《猿人爭霸戰：猩凶崛起》Dawn of the Planet of the Apes 觀後感

jayjay · 發表於 2014-7-17 15:09

如果想睇到更多76師兄嘅分享，快啲登入成為會員啦！

您需要登入收看或下載更多內容。還未成為會員？成為會員

x

本帖最後由 jayjay 於 2015-4-19 23:48 編輯

今朝睇左《猿人爭霸戰：猩凶崛起》(Dawn of the Planet of the Apes),依家同大家分享下

上集《猿人爭霸戰：猩凶革命》(Rise of the Planet of the Apes) 由 Rupert Wyatt執導、Andy Serkis飾演猿人大佬Caesar、James Franco飾演Caesar個養父,成套戲口碑極佳，喺全球收左超過4億8千萬美元，比同年上畫同一間電影公司嘅《變種特攻：異能第一戰》(X-Men: First Class) 仲賺多左1億3千萬美元。事實證明，超級英雄片未必一定最好賺嘅電影。

嚟到今集《猩凶崛起》，電影公司大換血，不但導演要被換走，甚至連James Franco都冇得留低; 今集由Matt Reeves擔任導演，Andy Serkis繼續飾演猿人大佬Caesar。
其實，今集有冇James Franco參與，已經無關痛癢,因為成套戲嘅靈魂根本就係Andy Serkis;同《變形金剛4：殲滅世紀》(Transformers: Age of Extinction) 一樣道理，冇Shia LaBeouf份拍唔緊要，最緊要係Peter Cullen繼續聲演博派大佬Optimus Prime,因為Peter Cullen先至係成個系列嘅靈魂。
你睇Andy Skeris上集嘅演出就知;佢喺上集飾演猿人大佬Caesar,表現簡直神乎其技;就算今集冇James Franco參與，人類對手換上Jason Clarke，成套戲嘅表現仍然可觀。
至於電腦特技方面，簡直係嘆為觀止，逼真度極高！！飾演猿人嘅演員只需要著住特製戲服，並唔駛好似強國拍《西遊記》咁貼住嘅假毛喺身！！
如果強國想繼續拍《西遊記》，不如試下揾電影公司幫下手，揾佢嚟整隻孫悟空出嚟。
其實Jason Clarke喺《猩凶崛起》嘅表現確實麻麻，攞佢同James Franco比較，明顯後者超班得多。其實Jason Clarke嘅角色應該交畀Gary Oldman飾演。

對於劇情，我接近零挑剔。其實成套戲裏面，猿人同人類根本冇絕對嘅奷角，至少雙方嘅大佬一開頭並唔想打仗，大家只係想生存啫，但係之後嘅誤會，令到大家陷入仇殺之中，搞到兩敗俱傷，又有乜為呢？？！！但係如果唔打，又於理不合，因為今集片名叫做猿人"爭霸戰" 並唔係猿人"以和為貴"。今集涉及人類同動物並存嘅理念，其實寫得合情合理又有寓意。

整體嚟講，我覺得《猩凶崛起》拍得唔錯，雖然同Christopher Nolan嘅神級大片仍然有一大段距離，但係仍然能夠保持高水準，實在非常難得。

順帶一提，電影公司已經宣布，2016年會上第三集《猿人爭霸戰》。

評分：85/100