如果想睇到更多76師兄嘅分享，快啲登入成為會員啦！
您需要 登入 收看或下載更多內容。還未成為會員？成為會員
x
本帖最後由 Collection 於 2014-7-13 11:52 編輯
以下訪問內容,
並不代表"Post76玩樂網"立場
Collection信箱 ~ 二手市場專訪 (上篇)
要數二手碟舖, 旺角信和中心一定係首選, 我諗呢度應該冇乜人未去過,
今次就搵來它做訪問
"古今"人稱"o靚仔舖", "古今"老闆Ken, 2007年開業至今,
八年時間裡, 可為見証影碟嘅成長路!
以下就透過這訪問, 讓廣大影碟迷, 對呢個日行夜行的地方, 加深一點了解!
C 代表 Collection
K 代表 "古今"老闆Ken
C: 當初DVD年代二手市場係點架 ?
K: DVD港版都普通, 但DVD外版係好受歡迎, 貴d都有人買, 以前外版唔
容易入手, 加上外版真係比港版靚, 放出嚟定價高少少都賣得出
C: 咁後嚟blu-ray開始興起, 佢嘅二手市場係點 ?
K: 開頭好勁, 基本上有人嚟放碟, 我哋一收完都未mark價放上櫃, d人已經問賣幾錢,
嗰時基本上一隻港版你mark得平個市價十幾至二十蚊都攪惦, 好快走到!
C: 咁blu-ray興起嘅時候, DVD個二手市場係咪變得好唔值錢 ?
K: 係信和呢個地方會, 信和二手肯定係blu-ray行先, 街舖就重係DVD好賣
C: 街舖指"Y西"個d ?
K: 係吖! 你見佢哋賣DVD重係佔最大地方, 又擺係當眼位就知! 同埋而家新片DVD定價平咗,
真係重好多人買嚟睇 !
C: 咁DVD重有邊d值少少錢 ?
K: 有blu-ray又有DVD嗰d一定唔得, 除非係無發行過blu-ray嗰d dvd都重有人搵 !
C: 你指港產片?
K: 一定係la, 西片無港版求其入隻美版都得, 但港產片冇出過blu-ray嗰d
有時重有得炒下! 早期d演唱會 dvd, 只要無blu-ray, 一樣值番d ! 如果你
話外版港產片重多人搵就要睇乜戲 !
C: 王家衞嗰d ?
K: 係呢, 唔知點解係有人搵!
C: 咁我們視作靚爆包裝嘅影碟, 係二手店舖眼中又如何睇法 ?
K: 其實都係睇部戲, 睇有冇中字, 我哋收隻碟, 都係計多唔多人買, 你話靚包裝,
d人最多拎起手睇下, 之後見比隻膠盒貴, 咁d客就情願入隻膠盒睇.......
你睇batman, 老變個d, 就算man of steel咁新...包裝唔靚咩!? 而家咪一樣死貨 !
C: 鐵盒呢, 鐵盒版唔係好賣d咩 ?
K: 從來唔會la, 一手市場可能會, 但係二手絕對唔係, 膠盒最多人買又方便擺, 又唔怕你整凹,
有時d鐵盒比人整凹咗我重要平賣番出去!
C: 紙套又點 ?
K: 咪又係睇部戲, 睇有冇中字 !
C: 咁你哋會唔會話多個紙套收高少少 ?
K: 舉例我收你隻碟88蚊, 你多個紙套, 我最多收90, 重要睇部戲新唔新, 一舊咗都係88,
或者更低 !
C: 咁點為知新 ?
K: 隻碟一出果嗰禮拜你就放, 咁7至8折回收都無問題 !
C: 兩個禮拜算耐 ?
K: 算, d人等得耐過咗度氣, 就等你平d先再買嚟睇, 一係就上網DL睇咗算..........
C: 或者係盒子度睇la !
K: 無錯 !
C: 你哋二手舖係咪唔鍾意d人放d大大盒嘅boxset落嚟 ?
K: 更係, 地方細嘛, "特區"咁大地方都係咁話 ! 而且利潤唔多, 我不如賣多兩隻膠盒重好!
C: 頭先話題提及"特區"(信和另一間好出名的二手碟舖), 其實你哋係同行如敵國 ?
一話有互相會報料 ?
K: 當然唔係敵人, 因從來大家客路唔同, 無衝突! 但就好少交流!
C: 咁落得嚟放碟都鍾意夾下價先放, 其實你哋同其它二手鋪有冇話有一套統一收碟價去跟 ?
K: 無la, 其實好多時都係亂吹個價出嚟 ! 有時你下午同夜晚嚟...個回收價已經唔同, 係信和
絕對係海鮮價收碟!
C: 咁下次真係可以夾下價, 哈哈.......
Collection信箱 ~ 二手市場專訪 (上篇) ~ 完
第一次出文字為主嘅post, 怕悶親大家, 所以寫住咁多先, 但如果大家覺得唔悶!
就實際d加分同留下言支持, 等我下篇可以寫得爆d好冇 ?
好! 大家一齊睇睇"下篇"預告先
Collection信箱 ~ 二手市場專訪 (下篇) 預告
外掛中字......對二手市場上, 會令外版更為好賣 ? 還是.....?
二手店舖最喜歡收...最憎收嘅碟 ? 又會係那間發行 ?
行二手店舖的顧客眾多, 怪人! 奇人! 你又知多少 ?
二手店舖對今日影碟市場, 又如何評價 ?
國內同胞近年係香港消費力甚高, 係二手影碟市場又如何 ?
Collection信箱 ~ 二手市場專訪 (下篇) ........is coming soon |
[複製鏈接]
發表於 2014-6-14 21:57
