《WATCH_DOGS》下集要諗諗......

marcolau · 發表於 2014-7-10 19:05

本帖最後由 marcolau 於 2014-7-10 21:45 編輯

本身就係為左哩隻 GAME 出 PS4 ，誰知花了一個月等這遊戲的中文版，結果係縮水版...@#^@$#&

剛玩時真係想放棄，但因為反正等左咁耐，冇理由唔玩埋佢，爆吓機都要掛。
事實上，好多人問似唔似GTA5，邊隻比較好，其實縮水狗係玩潛入，同GTA係兩回事，你唔可以亦冇能力通街開火，而且你係豆腐人，中幾槍已經要見天父。

想如似GTA咁玩唔係唔得，但要留意佢嘅掩護系統係其差，好多時個掩護都會阻住你，亦唔可以盲射，而追車就因為佢要迫你用 HACKING，所以冇就開槍，但敵人就得喎，你話幾吹漲呢。

隻GAME本身要係玩 HACKING 或潛入，雖然佢會有D陷阱比你用，但實際上敵人未必會中，而中左一個就即使全場知道，咁仲潛乜春啫，哩個係佢主要嘅玩法，但都做得唔好，所以我嘅打法係先搵左目標，用滅聲手槍潛入，再不動聲色走人，如果局住開火就爆到班友飛起。

最好係一開始做晒D副任升晒D技能，順便做收集。而最後一版係痴線嘅，而重點係要記晒3個目標位置。而最後選擇殺唔殺條友就自己決定。

官方話有超過200小時遊戲時間，講真佢D副任務來來去去都係幾種，仲要你玩幾十次，即使同廠嘅《刺客教條》都唔會咁啦，我諗佢意思係叫你悶足200小時。線上其實都唔係咁好玩，只係可以搞吓其他玩家心涼一吓而已。

而小遊戲方面，除飲酒計最有挑戰性之外，其他都冇咩可取，飲酒堅係難，至今PS4只係0.9%嘅人係完成到架咋。連我朋友都睇死我卡係飲酒果PART開唔到白金。

其實唔理上述嘅問題，隻GAME本身係唔錯嘅，故事又好，只係悶左D。至於下集.......我諗冇咩吸引都唔駛預我喇。

獎杯方面，最難開有三個︰
1, 偷歌︰我一路行一路HACK路人HACK左22首，最後一首到咖啡店偷埋。(唔係難，但係最煩)
2, 跟蹤︰要畀人線上跟蹤，即係等運到，有人掛機30個鐘都開唔到，我就好采第二轉就開到了。
3, 社交潤滑劑︰哩個堅係難......或者係花時間。

最後..............

分享吓，最快！五星走佬法，GTA適用。
[YoutubeHD]IHzTvU_gS0k[/YoutubeHD]

我的基本打法
[YoutubeHD]Zl05pe2RN0I[/YoutubeHD]