直擊Biohazard之父 三上真司《The Evil Within》 動漫節製作人活動

@肥狗仔@

鍾意《Biohazard》嘅朋友對三上真司哩個名應該唔會感到陌生，由bio1到bio4，哩位神一般的製作人在離開熟悉嘅喪屍之後可謂幾經風雨，並馮住自己對遊戲的獨特見解及開發經驗，打造出另一番新天地。但終究三上最深入民心的都係恐怖遊戲，即使在其手中誕生的有《God Hand》，《Shadow of the Damned》及《Vanquish》等佳作，對眾多"追屍一族"黎講亦未免有點英雄無用武之地喇。喺如今鎗戰遊戲大行其道的市況下，一些買少見少堅持行傳統恐怖路線的遊戲就像風中殘燭，逐漸被"爽快"及"子彈"所吞噬，部份”幸存者”只能躲藏在網絡平台上苟且偷生。所以當三上在上年公佈這款號聲是真正"恐怖生存遊戲" — 《The Evil Within》嘅時候，就仿佛宣告屬於次世代的恐怖熱正式降臨。喺今個香港動漫電玩節2014入面，第一次參展的Sony Computer Entertainment Hong Kong(SCEH)為隆重其事，特別請來三上真司先生到場與香港粉絲見面，並一一拆解《The Evil Within》背後的廬山真面目。@肥狗仔@早前就聯同攝影師曲街仔兄到場以最近距離紀錄咗三上當日嘅英姿及風采。

動漫節第一日下午五點幾已經有大批來自中港地區的傳媒，及眾多"三上粉"集結於PlayStation展區的大舞台前面，為的都係想一睹三上真司真容。

本尊終於現身，伴隨嘅係無盡的閃光燈及粉絲們的歡呼聲。經過一輪自我介紹及對答，三上表示自己係第一次來到香港，被香港這個港島的景色所薰陶。對於《The Evil Within》三上當然唔會靜係帶一段預告片或者演示片段就當交差，其就即場試玩遊戲中的其中一段讓粉絲們大飽眼福。今次的即場演示更加係亞洲區的第一次，換句話說香港玩家可以比起亞洲其他地區更早一步感受到遊戲所帶來的陰森恐怖。

當日演示的內容為遊戲中段的章節，講述主角進入一間圖書館，目標係要打開一扉大門，為此玩家要解開位處於圖書館內的三個機關。遊戲一開始主角身上的槍械已經非常充足，由一般左輪到bio4中Ada手持的十字弓都有，不過三上指出時下好多所謂恐怖game都係偏重動作，今次佢希望將遊戲打造成會令玩家毛骨悚然，強調生存恐怖的作品，所以縱使主角周身刀，亦唔見得張張利，此因遊戲的子彈供應將會非常緊張。其中有一幕三上就用火燒死倒地的敵人，並解釋到這是遊戲中最常見的子彈節省途徑，可見要生存，玩家除咗識得點煙之外，起碼仲需要一個火機。

講起解迷，可能大家嘅印象只係局限於開門，搵鎖匙之類，黎到《The Evil Within》有關內容被轉化成標新立異的視覺震撼。只見主角喺一個冇左頭蓋嘅人頭上高，用激光儀器打入腦袋，過程雖不至於變態，但卻俱有血花四濺的衝擊性畫面。

就當日所見，敵人的出現次數不算頻密，但事實上玩家所面對的還有"第三勢力"，哩位不速之客並非什麼隱藏生物，而係遊戲入面嘅"環境"。整個演示過程中，玩家所身處的環境動不動會在毫無先兆的情況下發生變異。有關的變化及幻覺甚至會在食藥補血後"發作"，一心唸住有"safe house"或者血包充足嘅玩家絕唔能夠高枕無憂。

由於環境非常陰暗，主角腰部早就掛咗一盞電燈用以照明，玩家可以隨時將之開啟或關閉，避免敵人察覺。睇到哩度，各位可能會覺得成隻game應該係屬於比較保守的類型，但主角身為一個警務人員，從潛行到近身攻擊樣樣精通，起始配備更有粉絲熟悉嘅刀仔。三上就曾嘗試向敵人施展不同的格鬥術，包括bio4的招牌硬直後補必殺技，可見遊戲唔同咗，動作元素依舊陰魂不散。

