Project Morpheus等VR設備或將停滯不前? SONY: "我未驚過!"

@肥狗仔@

御三家之一SONY過去一直走在潮流嘅尖端，特別係執人口水尾方面，好似成就分的山寨貨獎杯系統，還有Wiimote的繼承者PS MOVE。至於在2012年橫空出世的「VR」虛移現實頭載式顯示器Oculus Rift雖然之後被Facebook以2億美金收購有望點石成金，但SONY仍然當正自己係伯樂並於幾個月前又公佈左一個叫做Project Morpheus的VR headset，藉此希望在家用機的VR領域上一嚐頭淡湯的滋味。但奇怪係剛過去嘅E3展SONY發佈會中，Morpheus並冇出黎抛頭露面，只係低調咁出現係會場的部份試玩台之中。事實上自Oculus Rift面世以來，好多人對哩件聲稱係遊戲界嘅"未來"不感樂觀。基於SONY早前就表示Morpheus預計會在一兩年後先會推出市面，如今咁快比人潑冷水實在尷尬。可能為釋除疑慮，SCE全球部門行政總裁吉田修平最近在巴塞羅那舉行的Gamelab中接受GamesIndustry訪問時表示，自己不擔心VR會淪為三分鐘熱度之流，反而該設備的完善程度則會大大影響玩家對VR的觀感。

儘管沾染著Oculus Rift的餘威，業界對Morpheus的認知並不算低，不過吉田修平指出最怕就係"趕工"，將一堆未完善的器材格硬塞俾玩家: 「我唔認為VR哩家係後勁不繼。事關到目前唯止仲係得極少數人試玩過Oculus Rift或者Morpheus。我地相信除非你真正試載過，否則你冇可能知曉VR係乜東東!」

吉田解釋: 「據我們所知市場對VR有龐大興趣，但無論玩家會嘗試邊一款VR都好 — Oculus仍在不斷地完善硬件，而我們亦朝住嗰個方向前進。事實上我們都一致認為要等VR完成大量改進先能夠推出市面。始終佢俾玩家嘅第一個印像係至關重要。」

[YoutubeHD]7OQtByjyD-4[/YoutubeHD]

一條片或者已經可以解釋到VR發生咗咩事。

到現時為止，已經有一部份玩家嘗試過VR headset，不過愈多人上手只會引發愈多的潛在問題及改善計劃。不論係Oculus還是Morpheus，其未解決的問題大至上有二: 動作限制及須使用到額外的操作設備。以首批對應Morpheus的遊戲之一《Eve Valkyrie》為例，一旦遊戲角色坐下，玩家就唔能夠再擺動頭部，又以《Street Luge》為例，戴上Morpheus尤如食咗揈頭丸，搖到個頭甩咁際。另外部份比較傳統的FPS遊戲如《Doom3》或者係較近期的《Alien: Isolation》就會傾向取一個"中位數"。即操作依舊交俾手掣，但就將嗰種前所未有的恐懼通過VR帶到玩家眼前。

Oculus的CEO Palmer Luckey早前就警告過，VR現階段的最大威脅就係一堆劣質的VR，並指Oculus Rift面世後不一定要有3A作品對應，事關慢工出細貨永遠係王道，甚至呼籲玩家唔好買市面上嘅Oculus Rift早期版本，指其只不過係一種開發工具而已。無獨有偶，Oculus的主張好大程度亦反映SCE對VR的取態。吉田表示:"技術上黎講，VR就等同將遊戲放在3D電視上顯示同樣不俱難度，只不過遊戲設計好難配合。好似《Doom》與《Half-Life2》咁，你用VR玩上手會覺得好正，但唔洗一陣你就會發覺成件事根本唔work。講到尾，不論係款撤頭撤尾嘅VR遊戲定還是對應VR的專屬遊戲，其開發上都必須要基於VR概念而重新設計先得。"

如今SCE最心急係要將Morpheus推廣俾更多玩家試用，特別係遊戲製作人，因為無人希望Morpheus最後會好似XBO嘅Kinect一樣得個擺字。話說今次哩篇GamesIndustry的報導@肥狗仔@都有點兒共鳴，因為早兩個星期試玩過大學某三位技術達人做嘅VR喪屍遊戲，用嘅係Oculus Rift第1代development kit。戴上頭感覺聚住聚住，顯示器有3D輸出，解像度奇低。遊戲為第一身，迫真程度的確以假亂真，可惜因為有線關係，基本的360度自轉動作無從入手。但最大問題係好似溫水煮蛙一樣，玩唔夠五分鐘頭突然超暈，除低個headset後有一段時間想作嘔，此時心知不妙。期後謝霆鋒順道經過，玩左兩分鐘就放低...睇黎距離正式出街堅係仲有一段好長嘅時間。