滄海遺珠：JVC HA-FX750分享文

斯路

木頭製品既魔力

我相當喜歡木製品。木頭帶有一種古舊既風味，有一種象徵住生命力既感覺。係我既入耳式耳機收藏入面一直兩個難以填好既虛位，第一個係圈鐵，第二個就係一對木頭耳機。

木頭耳機感覺上耐用程度欠佳，而且市面上大部分木頭製入耳式耳機音質一般般。音茶樂既Donguri-KEYAKI(櫸)其實音質唔錯，可惜就係由於技術上去卻左雙向單元扶正以及導管消音而令櫸即使音色同Flat4系列如出一轍但音質卻稍為失色；但令我無出手既主要原因在於佢木頭味唔重。當然我都鐘意櫸，但我未能好好說服自己入手。

如果無數錯，JVC出左三代木製耳塞。初代既FX500以及二代既FX700/FX800雖有特色，但低頻失控而且無解像度。第三代既FX650/FX750/FX850雖然宣傳做得足，但我遲遲都提唔起興趣去試，而且當時所在地並無得試耳機。直到係國內搵到一家店可以試晒三對，而又睇左一篇FX750/850既分享報告，所以都係按捺不住去左試。

當初既爭扎

當初試完覺得FX650屬入門產品不過不失，FX750同FX850則係表現比我預期中要好。當時苦思左幾日亦向左幾位師兄朋友求教，最後發現FX850比FX750更平既時侯就無法只好入FX850。

聲音上FX750更討我歡心，因為FX750聲音全面，涵接優秀自然，木頭味道重但聲音開揚；FX850則係細節更多但整個音調暗沉左落黎，高低頻更搶耳但生硬從而令涵接犧牲左。但我無因而判FX850輸係因為我對於FX850能夠換線呢點有希望，而且JVC木製耳塞只有半年保養，令我對無得換線既FX750有一定戒心。

但經過一段日子之後，我最後都係入左對FX750。好在有淘寶。

頂端型號與次級產品

FX850難駕馭，係一匹悍馬。除左驅動要求較高，搭配亦唔容易。我用iPod Classic/HiFiMAN HM-901/802配上經典卡/經典卡2/第三版分立卡/平衡卡都唔能夠令FX850高低頻過分搶耳既問題減輕，無法馴服其突兀既分析力。用上平衡卡耐聽唔少，但係聲音太溫潤而好容易令我覺得悶。加上FX850腔體大而重，未必適合耳朵較細既用家。即使佢只係比FX750重2g，但由於腔體較大，戴上耳仔個重量分別並唔細。

HiFiMAN同FX750相性都未算太高。但係用IPC聽FX750實在太舒服。弦樂質感因為木頭單元以及腔體得以好好展現出黎。較為輕身既調音亦令FX750對唔同類型既音樂適性提高。IPC+FX750已經係我常用既出街組合之一。

另外有一點就係，iBasso DX90同JVC呢兩對木頭耳塞有化學作用。如果全部都無試過而直接一套咁樣試聽，相信會造成一個頗壞既印象呢。

定價與定位

我係香港花過兩日去搵FX750。基本上無咩店家有賣，就算有賣得賣得相當貴。有幾家店賣FX850賣得相當平但就無FX650/750。問左兩位老闆，都比佢地話「要買就緊係買最貴個隻啦，旗艦型號，好聲好多；唔係旗艦型號邊有人買架」。難免心中有少少納悶。雖然音質音色呢家野好主觀，但我覺得如果真係聽過對比過，認為兩者音質相近而風格相異既機會會較大。

其實即使係同一條product line，雖然可以意向定價同意向定位係直接掛勾，但實質定價以及實質定位可以關係唔大。當然我唔係話FX750定位實質比FX850更高，但FX750要好聽實在容易；至於FX850潛力巨大但難以發揮，要花一定心力去了解呢對耳塞。能夠將FX850好好發揮至大幅拋離FX750既前端我真係想認識，因為我對於唔夠能好好發揮FX850未能釋懷。

