《亡命救參》A Walk Among the Tombstones 觀後感【無劇透!!】

jayjay · 發表於 2014-9-18 15:31

如果想睇到更多76師兄嘅分享，快啲登入成為會員啦！

您需要登入收看或下載更多內容。還未成為會員？成為會員

x

本帖最後由 jayjay 於 2015-2-19 10:11 編輯

今朝小弟有幸同「電影資料達人」"day2013"兄一齊睇《亡命救參》(A Walk Among the Tombstones) ,啱啱睇完，依家同大家分享吓。

不過講《亡命救參》之前，我諗我有必要先講吓Liam Neeson近年嘅票房成積。

自從Liam Neeson憑嗰套耗資只係2千5百萬美元、喺全球爆冷收左2億2千6百萬美元嘅《救參96小時》(Taken) 咸魚番生之後，電影公司係咁揾佢拍戲，拍嚫嗰啲都係低成本嘅動作大片。話就話係低成本，但係套套票房成積都非常理想，從來都冇失過手，等我舉幾個例子: 《無名殺機》(Unknown) 耗資僅3千萬美元,2011年上畫,全球收左1億3千4百萬美元;《救參96小時2》(Taken 2) 耗資僅5千萬美元、《極地戰狼》(The Grey) 僅耗資2千5百萬美元,兩者都係喺2012年上畫,前者全球收左3億7千6百萬美元,後者全球收左7千7百萬美元;《直航殺機》(Non-Stop) 僅耗費5千萬美元,2014年上畫全球收左2億2百萬美元。

喺2012年Liam Neeson仲威水，佢嗰套《救參96小時2》(Taken 2) 票房成績遠超Stallone同一大班老牌動作巨星孭飛嘅《轟天猛將2》(The Expendables 2) 、Bruce Willis做男主角嘅《時凶獵殺》(Looper) !!

冇錯，Liam Neeson近年嘅票房成積都超遠Stallone、Bruce Willis等年紀相若嘅老牌演員;原因係Liam Neeson一向畀到觀眾嘅形象都係頭腦冷靜，加上佢喺《救參96小時》系列飾演慈父嘅角色，都可以話係深入民心，所以有較多觀眾討好、觀眾緣佳。相反只係得鋪牛力嘅Stallone、Arnold 同Bruce Willis反而偏離觀眾嘅需求，因為依家觀眾鍾意睇嘅都係較食腦嘅動作片，齋打冇腦嘅動作片已經同現今時代嚴重脫節。

言歸正傳，依家入番正題，講番《亡命救參》。今次係繼《直航殺機》之後、Liam Neeson第二次同英國電視劇《唐頓莊園》(Downton Abbey) 演員合作。上次《直航殺機》，Liam Neeson同《唐頓莊園》女主角Michelle Dockery;今次同《唐頓莊園》頭三季男主角Dan Stevens合作。好可惜，Dan Stevens雖然喺本片嘅演員名單排第二，但係佢啲戲份認真唔多，根本冇乜空間畀佢發揮。

由於Liam Neeson嘅演技已經達到神級，我認為冇必要評論佢嘅演技;要講嘅，反而係第二男主角Dan Stevens。

Dan Stevens其實冇乜拍電影嘅經驗，因此觀眾緣較薄弱，如果你從來都冇睇過《唐頓莊園》，可能你會對佢比較陌生，不過唔緊要，最重要係Dan Stevens喺《亡命救參》演技爆seed,佢喺本片飾演嘅角色係大毒梟Kenny Kristo，同佢之前喺《唐頓莊園》飾演嘅大律師Matthew Crawley截然不同;你睇吓佢喺《亡命救參》兇神惡煞嘅樣、講嘅每一句對白，嘩!! 完全係高水準、大師級，無奈導演冇畀足夠嘅戲份畀佢。

對我嚟講,Dan Stevens喺《亡命救參》嘅表現唔算好surprise,事關佢拍《唐頓莊園》嗰陣演技已經達到大師級，只係戥佢未有機會拍大片而感到可惜;好釆佢依家都有電影公司賞識佢，嚟緊12月上畫嗰套《番生侏羅館3：古墓的祕密》(Night at Museum: Secret of the Tomb) 又有佢份,果然前途無可限量。

《亡命救參》嘅劇本係取材於1992年Lawerence Block寫嘅偵探小說《A Walk Among the Tombstones》,本片之所以咁成功，係因為電影係根據於小說情節，負責撰寫劇本兼做導演嘅Scott Frank唔駛再重新度過故事，省卻左唔少寫劇本嘅時間，可以專心調節演員嘅演出時間，最重要係導演係選角方面懂得揾適當嘅演員，尤其是揾啱Liam Neeson做神探Matthew Scudder; Liam Neeson確實係飾演Matthew Scudder嘅最佳人選因為Liam Neeson擁有所有做神探嘅特質;不過,如果導演揾左Stallone或者Arnold做Matthew Scudd
er,我有理由相信本片一定會票房仆直。

個人認為《亡命救參》嘅故事好黑暗、好令人心寒，有不少出乎意料嘅情節，成套戲充滿驚慄感，唔合理嘅情節可以略過算數，而且絕大部分嘅演員都表現唔錯，尤其是只得十幾歲嘅黑人童星Brian Bradley，佢能夠好自然咁演繹佢嘅角色、完全冇唔成熟嘅地方，比起TVB嘅「演員」完全超班; 雖然打鬥場面非常之少，但係成套戲非常緊張、驚慄位奇多，我睇到心跳加速、熱血沸騰;不過我最驚喜嘅就係一套咁緊張嘅驚慄動作片都竟然會有笑料，唔知導演係咪想舒緩觀眾嘅情緒呢？
導演Scott Frank其實之前都寫過《狼人：武士激戰》(The Wolverine) 嘅劇本,不過確實寫得麻麻，今次《亡命救參》都可以話係幫佢重新洗底啦。

可能因為本片係「R」級電影，打鬥場面都graphic、血腥，令到觀眾承受嘅壓力比較大。如果你身體受唔到咁大壓力或心臟比較弱，為左你嘅健康着想，我勸你千祈唔好睇《亡命救參》;不過如果你身體一向都好fit又受得睇驚慄電影，我極力推介你去睇!!

順帶一提，《救參96小時3》(Taken 3) 會喺下年1月9號上畫，而Liam Neeson另一套新作《Run All Night》亦會喺下年4月17號上畫,導演係Jaume Collet-Serra,計埋《無名殺機》同《直航殺機》,導演已經係第三次Liam Neeson合作, 執行力絕對可以信賴!!

評分：80/100

[YoutubeHD]aTKBowDjMQg[/YoutubeHD]