暑假補習班2014~(完成最後一款 29樓Batman Arkham Origins小評)

@肥狗仔@

十幾粒鐘嘅航海生涯再次換黎@肥狗仔@一聲嘆息。唔係話哩隻《Assassin’s Creed IV Black Flag》唔惦，事實上佢俾前作出色唔少。不過個人黎講該系列嘅硬傷或者已經俾開發商視作為特色...

今集《黑旗》嘅魔盜王式玩法其實係AC3開發中途被發挖，繼而開發哩部算係比較獨立嘅一款系列作。點解會用"獨立"去形容事關刺客教條本身就唔係GTA嗰種載具導向嘅遊戲。即使黑旗再進一步有得比你換船，買船，系統嘅可持續性亦唔見得高。一來佢唔係真正嘅sandbox遊戲，二來撇開速度唔計，你遊車河起碼有靚車靚景，你遊船河，甲板上就係一班衣衫不整嘅麻甩佬，四周景物除咗無際大海就係外型相似嘅船隻，同埋果啲都唔知算唔算係花式表演嘅大魚翻身。@肥狗仔@一開頭係好enjoy遊船河的時間，但之後隨住快速旅行嘅存點愈黎愈多，開船哩種交通功具就逐漸變成搶劫武器。

個人比較欣賞本作在關卡連貫性上嘅處理手法。記得上一集不論係城市任務，家園任務及海軍任務，唔同任務切換就仿佛玩緊唔同遊戲咁樣，特別係海軍任務，因為地圖唔算開放式，所以load完就直接開波，違和感極高。黎到本作，島與島之間嘅無縫關卡連接較為完整，玩家打完英國海軍好多時都可以直接上島搶貨倉，解決咗前作"東一忽西一忽"嘅情況，更替"船與島"帶來逼真互動。

另一個改進之處係戰鬥系統調整翻比較正常嘅難度。換句話前作無雙式殺戮已經成為過去式。今集好多時遇到超過五個敵人就要著草，特別係會防禦嘅兵種經常出現，有時真係會令人感到措手不及。

有玩過嘅朋友都知道海戰係一個亮點，而個人睇法船戰只係一個引導，常規化的劫船先係遊戲中心。家因過程中玩家除咗肉搏仲可以潛行暗殺，間接將系列以往的特定潛行空間濃縮至一部船上面，有一定嘅新鮮感。但@肥狗仔@建議其實可以製作埋相關嘅攻防戰，若果只限於一方攻一防守變數可能太少，當你劫上四﹑五十架船後，哩種遊戲系統就變相成為資源補給途徑而唔再為玩家帶來刺激。

配合加勒比海盜題材，海底尋寶可謂應運而生。本人事前冇唸到哩種海底尋寶會咁好玩，要避海洋生物亦要搵寶藏，同時又需確保有足夠氧氣。緊張程度比陸地上嘅例行公事有過之而無不及。基於哩種gameplay好大程度用於調劑流程，@肥狗仔@卻略嫌該環節要主線任務中後期先可以觸發係過份悲觀，其實用於海戰上高亦能有所作為。

合成系統亦要一讚，合一件野所需原料一件起兩件止，唔似得AC3咁打到爆機都唔知合唔合到一舊。但其實該系統某程度都反映到遊戲核心概念係"簡約至上"。宏觀去睇就係將前作嘅精華抽出再重新合併成一個節奏較快嘅gameplay。事實上黑旗由攻佔堡壘，到日常收集元素都係由系列前作延伸出黎，只係分拆成唔同島嶼及堡壘的挑戰。同時所有收集元素包括船歌及Abstergo挑戰等等亦被打散平均分佈在唔同地區，就咁聽落可能會覺得只係形式上唔同，萬變不離其宗，但實質上各個島嶼面積同搜集物品非常有限，玩家嘅完成欲一般會比前作大得多，@肥狗仔@雖然未至去到收集狂地步，亦承認花咗好多時間喺尋寶上面。