滄海遺珠

呢個只係小分享文所以並唔打算太深入探討FX750/FX850既分別，主要都係想分享下FX750呢粒滄海遺珠，以及睇下會唔會有人有搞得掂FX850既方案。FX750係我呢段時期非常喜歡既耳塞，能夠填好木頭耳塞既虛位亦令我相當開心。

至於圈鐵虛位暫時唔需要填補住，希望大家唔好引我入坑住。



其實點樣睇FX650/FX750/FX850既相，只要放埋一齊我都覺得好似有幾隻曱甴咁樣。

windwolf447

比你講一講我都覺得張相度有2對觸鬚係度FING下FING下

Andykong

我試係香港某一次試 650/750/850，我無問價，試完我話呢條最好聲，平衡度顯高一班。店員話呢條係 750，平野喎，個條 850 先係旗艦！

唉，又係以價論聲，自此上去齋試無交流！

windwolf447

斯路兄~到時約出來見面的話也讓我試試FX750吧!

Hoyan

剛巧上有DX90 和 FX 850，FX850回來原線只用來煲機，之後換了淘X買回來的銀線，感覺音色優美，分析力也不是ie800的級數，高低頻洶湧的情況也不太覺得。
既然斯路兄有此疑問，有空也就好好試試FX850在不同配置下的分別。我會用ipc, DX90 + diy amp, ipod + hugo 去試。

henryctw

多謝斯路師兄無私分享！

pcboydaniel

斯路兄真係木頭耳機 fans. 先要補充一句還有一隻 FX1000 是 FX500 的香港行貨版本。小弟也有一些木頭 FX800, FX850 (換了 ALO SXC22 mmcx 線) 大木頭就鐵三角 W5000. FX850 用銀或銀包銅低音無原線咁衝分析力亦大增，但前端推力不可小否則低頻仍然會失控。呢排玩緊新玩具 ES velvet 打左佢落冷宮添。

粗人敵卡

幾認同師兄FX850聽感

斯路

windwolf447 發表於 2014-11-14 22:55
比你講一講我都覺得張相度有2對觸鬚係度FING下FING下

係呀呢，我睇見都覺得唔安樂

斯路

Andykong 發表於 2014-11-14 23:08
我試係香港某一次試 650/750/850，我無問價，試完我話呢條最好聲，平衡度顯高一班。店員話呢條係 750，平野 ...

原來香港都有店家可以一次過試晒架? 都好，起碼有得自己試試玩玩。

Hoyan 發表於 2014-11-14 23:08
剛巧上有DX90 和 FX 850，FX850回來原線只用來煲機，之後換了淘X買回來的銀線，感覺音色優美，分析力也不是ie800的級數，高低頻洶湧的情況也不太覺得。
既然斯路兄有此疑問，有空也就好好試試FX850在不同配置下的分別。我會用ipc, DX90 + diy amp, ipod + hugo 去試。

如果時間安排到我亦會想試，但係入耳式可換線材性價比唔太高，過唔到自己心理關口，所以都係先開帖請教下其他師兄嘛。而且私下同其他師兄交流過，有部分既聽感係換上銀線或含銀成分既線材同FX850本身聲音唔算得別出到效果，亦有部分表示唔錯。先多問問再決定，吹吹水之餘慳下大海撈針既時間都好

pcboydaniel 發表於 2014-11-14 23:08
斯路兄真係木頭耳機 fans. 先要補充一句還有一隻 FX1000 是 FX500 的香港行貨版本。小弟也有一些木頭 FX800, FX850 (換了 ALO SXC22 mmcx 線) 大木頭就鐵三角 W5000. FX850 用銀或銀包銅低音無原線咁衝分析力亦大增，但前端推力不可小否則低頻仍然會失控。呢排玩緊新玩具 ES velvet 打左佢落冷宮添。

76唔少師兄都支持換上含銀成分既線材，睇黎試試絕對無壞。但係76更加多師兄支持Earsonics Velvet喎 到底應唔應該跳入呢個坑呢