KONDO頂級組合＋2014原音精選

蒲東

聽日就係音響展嘞！大家會邊日上呢？我上星期就走咗上《音技》八卦下個展有乜嘢睇。點知上到去大草哥即時捉咗我入試音室﹕「喂！蒲東！難得全套Kondo旗艦呀！你真係要聽下，機會可一不可再！」
細睇之下，原來係Kondo M1000 Mk2 preamplifier、 Kagura power amplifier同GE-1 phono，去推Dyna白金證據，再加埋DCS四件頭、兩個農夫地盒同線材，成壇嘢可以買到一幢豪宅囉！
最正係我可以用呢套組合聽未出街嘅2014〈原音精選〉，同埋本來放喺兩聲道後面嘅三隻作為影音測試嘅JBL喇叭已經送走，減少咗不必要嘅反射聲同共振機會。
一聽，嘩！唔使講嘢啦，Kondo嘅前後級，向來聞名遐邇，《音技》呢套組合真係比我見識到咩係貴價組合﹕聽Beyond<情人lover >、小鳳姐〈無奈〉、棠哥〈滄海一聲笑〉、Rebecca Pidgeon<Spanish Harlem>，樂器定位同口形準到無譜，零底噪，真係好乾淨好乾淨好乾淨！用啲老前輩術語咪係好似揭起咗層紗咁，好似上等水晶咁剔透玲瓏。我真係聽到支支毛管豎起！最深刻印象係〈滄海一聲笑〉最後有幾下撥弦，真係好似喺比牆再深入嘅地方發出，好可怕！
之後播大棚嘢如＜四季﹕夏＞同埋〈太陽〉咁，氣勢大、爆得，所有樂器有條不紊，stage感好強，貴咪貴在呢啲嘢，草哥講得啱，可一不可再，我哋呢啲打工仔，真係發夢無咁早。
順帶一提呢，2014原音精選今年有好多有人聲嘅歌，極啱我口味，如果我話今年呢隻嘅音質係咁多年中最好，你哋肯定話我吹水，有機會自己聽下啦～～～～～～聽草哥講有76兄弟上咗去聽過Kondo全套，你哋又點睇呢？

ykluk

小弟有幸上星期六都去咗聽, 大草哥非常好客咁招呼我哋, 今年原音精選好啱聽, 至於器材, 大部份嘢蒲東兄你都講晒, 小弟只能講句:"嗰次上去算係小弟聽過數一數二最好聲既毒氣室"~~!! {:9_426:}