收集上嘅變更固然係AC4入面一個幾絕嘅design，但問題係蒙特婁對流程嘅設計仍然唔夠周詳。應該話若果玩家花嘅大部份時間只局限於搜集﹑發挖﹑搜集﹑發挖，咁哩個系列極其量只能夠在廣度上發展而缺乏深度。@肥狗仔@由前作開始已經覺得以現今開發技術要將遊戲做成sandbox其實唔係苛刻嘅要求，但論你得到實際回應，以AC現在的框架而言都唔係咩好事，與其整一個大地圖俾你去搵野，倒不如學Splinter Cell咁整一本道關卡可能仲精彩得多。黎緊《Assassin’s Creed Unity》會採用無縫式開放地圖，@肥狗仔@唔希望此舉等同於提供一個刺客版的"塊魂"。

畫面上就唔多講，海港街景做得比前作更有城市感，另外水流效果視覺上亦達到《Uncharted》或者《戰爭機器》的級別，特別係市內有類似溝渠的景觀映襯出賞心悅目的效果。故事方面不論係現代定過去都接近0的存在，現代的情節擺明為下一集鋪路，而古代情節亦只係前傳形式的東西。主角由假刺客變成真刺客的過程充滿住犯駁同空洞。其站在公義及私利之間的內心表現本屬正常，但在狗血情節的驅使下反讓本人覺得難以捉摸。唉算啦，都唔望佢有咩劇情。

《Assassin’s Creed IV Black Flag》大體上係一款稱職又好玩嘅動作game。即使其已經將焦點轉移到海戰身上，但亦能夠自豪地冠上刺客系列作之名。但七十二變本性難變，若果刺客教條系列繼續將遊戲定位成遊擊收集的媒界，咁那怕係他朝會推出太空版刺客都難免淪為COD之流，地圖再大亦只係一種浪費。

個人評分: 8.4/10

hunterkkc

唉...無機果陣恨買機...買左機果陣...就恨有時間打機...人生..

@肥狗仔@

hunterkkc 發表於 2014-8-24 23:49
唉...無機果陣恨買機...買左機果陣...就恨有時間打機...人生..

人生就好似無數咁多場Team Deathmatch，只不過對手就係自己...

@肥狗仔@

終於黎到最後一隻，亦好大機會係我部360最後一款遊戲T T

michael.t

@肥狗仔@ 發表於 2014-8-30 10:38
終於黎到最後一隻，亦好大機會係我部360最後一款遊戲T T

哎 Arkham Origins 真係⋯⋯

慘不忍睹

好成功咁將Arkham City 抄完再出

@肥狗仔@

michael.t 發表於 2014-8-30 17:14
哎 Arkham Origins 真係⋯⋯

慘不忍睹

唔係啊，暫時玩落都ok.
(Post76 Android 手機版送出)

michael.t

@肥狗仔@ 發表於 2014-8-31 09:30
唔係啊，暫時玩落都ok.
(Post76 Android 手機版送出)

咁始終Arkham 系列既根基夠穩

隻game冇新意極都係Based On 一隻好好既game

再加上少少的新野

不過可能我初頭期望比較大 失望都比較大

@肥狗仔@

michael.t 發表於 2014-8-31 11:55
咁始終Arkham 系列既根基夠穩

隻game冇新意極都係Based On 一隻好好既game

打從知道Origins唔關Rocksteady事嗰一刻起已經對隻game冇咩期望，但之後聽返其他Ching講其實冇太大變化我就放心入喇，而且果排玩亞做特價XD~~抵玩。

@肥狗仔@

斷斷續續花咗三日時間，主線其實唔長，其餘時間集中搞惦Anarky同Mad Hatter等支線，又求其收集咗啲野同查下案，咁又一隻game。話說當我知道華納搵咗第二班人黎整batman嘅時候，真係有啲擔心哩個系列會唔會重蹈《Gears of War: Judgement》的覆轍 — 冷醒走去畫蛇添足最後背負住牌品受損的罪名。直到今日爆機先知道係虛驚。表面上《Batman Arkham Origins》純粹原地踏步，不過喺搬字過紙嘅背後原來內有乾坤。

