早幾日去完台北返嚟，同大家分享少少。

245141525

(唔好意思，無相)

一行四大一細，去四日三夜

搭長榮9:50機，去到第一時間開上網卡，三間之中大哥大最多人排，大約有二三十人，不過一早諗住試遠傳，所以都係開遠傳，我只係排第三個，幫我set埋機，前後十分鐘搞掂晒，$300/五日plan，裝落平板方便睇地圖，再share畀三部電話，用咗四日，全程市區，唔覺慢，亦唔覺有收唔到情況。

出完卡坐國光去台北車站再轉的士去西門町。

住西門町永安棧
標準四人房，都唔算細，地下放三、四個筴都仲有位行，唔算太迫，床好大。
我間房無浴缸得企缸，企缸同廁所分開，中間係洗手盆，企缸、廁所、洗手盆有塊大布簾同房做間隔，整體都ok。
房內所有嘢都唔收錢，包括每人每日一個鳳梨酥、一支水、同雪櫃入面嘅氣水。
早餐唔算太多嘢食，只係基本嘢，都ok。

呢幾日食咗比較出名嘅有：馬辣、點水樓、上引水產、咖啡弄、春水堂。
馬辣：好抵食，多選擇，食物好新鮮，服務又好，長期問你加唔加湯(注意係加湯唔係加水)，咁嘅價錢，咁嘅質素，香港一定食唔到。
點水樓：試咗下午茶食到飽，感覺上比較清淡，似係無落味精(我估)，台灣嚟講比較少見，又可能係清淡關係，個人覺得無乜特別，不過小籠包好食過鼎太豐，環境好過鼎太豐。
上引水產：因為有小朋友關係，無試立吃，只係到超市買嘢食，類似city super，都係唔覺特別，平過香港少少，不過壽司選擇幾多。
咖啡弄：全部侍應都係後生仔女，一入去已經覺得好有活力，好似後生咗幾年，食物同飲品賣相好靚，味道亦唔錯，不過唔會喺香港食，因為唔值得等個幾兩個鐘頭位，跟住入到去又要急急腳趕住食。
春水堂：基本上成間仙跡岩咁款，都係飲嘢加麵食，無乜特別，不過服務一流，問佢攞幾杯水都笑晒口，香港無可能發生！

由於有小朋友，去嘅地方唔算好多，主要有：淡水、摩天輪、Lego展、Hello Kitty展。
淡水：好多人都去過、講過，唔喺呢度多講，主要都係熱同多人(因為禮拜日)。
摩天輪：周圍無乜地標，所以上到頂都無乜好睇，坐一圈大約17分鐘，好彩果日陰陰地天，冷氣叫做啱啱夠，如果出太陽應該會幾焗。
Lego展：老實講有啲把鬼，地方唔大又無乜賣點，只係有啲Lego砌嘅嘢但又唔太似，話有Lego Show，但原來只係有個人扮嘅Lego人出嚟畀人影相……
Hello Kitty展：叫做好過Lego，起碼地方大啲，多啲公仔畀人影相，又有啲手稿睇吓，Hello Kitty迷或小朋友應該都ok buy。

第一次自由行台灣，發覺除非去嘅地方喺正捷運站，如果唔係搭的士好過，因為真係唔貴，行李又唔計錢，我地一行四人，為起上嚟只係貴好少，但慳返好多腳骨力同時間，而且周圍都有的士，隨手就截到。

去咗四日，天氣比較熱，又周圍行，無時間瞓晏覺，小朋友都有啲辛苦，好彩嘅係無落雨，不過帶佢去吓遠程，搭吓飛機體驗吓，平平地去台灣都係唔錯嘅選擇～

4pk

我刀糸岩岩返上引水產整隻雪場蚧開支白酒簡直正到不得了

Hello Kitty展好多野只限TW有售,夫人大手掃比公司D妺妺

有小朋友去babyboss玩足成日,佢開心到爆自已又可以休息下,HK個個好流,又貴

無老鍋超正,又平諗起流口水仲有D服務簡正頂級

我今次住中山區,的士去機場NT1000, 機場去中山區NT1200, 同前幾次住大安區差5多

向101 85/f間欣葉超正1 d 5貴,平均HK$4-600/人,有酒,包魚,佛跳牆,烏魚子......堅超正

小寶老豆

4pk 發表於 2014-8-31 04:13
我刀糸岩岩返上引水產整隻雪場蚧開支白酒簡直正到不得了

Hello Kitty展好多野只限TW有 ...

... 好正!!!
兩年無去台灣喇... 今年plan plan先....

4pk

小寶老豆 發表於 2014-9-1 17:38
... 好正!!!
兩年無去台灣喇... 今年plan plan先....

hkd$100:NT376 5太平,不過指數低 快

小瑟

冇相你打咁多野都係徒然架喎…
(Post76 Android 手機版送出)

小瑟

認同到不行的就是……搭的士原來最好，尤其一家大小。
(Post76 Android 手機版送出)

小瑟

不過我係對仔女未出世前一家人去，之後都冇去過了。
(Post76 Android 手機版送出)

小寶老豆

4pk 發表於 2014-9-2 03:13
hkd$100:NT376 5太平,不過指數低 快

... 以前有 4 架...

245141525

小瑟 發表於 2014-9-2 07:17
冇相你打咁多野都係徒然架喎…
(Post76 Android 手機版送出) ...

畀次機會啦大佬！
我啲相仲喺相機，一返嚟又適應班又剩，接住又要返工，都唔知幾時先得閒搞……

245141525

小寶老豆 發表於 2014-9-2 09:59
... 以前有 4 架...

去台灣㩒ATM，有3.85