哥斯拉…. J J 小評 (含內容)

lkljason · 發表於 2014-5-19 16:15

如果想睇到更多76師兄嘅分享，快啲登入成為會員啦！

您需要登入收看或下載更多內容。還未成為會員？成為會員

x

其實我睇戲好簡單，但求套戲娛樂性豐富，坐得CC服服，比果舊水買飛已經無投訴，我亦理解睇呢d怪獸戲有小朋友就在所難免，但唔該可唔可以管束下咪 ”忍” o係播映期間講野呢，真係好 ”忍” 討厭。(唔用呢個形容詞真係唔能夠表達我果種不滿)

講翻套戲，舊版哥斯拉雖然影評一致唔掂，但作為唔係粉絲既我，當一部變種恐龍片黎睇我係覺得接受，所以呢次新版哥斯拉我完全無懷疑唔好睇既情況下就入場。睇完後再睇翻d影評，哥斯拉今次比較忠於原祖版本，即係無論外型、叫聲、擺尾同噴死光，呢d特撮片既原素完全係保留，當然CG荷里活既級數你唔使擔心好假，好此道者應該睇得過癮。

o係兩個鐘頭裡面，套戲可以講無乜冷場，但你叫我講好印象深刻又無邊part特別覺得，而拍攝用左人類既角度，所以真實感唔錯，之前講過我唔係哥既粉絲，所以”口爆” 死光果下我不自覺覺得唔係呀嘛咁都得 (我老細就兩次都笑左出黎)，一大一小既醜樣怪獸明明開頭同哥勢均力敵，但唔知係咪趕收場，最後竟然各自一招KO，呢點唔係好滿意，另外身位地球人，最後竟然個行動只係拆翻自己放既炸彈，唉~~~好廢呀真係。

總結：今次既哥斯拉除左唔恐怖唔核突之外，佢既肥do do身形、一出場closeup隻腳仔同果對細咪咪既眼睛，我只係覺得有d萌、卡哇兒同cutie既感覺，可能今次既角色係救世主啦，所以造型要咁掛。我今次都係睇3D全景聲，音效震撼一流，但3D真係唔多覺，強烈建議睇2D或者Imax版 (聽其他朋友影評講Imax版畫面好正)。仲有d字幕可唔可以唔好用台譯既哥吉拉呢？你戲名都叫哥斯拉啦，改改個名唔o徒你好多時間，尊重下香港市場好嘛！

題外話：仲有男主角係主演勁揪俠屌爆俠既Aaron Johnson，雖然剪左個短髮都幾靚仔，但硬係投入唔到佢做呢類咁老正既角色，可能真係先入為主左。而女主角Elizabeth Olsen，睇名你當然唔知係邊個，今次哥斯拉佢地係做兩公婆，但係Avengers 2佢地係飾演兩姐弟，唔知到時睇會唔會覺得怪怪地呢？XDDDDD