首先可見遊戲非常忠於系列原著，唔單止系統，遊戲入面唔少場景好似阿甘城同監獄擺明係直接攞前作的東西去改的。不過接唔接受”copy and paste“取決於佢個gameplay的可持續性，又或者正如Michael兄所言的"穩健根基"。所謂爛船都有三分釘，之前喺各大網站見到嘅評分及玩家之間嘅微言感覺哩款前傳作品評價上稍為過低，實際上"Origins"甚至有資格稱之為佳作。一黎佢無出現上述的亂改野情況，除咗某幾種記憶中未曾出現過的新武器同招數之外，遊戲都冇咩新元素introduce，與其話係前作的資料片倒不如話係款大型DLC。二黎佢節奏掌握得唔錯，唔好以為gameplay好就實賺冇蝕，睇返《God of War III》，製作人誤判咗重心，選擇沉迷於戰鬥系統及機關，而關卡及劇情則雜亂無章。"Origins"聰明地捕捉得到玩家嘅"口味"，將前兩集大部份標誌性的關卡特色濃縮喺一個咁短暫嘅流程之中。內容分佈亦花盡心思，即使都係玩家耳熟能詳的東西，但咩時候出場，咩形式出場先係引人入勝的關鍵所在。節奏固然把握得當，但關卡內容亦要一讚，遊戲中的Joker遊戲樂場設計之妙更令@肥狗仔@有唔夠喉嘅感覺。

老實講，叫得做前傳的個人事前真心只係預計佢黎個DC人物曬冷就完game，玩落先知查實人物刻劃都唔少。事關今次算係名議上一次蝙蝠俠的起源，Warner Montreal studio在"介紹"眾人物出場同時，更不忘描寫有關人物的性格特徵。其中有關Joker的心理狀態及Gordon與Batman的原則對立，還有管家阿福對Bruce的憂慮等等絕對係驚喜般的存在。故事劇節亦然，從Firefly大橋一役到最後Joker終極一戰所營造的張力及緊湊個人覺得更勝前作。當然若果冇出色嘅BOSS戰成件事可能大打折扣，本作另一個驚喜一定係BOSS戰。問心與第一集相比，前作"Arkham City"無疑缺乏令人印象深刻的BOSS戰，所以黎到"Origins"突然殺出一個Deathstroke — 實力與batman不相伯仲的高手。在與其戰鬥時的緊張及興奮程度令本人聯想起忍龍黑的"假龍"戰役。黎緊"Arkham Knight"引入蝙蝠忍者相信亦係Rocksteady睇中咗哩種BOSS戰的潛力所致。另外遊戲中後期的Firefly及大隻Bane等BOSS戰亦叫人津津樂道。

一味讚好好似唔係太好，但講到缺點除咗冇新意之外都真係唸爆頭，唯獨一點應該係大家公認的就係bug超多。單單係Deathstroke之戰本人已經連續死咗兩次機，有時甚至係開地圖都會死。哩隻係上年嘅遊戲，照計咩patch都出哂，上網睇返先知原來開發商果排掛住整DLC賺錢，連bug都冇時間處理，若果係Ubisoft，可能幾日幫你搞惦。

今次終於黎到2014年暑期補習班嘅最後一款遊戲，亦有機會係我喺X360上面玩嘅最後一隻。臨尾可以遇到《Batman Arkham Origins》哩種高質素嘅系列作都可以叫做一個幾美滿嘅謝幕。經過哩款遊戲，即使日後Rocksteady金盤洗手，華納搵Montreal studio頂替，@肥狗仔@都唔太擔心。

個人評分: 8.8/10

michael.t

@肥狗仔@ 發表於 2014-9-1 01:25
斷斷續續花咗三日時間，主線其實唔長，其餘時間集中搞惦Anarky同Mad Hatter等支線，又求其收集咗啲野同查 ...

肥狗兄既分析又其實都好合理

我又真係有點兒被說服了

因為我要撫心自問我enjoy呢隻Arkham續作 其實我係玩得好愉快的

再加肥狗兄一句當大型DLC看待 隻game諗真D其實當堂好似變左佳作

不過我舊年大拿拿掉左三舊幾水買呢隻DLC 我個expectation 就一定唔同

認真 Arkham Knight 可以Delay

如果Rocksteady 出呢個Arkham Asylum/City/Origins  PS4/Xbox One合集

呢D 好 Game HD Re-Release 我會肯科水