由於係內置App，唔係HDMI直接Capture，所以畫面比實機差少少，比大家感受下WE2015而已

[YoutubeHD]7a-oKYWokow[/YoutubeHD]

[YoutubeHD]w0unQG0weQc[/YoutubeHD]
(Post76 Android 手機版送出)