演示中途有段小插曲，話說遊戲到處都係機關，其中一度係需要玩家眼明手快解除危險裝置，假若失敗便會觸發爆炸。既然係三上先生操刀，小小難關理應好快會迎刃而解，話口未完，一聲巨響伴隨住火花覆蓋整個會場，然後只見主角應聲倒地，三上亦露出尷尬嘅笑容。哩一下老貓燒鬚或者反映出遊戲在難度上確實繼承了三上的作風，幸好遊戲提供了簡單模式，不過作為身經百戰嘅"追屍一族"，我地都係由"一般難度"起標啦。

整個製作人活動歷時30分鐘，臨完結前三上為粉絲們帶來另一驚喜，冇錯，就係宣佈《The Evil Within》將推出中文版並與英文版同步於10月15日推出。此消息一出全場歡呼聲如雷貫耳，皆因粉絲們望穿秋水的中文版本終於換來了製作人的回應。三上也表示可以用自己熟悉的語言去玩遊戲係最好不過的事呢。

粉絲合照: 識影一定帶埋game黎影

喺動漫節期間，SONY展區就提供了兩台《The Evil Within》試玩機，吸引大批玩家。@肥狗仔@當日亦親身試玩過一陣，以一完先前"傳媒預覽會"時的遺憾。試玩內容與三上所演示的無異，不過起始裝備只有一把刀仔同一枝左輪手鎗再送多三粒子彈，認真多謝。遊戲本身的GUI並唔繁雜，但武器欄方面則採用了近幾年好流行嘅羅盤式設計，好讓玩家選擇唔同裝備作戰。因為子彈太少，當遇到敵人時@肥狗仔@都會直接用刀仔同佢死過，有時敵人硬直嘅時候玩家可以上前補一腳QTE將之殲滅，與bio4可謂如出一轍。不過當與兩隻以上的敵人糾纏時經驗話我知著草先係上上之策，因為敵人出招係"唔留手"的。

畫面方面之前電玩區的版友都已經有過一翻討論，@肥狗仔@玩嘅時候並冇刻意去評頭論足，但可以話本作在氣氛渲染上確有一手。老實講入得黎動漫節，本人一早就被周遭的熱情洋溢所感染，再加上身旁有幾個"彪形大漢"輪侯中，問心@肥狗仔@真係驚人多過驚遊戲入面的怪物。可幸人盲心不盲，遊戲過程無論係室外環境的霧氣粒子定還是室內嗰種徘徊於受光與黑暗區域的強烈對比，本人都感受到一種叫人毛管戙嘅陰沈，再配上2.35:1畫面比例，就好似睇緊鬼片一樣。以一款強調"生存恐怖"的遊戲而論，哩點或者比起什麼次世代級別畫面黎得更實際。

基於當日有大量玩家前來試玩，@肥狗仔@手掣都未揸得暖就比人踢咗出房。唔緊要，好戲在後頭，三上真司千里迢迢黎到香港，一眾傳媒又豈能輕易放過哩粒"巨星"?今次大會就喺活動完結之後特別安排咗場傳媒訪問環節，以下為訪問重點:

傳媒訪問重點:

• 沒有任何PSV及PS4聯動要素。
  

• 日版之所以叫《Psycho Break》係因為日本人要讀出《The Evil Within》的正確發音係非常困難的一件事。就連開發人員自己亦覺得"難以啟齒"。
  

• 對於中文版的評級會否和日版一樣，並會在發售後提供Z評DLC，三上表示未作相關決定。
  

• 本作設計上係想在bio1和bio4之間取一個平衡。並沒有刻意想複製以往作品，或者完成一些以往未能完成的東西。
  

• 遊戲中充滿血腥，三上表示現實中中鎗﹑砍人等等動作必然會使人流血，今次遊戲裡面所謂血腥暴力純粹為了增添氣氛。他自己則比較討厭一些流綠色血的超現實生物。
  

• 現階段未有考慮將遊戲打造成系列，他們最專注的仍然是將遊戲完善好。
  

• 三上指以往他所開發的遊戲都是用鎗射殺喪屍，黎到《The Evil Within》子彈數量會大幅減少。所以玩家須要用到其他技能例如潛行或者裝置陷阱才能逃出生天。遊戲設定上亦比以往作品現實，當中加入大量與"人腦"有關的話題(但不會太科學)。對於主角在精神病院所遭遇的一切究竟係真實還是夢境，等等都會在本作逐一探討。
  

