落入凡間的天使 - K812 (加小量Calyx M 試聽感+相片後補)

甜鬆潤 · 發表於 2014-5-16 18:07

如果想睇到更多76師兄嘅分享，快啲登入成為會員啦！

您需要登入收看或下載更多內容。還未成為會員？成為會員

x

本帖最後由甜鬆潤於 2014-5-16 18:13 編輯

24小時不停煲左兩個幾星期，都有200粒鍾，我諗自己親身聽既時間，都有不下30小時。
病左幾日都忍唔住要聽返幾粒鍾，因為實在太誘惑，太返唔到轉頭。

而遲遲未正式講及K812既原因，係因為我根本唔識得形容。
當然你要我分件講我大把野講，高頻點正低頻點好中頻點毒，但係我思前想後，都認為唔適合用黎型容K812帶比我既體驗。
最重要係，我唔認為我有資格可以量化K812。

如果世界上真係有天國，咁我諗，K812應該係同天神既金莎一樣，無意中落入凡間。
從此，呢種只係天上有既享受，就比人類發現左。

我就好似一介庶民突然間去左皇帝屋企住，從來未試過聽耳機會有依一種高不可攀既感覺，一切都華禮而高貴，我只能夠呆呆而又貪婪地盡請享受依種感覺，細聽之下更覺得有一股屬於Opus One既味道，有力量而又溫柔，優雅而又熱情，帶幾分醉意，卻不失貴氣，紫醉金迷，令我不能自拔。

設計上除左單邊出線有少少爭議之外，配戴感非常優秀，係，係優秀，已經唔係舒服咁簡單。基本上大部份既耳機都有時間限制，一戴得耐就算唔攰都會有輕微不適，尤其係我依d四眼仔，但係K812真係例外，連戴幾個小時都無問題，不過都未至於零負擔。

螢幕截圖 2014-05-16 16.17.56.png

聆聽謝安琪既“我們都忘了”，音樂唔再只係耳朵既享受，K812近乎將整個情景描寫出黎，雨水落下既聲音，水花，伴隨著聲音令整個畫面係腦海中重組，當中既鋼琴聲唔再只係一個個音符組成既混合品，彷彿見到每一下彈奏既開始與結束。歌聲唔再係平面，彷佛能夠見到歌手既嘴唇動作，呼吸，我唔會用有無感染力去形容，我會直接用感動黎形容。

螢幕截圖 2014-05-16 16.14.35.png

轉聽Anna Calvi，整個環境頓時變得迷幻，低頻於耳殼裡澎漲、爆發，再沉殿於身體裡面，滴酒未沾卻已經有三分醉。

螢幕截圖 2014-05-16 16.15.13.png

聽Abraxas既Satana，音場定位表現舒服自然，未至於有LCD X既立體感或者曠闊既音場，但係就毫無違和感，你唔會特別在意音場定位，但係亦唔會令人覺得空間有絲毫局限。

如果手頭上既耳機只能保留一隻，我會毫不猶疑咁揀K812。
我自己都估唔到，一路都偏向IEM既我，會有咁既選擇。
我對K812既評價，已經唔止係高既程度，係直頭有d超乎我能夠接受既程度，作為一個乜都唔識既人從來都唔敢過度評價任何一樣產品，不過今次真係唔好怪我吹到太大，事關一個庶民第一次去皇宮，太震撼，一時誇大都實在不能避免，但係我相信試過既人，就算無話感受大到好似我咁誇張，都應該會比佢嘅聲音吸引住。

與其話K812比較難推，倒不如話佢比較難夾，手頭上既HDVD800，同先前試玩過既Conductor，都推得出完整既聲音，但係實在並唔相配。
係HDVD800底下既表現太斯文、平靜，而且失左K812既貴氣。
係Conductor底下有明顯既違和感，變得硬朗而又粗魯。
手頭上最能與K812配合既暫時係Meridian Prime+PSU依個組合，以上既聽感亦係基於依個組合而寫，但係坦白講句，對於Prime能唔能夠充份發揮K812既潛力，我非常保留。

唔知有無師兄知道K812同咩機比較夾呢？實在好希望能夠一聽真正完全發揮底下既K812。

順帶一提，今日去試左Calyx M，只係聽左約半小時。加上試聽時並唔係用自己嘅歌，所以聽感非常初步。
分析力不錯，檔案質素非常重要，整體似監聽式，唔太感覺到有音染，清析通透，音場表現係一個surprise，感覺上曲類偏向classical 或 jazz，樂器表現優秀，人聲則未算十分吸引。
個人認為整體質素比AK240好，但調音方面AK240對我黎講較為吸引。
體積比想像中要大，不過仍能夠單手操控，瑩幕表現幾好，但係調較音量個人都係偏向AK240既扭多過Calyx M既推。
Android系統+自家ui，介面設計得非常唔錯，簡單易用而且亦做得幾靚，感覺上都真係似貴機，依方面AK要改善下。
做工亦都唔錯，可以插一張sd一張micro sd，我認為係一個賣點。
唯一既不滿係只有phone out，雖然如上文所講唔重味精，就算當作line out都唔大問題，但係假如可以提供最起碼一個Digital out，我相信係功能上會更為完整。