• 遊戲不會有多重結局。雖然三上對結局問題似乎唔太願意去回答，不過佢表示遊戲故事本身有好多迷團會比較深入，即使玩家玩完一次都未必可以完全了解發生咩事，這是今次刻意要去塑造的想像及重玩空間。
  

• 三上學生時代已經好喜歡睇恐怖電影，不論係喪屍或者古典恐怖電影都很喜歡。這對他日後開發遊戲上有好大影響。(本作就參考了馬田史高西斯執導的《Shutter Island》)
  

• 對於"恐怖生存"遊戲在業界的前景，三上表示自己都唔太清楚，特別係恐怖遊戲。因為在構思嘅時候只會考慮到自己想做乜野遊戲，而有關構思有時未必係玩家想玩的，要去到開發階段先能進一步研究點樣迎合玩家需要。所以唔能夠一概而論。
  

• 被問到遊戲中的"神秘人"是隨機還是隨劇情發展而現身的時候，三上指該人物會在"特定的地點，隨機地出現"，並認為哩個係構成恐怖的元素之一。
  

• "好玩"與"恐怖"之間的平衡是今次下功夫比較多的地方之一。因為若果要製作純粹講恐怖的遊戲就十分簡單，只要剝奪玩家所有武器讓他獨自面對敵人就已經可以收工。但作為生存恐怖遊戲，"恐怖"元素只是眾多考慮中的冰山一角。
  

• 遊戲中主角身處的環境會經常改變，三上指一旦玩家進入新空間就唔能夠返回以前的地方。
  

• bio1至3代都是以3D角色+2D背景的形式展現出黎，三上指自己都非常喜歡這種形式，只不過當中涉及到複雜的操作，考慮到現在很多玩家未必能適應所以今次就以第三身作為遊戲控作視點。
  

• 多人遊戲模式最初其實有唸過，不過三上意識到恐怖遊戲都係一個人玩恐怖啲，而且太多人合作打怪會令遊戲變得極唔平衡，因此多人模式最終都未有製作出黎。
  

• 關於點先算係成功嘅恐怖遊戲，三上覺得好難回答，然後話: "總知就係要恐怖啦!" (全場大笑) 佢其後補充恐怖雖然重要，但作為製作人要讓玩家覺得好玩查實同樣甚至更加重要。就好似一碟菜，甜同辣的味道必須要並駕齊驅先可以發揮到食材的美味。
  

---

總結

曾幾何時@肥狗仔@都幻想過他朝有一日可以同三上真司哩啲大師級製作人見面，今次能夠得賞所願除咗有賴SCEH背後所付出的努力，某程度亦反映到本地玩家愈來愈被受重視。此因這款三上久違的恐怖遊戲，在居住了大量Biohazard粉絲的香港竟然比亞洲其他地區更早能夠體驗，@肥狗仔@真心覺得這份榮耀比起《Biohazard 6》用香港作背景更喜出望外。至於與三上一同來港的《The Evil Within》亦搶盡風頭，@肥狗仔@試玩過後對於遊戲所營造的恐懼還有難度方面皆感滿意。在動作遊戲充斥的大前題下，本作猶如神來之筆，為生存恐怖遊戲帶來生機，為動作與恐怖等一矛一盾帶來前所未有的融合。


當日戰利品:

bigair

經典之作，不過第三集之後無玩啦，以前玩第二集時，仲計住時間，兩小時內完成可以有大炮

@肥狗仔@

bigair 發表於 2014-8-1 20:41
經典之作，不過第三集之後無玩啦，以前玩第二集時，仲計住時間，兩小時內完成可以有大炮 ...

老玩家發現

SonSon

想當年要熄晒燈玩包乞食先過癮嫁

原明

SonSon 發表於 2014-8-2 09:50
想當年要熄晒燈玩包乞食先過癮嫁

我都係，過版開門還遇上過房？同時被開…

ty2007

唔知同以前 Biohazard 比會有什麼 surprise 呢？